រាជធានីភ្នំពេញ ៖ ការប្រកួតប្រដាល់វគ្គជម្រុះវិលជុំកំពូលអ្នកប្រយុទ្ធគុនខ្មែរ នៅលើសង្វៀនស្ថានីយទូរទស្សន៍ CTN នារាត្រីថ្ងៃអាទិត្យទី៩ មិថុនា ស្អែកនេះបានឈានចូលសប្តាហ៍ទី៤ហើយ ហើយកីឡាករដែលនឹងមានមុខឡើងរេញប្រកួតនៅថ្ងៃនោះមានទាំងអស់៥គូ និង៣ប្រភេទទម្ងន់ ក្នុងនោះទម្ងន់៥៧គីឡូក្រាម២គូ, ទម្ងន់៦០គីឡូក្រាម២គូ និងទម្ងន់៦៥គីឡូក្រាម១គូ ។
ក្នុងប្រភេទទម្ងន់៥៧គីឡូក្រាម កីឡាករឈុត ឈុនលី មកពីខេត្តពោធិ៍សាត់ ជួបជាមួយកីឡាករទី ពន្លែត មកពីខេត្តសៀមរាប និងកីឡាករស៊ឹម ប៊ុនស្រ៊ន់ មកពីខេត្តកំពង់ចាម ជួបជាមួយកីឡាករខុន ស៊ីចាន់ មកពីក្លិបកងពលធំអន្តរាគមន៍លេខ៣ព្រះវិហារ ។ រវាង ឈុត ឈុនលី និងទី ពន្លែត ប្រកួតបាន២លើកម្នាក់រួចមកហើយ ក្នុងនោះឈ្នះ១ប្រកួត និងចាញ់១ប្រកួតដូចគ្នា ។ សម្រាប់ការជួបគ្នាលើកនេះ គេមានជំនឿចិត្តលើទី ពន្លែត ច្រើនជាងដោយយោងលើបទពិសោធន៍ និងល្បិចប្រយុទ្ធដែលគេធ្លាប់ឃើញកន្លងមក ។
ចំណែក ស៊ឹុម ប៊ុនស្រ៊ន់ និងខុន ស៊ីចាន់ ក៏ប្រកួតបាន២លើកម្នាក់ដូចគ្នា ប៉ុន្តែលទ្ធផលមិនដូចគ្នាទេ ដោយស៊ឹម ប៊ុនស្រ៊ន់ ចាញ់ទាំង២លើកមាន២ពិន្ទុប៉ុណ្ណោះ លើកនេះបើសិនជាចាញ់ទៀតគឺមានតែផ្លូវហាលខោទេ ។ ម្យ៉ាងវិញទៀត ការមកប៉ះខុន ស៊ីចាន់ លើកនេះកាន់តែលែងមានសង្ឃឹមតែម្តងព្រោះគេជាអ្នកប្រដាល់ចាស់វស្សាមានប្រវត្តិប្រកួតនៅលើសង្វៀនយ៉ាងជោកជាំ ហើយ២ប្រកួតកន្លងមកឈ្នះទាំងអស់មាន៦ពិន្ទុនាំមុខគេក្នុងពូល ។
ប្រភេទទម្ងន់៦០គីឡូក្រាម វិញ កីឡាករព្រីង ដារិន មកពីខេត្តបាត់ដំបង ជួបជាមួយកីឡាករគង់ ឌីណា មកពីក្លិបកងពលតូចលេខ៧០ និងកីឡាករហុត គីមហៀត មកពីក្លិបតាព្រហ្មមានជ័យបង្ក្រាបគ្រឿងញៀន ជួបជាមួយកីឡាករជួន បូរិន មកពីខេត្តព្រៃវែង ។
ព្រីង ដារិន និងគង់ ឌីណា ទើបតែប្រកួតបាន១លើកម្នាក់ប៉ុណ្ណោះ ឯលទ្ធផលមិនដូចគ្នាទេ ដោយព្រីង ដារិន ឈ្នះ ឯគង់ ឌីណា ចាញ់ ។ សម្រាប់ការប្រកួតលើកនេះគេមានជំនឿចិត្តលើគង់ ឌីណា ច្រើនក្នុងការយកឈ្នះ ទោះបីលើកមុនកីឡាកររូបនេះចាញ់ក៏ដោយព្រោះបើសំអាងទៅលើកម្លាំងនិងល្បិចប្រយុទ្ធរបស់គេ គឺមិនពិបាកយកឈ្នះលើគូប្រកួតឡើយ ។ ចំណែក ហុត គីមហៀត និងជួន បូរិន វិញ គ៏ទើបប្រកួតបាន១លើកម្នាក់ដូចគ្នាដែរ ប៉ុន្តែហុត គីមហៀត ឈ្នះ ឯជួន បូរិន ចាញ់ ។ សម្រាប់ការជួបគ្នាលើកនេះគេមិនហា៊នទស្សន៍ទាយលទ្ធផលទុកមុនឡើយ ដូច្នេះមានតែរង់ចាំមើលទាំងអស់គ្នា ។
រីឯគូប្រកួតក្នុងទម្ងន់៦៥គីឡូក្រាមវិញ កីឡាករវ៉ន សាវី មកពីក្លិបឃ្លាំងមឿងកីឡា ជួបជាមួយកីឡាករសំអាង ឌុន មកពីក្លិបអេភូថងកីឡា ។ រវាងគូនេះប្រកួតបាន១លើកម្នាក់ និងមានសំណាងបានឈ្នះដូចគ្នា ។ សម្រាប់ការជួបគ្នាលើកនេះមិនទាន់ដឹងថា យ៉ាងណានោះទេ ព្រោះទាំងសងខាងសុទ្ធតែជាអ្នកប្រដាល់ចាស់វស្សាដូចគ្នា ។ នៅលើសង្វៀនដដែលកីឡាករអេ អូត មកពីក្លិបអេភូថងកីឡា ក៏មានមុខប្រកួតជាមួយកីឡាករសារឹម ងា៉ មកពីសមាគមកីឡាប្រដាល់ក្រសួងការពារជាតិក្នុងឋានៈជាគូប្រកួតមិត្តភាពដែរ តែសូមធានាថាគូនេះនឹងចូលរួមអង្រួនសង្វៀនប្រដាល់ CTN ឱ្យកក្រើកមិនខាន ៕
ចែករំលែកព័តមាននេះ