រាជធានីភ្នំពេញ ៖ ក្រុមបាល់ទាត់សហភាពសហព័ន្ធយុវជនកម្ពុជាខេត្តព្រៃវែងបានក្លាយជាជើងឯកពានរង្វាន់ 3G Football League 2013 បន្ទាប់ពីបំបាក់ក្រុមកងទ័ពជើងគោក (Army FC) ដោយលទ្ធផល៦ទល់៣ ក្នុងវគ្គផ្តាច់ព្រ័ត្រកាលពីរសៀលថ្ងៃទី៧ មិថុនា ឆ្នាំ២០១៣ នៅទីលានបាល់ទាត់ 3G ដោយទទួលបានប្រាក់រង្វាន់ជើងឯកចំនួន៣លានរៀល ។
រាជធានីភ្នំពេញ ៖ ក្រុមបាល់ទាត់សហភាពសហព័ន្ធយុវជនកម្ពុជាខេត្តព្រៃវែងបានក្លាយជាជើងឯកពានរង្វាន់ 3G Football League 2013 បន្ទាប់ពីបំបាក់ក្រុមកងទ័ពជើងគោក (Army FC) ដោយលទ្ធផល៦ទល់៣ ក្នុងវគ្គផ្តាច់ព្រ័ត្រកាលពីរសៀលថ្ងៃទី៧ មិថុនា ឆ្នាំ២០១៣ នៅទីលានបាល់ទាត់ 3G ដោយទទួលបានប្រាក់រង្វាន់ជើងឯកចំនួន៣លានរៀល ។
លទ្ធផលនៃការប្រកួតក្នុងតង់ទី១ ក្រុមទាំងពីរមិនមានអ្នកណាឈ្នះនោះទេ គឺលទ្ធផលស្មើគ្នា១-១ ដោយ១គ្រាប់របស់ក្រុមសហភាពសហព័ន្ធយុវជនកម្ពុជាខេត្តព្រៃវែងរកបានដោយកីឡាករ ហុក សុចិត្រា ពាក់អាវលេខ១៣ នៅប៉ុន្មាននាទីដំបូង ។ ឯ១គ្រាប់របស់ក្រុម Army FC រកបាននៅនាទីចុងម៉ោងដោយកីឡាករពាក់អាវលេខ១៧ Therry Neou ។
ឈានចូលដល់តង់ទី២ ក្រុមទាំងពីរបានលេងសម្រុកដាក់គ្នាទៅវិញទៅមកយ៉ាងខ្លាំង ទើបមិនយូរប៉ុន្មានក្រុមសហភាពសហព័ន្ធយុវជនកម្ពុជាខេត្តព្រៃវែងរកបានគ្រាប់បាល់រហូតដល់៥គ្រាប់ ខណៈដែលក្រុម Army FC អាចរកគ្រាប់បាល់បានតែ២គ្រាប់ប៉ុណ្ណោះនៅពាក់កណ្តាលតង់ទី២។
៥គ្រាប់របស់ក្រុមសហភាពសហព័ន្ធយុវជនកម្ពុជាខេត្តព្រៃវែងរកបានដោយកីឡាករ លន់ ចំរើន ពាក់អាវលេខ៧ ចំនួន២គ្រាប់ និង៣គ្រាប់ទៀតរកបានដោយកីឡាករពាក់អាវលេខ១៣ ហុក សុចិត្រា ។ ឯ២គ្រាប់របស់ក្រុម Army FC រកបានដោយកីឡាករពាក់អាវលេខ១៧ Therry Neou និងកីឡាករពាក់អាវលេខ១៥ David Quadrao ។
សូមបញ្ជាក់ថា ព្រឹត្តិការណ៍ 3G Football League 2013 ពានរង្វាន់បាល់ទាត់មិនអាជីពបង្កើតឡើងនារដូវកាលដំបូងនេះមានកីឡាករចូលរួមចំនួន៨ក្រុមគឺ ក្រុមសហភាពសហព័ន្ធយុវជនកម្ពុជាខេត្តព្រៃវែង, ក្រុមកងទ័ពជើងគោក (Army FC), ក្រុម Bayon W.FC, ក្រុម NPMEC, ក្រុម Victory FC, ក្រុម Home Sport, ក្រុមទួលគោក FC និងក្រុម Inter Penh FC ។
ចំណែករង្វាន់ដែលត្រូវប្រគល់ជូនក្រុមចំណាត់ថ្នាក់លេខ១ គឺក្រុមសហភាពសហព័ន្ធយុវជនកម្ពុជាខេត្តព្រៃវែងទទួលបានពានមួយ និងប្រាក់រង្វាន់៣លានរៀល ។ ក្រុមចំណាត់ថ្នាក់លេខ២ Army FC ទទួលបានប្រាក់រង្វាន់១.៥០០.០០០រៀល ចំណែកក្រុម NPMEC ដែលជាក្រុមចំណាត់ថ្នាក់លេខ៣ ទទួលបានប្រាក់រង្វាន់៧៥០.០០០រៀល ។ កីឡាករជម្រើសជាតិជើងចាស់ និងជាអតីតគ្រូបង្វឹកក្រុមជម្រើសជាតិ ហុក សុចិត្រា លេងនៅក្រុមសហភាពសហព័ន្ធយុវជនកម្ពុជាខេត្តព្រៃវែង ជាអ្នកទាត់បាល់បញ្ចូលទីបានច្រើនជាងគេ សរុបចំនួន៣២គ្រាប់ ខណៈពាន Fair-Play ក៏បានទៅលើក្រុមរបស់លោកដែរ និងពានអ្នកចាំទីល្អប្រចាំកម្មវិធីបានទៅកីឡាករ Tim Kan Gas របស់ក្រុម Bayon W.FC ។
ក្នុងឱកាសបិទការប្រកួតលោកឧត្តមសេនីយ៍ ខៀវ សាម៉េត អនុប្រធានសហព័ន្ធកីឡាបាល់ទាត់កម្ពុជា បានចូលរួមជាអធិបតីប្រគល់ពានរង្វាន់ និងបំពាក់មេដាយដល់ក្រុមបាល់ទាត់ដែលទទួលបានជ័យជម្នះ ។ លោក ខៀវ ភារិទ្ធ អ្នករៀបចំពានរង្វាន់នេះបានលើកឡើងក្រោយការប្រកួតថា ឆ្លងកាត់ការប្រកួតប្រជែងនេះ លោកសង្កេតឃើញក្រុមមួយចំនួនប្រសើរជាងមុន ដោយមានទម្រង់លេងល្អឡើងៗ ហើយក្រុមខ្លះមានកីឡាករតិច តែក្រោយមកមានកីឡាករច្រើនទៅៗ ។ អ្នកគ្រប់គ្រងរូបនេះបានផ្តាំផ្ញើទៅដល់ក្រុមបាល់ទាត់ទាំងអស់ត្រូវត្រៀមខ្លួនឱ្យបានរួចរាល់ ដើម្បីចូលរួមក្នុងការប្រកួតលើកក្រោយទៀត ព្រោះនឹងមានចំនួនក្រុមកីឡាចូលរួមច្រើនជាងឆ្នាំនេះ ។
លោក ហែម ដារិទ្ធ ប្រធានក្រុមសហភាពសហព័ន្ធយុវជនកម្ពុជាខេត្តព្រៃវែងបានឱ្យដឹងថា នេះជាពានរង្វាន់មួយដែលក្រុមរបស់លោកមិនងាយនឹងយកបានដោយងាយៗឡើយ ដោយត្រូវធ្វើការប្រកួតប្រជែងខ្លាំងណាស់ជាមួយនឹងក្រុមយុវជនដទៃទៀត ដែលគេក៏មានបទពិសោធន៍ប្រហាក់ប្រហែលនឹងក្រុមរបស់លោកដែរ ។ កីឡាករដែលទាត់ក្នុងក្រុមរបស់លោកភាគច្រើនសុទ្ធតែជាយុវជននៅខេត្តព្រៃវែង ។ លោកបន្តថា ការប្រកួតចាញ់ឬឈ្នះជារឿងធម្មតាទេ តែបញ្ហាសំខាន់គឺធ្វើយ៉ាងណាដើម្បីផ្លាស់ប្តូរបទពិសោធន៍បច្ចេកទេសពីគ្នាទៅវិញទៅមកតែប៉ុណ្ណោះ ។
ម្យ៉ាងវិញទៀត ក្រុមបាល់ទាត់យុវជនកម្ពុជាខេត្តព្រៃវែងក៏មានបំណងពង្រឹងសមត្ថភាពបច្ចេកទេសក្នុងការលេងឱ្យកាន់តែល្អប្រសើរថែមទៀត ដើម្បីត្រៀមចូលរួមការប្រកួតបាល់ទាត់ក្នុងកម្មវិធីផ្សេងៗនាពេលខាងមុខ ៕
ចែករំលែកព័តមាននេះ