រាជធានីភ្នំពេញ ៖ ទីតាំងលក់ខោអាវចំនួន២កន្លែង ត្រូវបានកម្លាំងកងរាជអាវុធហត្ថ លើផ្ទៃប្រទេសចុះបង្ក្រាបឆែកឆេរដោយដកហូតបានខោអាវកីឡាចំនួន៣២៨កំប្លេ ដែលឈ្មួញរំលោភកម្មសិទ្ធិបញ្ញាដោយក្លែងម៉ាកខោអាវរបស់សហព័ន្ធកីឡាបាល់ទាត់កម្ពុជាយកមកចែកចាយលក់នៅទីផ្សារ ។ នៅក្នុងការឆែកឆេរសមត្ថកិច្ចក៏បានឃាត់ខ្លួនស្ត្រី២នាក់ ជាអាជីវករលក់ខោអាវ និងអ្នករត់ម៉ូតូឌុបម្នាក់ផងដែរ…
រាជធានីភ្នំពេញ ៖ ទីតាំងលក់ខោអាវចំនួន២កន្លែង ត្រូវបានកម្លាំងកងរាជអាវុធហត្ថ លើផ្ទៃប្រទេសចុះបង្ក្រាបឆែកឆេរដោយដកហូតបានខោអាវកីឡាចំនួន៣២៨កំប្លេ ដែលឈ្មួញរំលោភកម្មសិទ្ធិបញ្ញាដោយក្លែងម៉ាកខោអាវរបស់សហព័ន្ធកីឡាបាល់ទាត់កម្ពុជាយកមកចែកចាយលក់នៅទីផ្សារ ។
នៅក្នុងការឆែកឆេរសមត្ថកិច្ចក៏បានឃាត់ខ្លួនស្ត្រី២នាក់ ជាអាជីវករលក់ខោអាវ និងអ្នករត់ម៉ូតូឌុបម្នាក់ផងដែរ ។ ការឆែកឆេរនេះបានធ្វើឡើង កាលពីវេលាម៉ោង១០និង៣០នាទីព្រឹក ថ្ងៃទី០៧ ខែវិឆ្ឆិកា ឆ្នាំ២០១៨ នៅចំណុចហាងលក់ខោអាវយីហោលីហ្សា ស្ថិតនៅផ្ទះលេខ តូបលេខ២៨៥ ផ្លូវ៩០៧ ក្រុមទី២ ភូមិទួលសង្កែ សង្កាត់ទួលសង្កែ១ ខណ្ឌឫស្សីកែវ ។ ប្រតិបត្តិការនេះដឹកនាំដោយលោកឧត្តមត្រី គង់ សត្ថារិន ប្រធានការិយាល័យប្រឆាំងបទល្មើសព្រហ្មទណ្ឌនៃកងរាជអាវុធហត្ថលើផ្ទៃប្រទេស និងមានការសម្របសម្រួលពីលោក សាយណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ ព្រមទាំងមានការសហការណ៍ជាមួយអាជ្ញាធរ និងសមត្ថកចិ្ចមូលដ្ឋានផងដែរ ។
តាមកងរាជអាវុធហត្ថបានឲ្យដឹងថា ដោយមានការស្រាវជ្រាវពីកម្លាំងជំនាញសមត្ថកិច្ចក៏ឈានទៅឆែកឆេរហាងលក់ខោអាវចំនួន២កន្លែង នៅជាប់គ្នាក្នុងទីតាំងតែមួយ ដើម្បីរកខោអាវកីឡាដែលក្រុមឈ្មួញបោះលក់ចែកនៅទីផ្សារ រំលោភលើកម្មសិទ្ធបញ្ញាដោយក្លែងម៉ាក ខោអាវរបស់សហព័ន្ធកីឡាបាលទាត់កម្ពុជា ។ នៅក្នុងការឆែកឆេរកម្លាំងកងរាជអាវុធហត្ថរកឃើញខោអាវកីឡាវាយអក្សរ (FFC) ចំនួន៣០ដុំ ស្មើ៣០០កំប្លេ និង២៦កំប្លេហាង ដែលមានម្ចាស់ឈ្មោះ ឆូវ គន្ធី ភេទស្រី អាយុ៣៣ឆ្នាំ ស្នាក់នៅទីតាំងខាងលើ មានស្រុកកំណើតនៅខេត្តកំពង់ចាម ។
បន្ទាប់ពីឆែកឆេរកម្លាំងកងរាជអាវុហត្ថក៏បាននាំខ្លួនស្ត្រីជាម្ចាស់ហាង និងអ្នករត់ម៉ូតូឌុបម្នាក់ដែលបានដឹកខោអាវមកពីផ្សារអូឡាំពិកទៅសាកសួរ ។ ដោយឡែកតូបលក់ខោអាវនៅក្បែរនោះមួយកន្លែងទៀតត្រូវបានសមត្ថកិច្ចឆែរ ដោយដកហូតបានខោអាវកីឡាដូចគ្នាចំនួន២កំប្លេ និងបាននាំខ្លួនស្ត្រីម្នាក់ទៀតទៅសាកសួរផងដែរ ។
តាមស្ត្រីឈ្មោះ ឆូវ គន្ធី ជាម្ចាស់ហាងបានឲ្យដឹងថា ខោអាវកីឡានោះត្រូវបានគេមកកុម្ម៉ង់ ហើយគាត់បានទៅកុម្ម៉ង់បន្តទៀត នៅអូឡាំពិក ហើយទើបឲ្យម៉ូតូឌុបមកដល់ត្រូវបានសមត្ថកិច្ចចុះចាប់តែម្តង ។
ស្ត្រីជាម្ចាស់ហាងចំនួន២នាក់ និងអ្នកម៉ូតូឌុបម្នាក់ត្រូវបានកម្លាំងកងរាជអាវុធហត្ថនាំខ្លួនទៅសាកសួរ ។ ទោះបីជាយ៉ាងណាសមត្ថកិច្ចពុំបានផ្តល់ព័ត៌មានលំអិតនោះទេ ។ តាមព័ត៌មានអោយដឹងទៀតថា បន្ទាប់ពីឆែកឆេរសមត្ថកិច្ចបានបន្តស្រាវជ្រាវរកអ្នកផលិតក្លែងម៉ាកខោអាវ របស់សហព័ន្ធកីឡាបាលទាត់កម្ពុជា នៅអូឡាំពិកបន្តទៀត ៕
ចែករំលែកព័តមាននេះ