រាជធានីភ្នំពេញ ៖ សហព័ន្ធអារ៉ាប់រួមមានបំណងចូលរួមអភិវឌ្ឍន៍កម្ពុជា ឲ្យមានការរីកចម្រើនថែមទៀត និងគ្រោងវិនិយោគលើប្រព័ន្ធប្រេង ឧស្ម័ន ពាណិជ្ជកម្ម និងហិរញ្ញវត្ថុនៅកម្ពុជា ។ នេះបើយោងតាមជំនួបពិភាក្សាការងាររវាងសម្ដេចតេជោ…
រាជធានីភ្នំពេញ ៖ សហព័ន្ធអារ៉ាប់រួមមានបំណងចូលរួមអភិវឌ្ឍន៍កម្ពុជា ឲ្យមានការរីកចម្រើនថែមទៀត និងគ្រោងវិនិយោគលើប្រព័ន្ធប្រេង ឧស្ម័ន ពាណិជ្ជកម្ម និងហិរញ្ញវត្ថុនៅកម្ពុជា ។ នេះបើយោងតាមជំនួបពិភាក្សាការងាររវាងសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាមួយសមាជិករាជវង្ស ឌូបៃ នៃសហព័ន្ធអារ៉ាប់រួម ព្រះអង្គម្ចាស់ Amed Dalmook Al Maktoum នាព្រឹកថ្ងៃទី៦ វិច្ឆិកា ម្សិលមិញ ។
នាឱកាសនោះ ព្រះអង្គម្ចាស់ Amed Dalmook Al Maktoum បានបង្ហាញពីចំណាប់អារម្មណ៍ការវិនិយោគលើប្រព័ន្ធប្រេង ឧស្ម័ន លើពាណិជ្ជកម្ម និងហិរញ្ញវត្ថុនៅកម្ពុជា ។ ជាមួយគ្នានេះ សហព័ន្ធអារ៉ាប់រួមនឹងផ្តល់ជូនឥណទានកម្ចី (Credit line) ចំនួន៥០០លានដុល្លារអាមេរិក សម្រាប់ប្រើប្រាស់ក្នុងការនាំទំនិញចូលពីសហព័ន្ធអារ៉ាប់រួម ហើយនឹងសិក្សាលទ្ធផលផ្សេងៗទៀត ដើម្បីធ្វើការវិនិយោគនៅក្នុងព្រះរាជាណាចក្រកម្ពុជា ។ ជាមួយគ្នានេះព្រះអង្គម្ចាស់ ក៏បានអញ្ជើញសម្តេចតេជោ ហ៊ុន សែន ទៅបំពេញទស្សនកិច្ចនៅសហព័ន្ធអារ៉ាប់រួម ដើម្បីពង្រីកទំនាក់ ទំនងរវាងប្រទេសទាំងពីរឲ្យកាន់តែរ៉ឹងមាំថែម
ទៀត ។
សម្ដេចតេជោនាយករដ្ឋមន្ត្រី បានថ្លែងអំណរគុណព្រះអង្គម្ចាស់ និងប្រជាជន ក៏ដូចជា សហព័ន្ធអារ៉ាប់រួម ដែលបានជួយដល់ព្រះរាជាណាចក្រកម្ពុជា ជាពិសេសសម្រាប់អភិវឌ្ឍន៍ធនធានមនុស្សផង ការកសាងមជ្ឈមណ្ឌលកុមារកំព្រា និងជួយដល់កុមារកំព្រាផង ។ ពាក់ព័ន្ធនឹងការវិនិយោគលើវិស័យឧស្ម័ន សម្តេចតេជោនាយករដ្ឋមន្ត្រី បានស្វាគមន៍ និងមានប្រសាសន៍ផងដែរថា ក្នុងករណីដែលបានវិនិយោគក្នុងវិស័យឧស្ម័ននេះ គឺជួយកាត់បន្ថយក្នុងការកាប់ឈើធ្វើអុសដុតផង ហើយក៏ជួយក្នុងការគ្រប់គ្រងធនធានធម្មជាតិផងដែរ ។
ក្នុងឱកាសនោះ សម្ដេចក៏ថ្លែងអំណរគុណចំពោះព្រះអម្ចាស់ផងដែរចំពោះការផ្ដល់ឥណទានកម្ចី(Credit line)ចំនួន៥០០លានដុល្លារ សម្រាប់នាំទំនិញចូលពីសហព័ន្ធអារ៉ាប់រួម ហើយក៏បានថ្លែងអំណរគុណផងដែរ ចំពោះការអញ្ជើញសម្ដេចទៅទស្សនកិច្ចនៅអារ៉ាប់រួម ដោយសម្ដេចបញ្ជាក់ថា នឹងពិនិត្យមើលពេលវេលាដ៏សមស្របមួយ នឹងទៅធ្វើទស្សនកិច្ចនៅទីនោះ ។ ពាក់ព័ន្ធឥណទាន (Credit line) ៥០០លានដុល្លារនោះ សម្ដេចតេជោបានណែនាំឲ្យពិភាក្សាជាមួយស្ថាប័នពាក់ព័ន្ធផ្សេងៗទៀត ដើម្បីរកចំណុចណាមួយក្នុងការចាប់ផ្ដើមប្រើប្រាស់ថវិកានេះ ៕
ចែករំលែកព័តមាននេះ