រាជធានីភ្នំពេញ ៖ ក្នុងជំនួបសម្តែងការគួរសម និងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី៤ មិថុនា នៅវិមានសន្តិភាព លោកស្រី Claire Vander Vaeren ប្រធានកម្មវិធីអភិវឌ្ឍន៍អង្គការសហប្រជាជាតិ(UNDP)ប្រចាំនៅកម្ពុជាមានប្រសាសន៍ថា អង្គការសហប្រជាជាតិគាំទ្រដល់កម្ពុជាចំពោះ
រាជធានីភ្នំពេញ ៖ ក្នុងជំនួបសម្តែងការគួរសម និងពិភាក្សាការងារជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នារសៀលថ្ងៃទី៤ មិថុនា នៅវិមានសន្តិភាព លោកស្រី Claire Vander Vaeren ប្រធានកម្មវិធីអភិវឌ្ឍន៍អង្គការសហប្រជាជាតិ(UNDP)ប្រចាំនៅកម្ពុជាមានប្រសាសន៍ថា អង្គការសហប្រជាជាតិគាំទ្រដល់កម្ពុជាចំពោះការអភិវឌ្ឍប្រកបដោយចីរភាព ហើយជួយកម្ពុជាដើម្បីធ្វើយ៉ាងណាឱ្យបានសម្រេចនូវគោលដៅសហស្សវត្សរ៍ ដែលកម្ពុជា និងអង្គការសហប្រជាជាតិបានដាក់ចុះឱ្យបានសម្រេចនៅឆ្នាំ២០១៥ខាងមុខនេះ ។
លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន បានប្រាប់ឱ្យដឹងបែបនេះ ក្រោយពីជំនួបសម្តែងការគួរសមនិងពិភាក្សាការងារ ក្នុងឱកាសដែលលោកស្រីតំណាង UNDP ថ្មីបំពេញបេសកកម្មនៅព្រះរាជាណាចក្រកម្ពុជា ។
លោកស្រីមានប្រសាសន៍បន្តថា ក្របខណ្ឌជំនួយរបស់អង្គការសហប្រជាជាតិផ្តោតការយកចិត្តទុកដាក់ទៅលើការជួយដល់កម្ពុជា ដើម្បីធ្វើយ៉ាងណាឱ្យមានកំណើនសេដ្ឋកិច្ចប្រកបដោយចីរភាព សុខភាព និងការអប់រំ បញ្ហាសមភាពនិងយេនឌ័រ អភិបាលកិច្ចនិងកិច្ចការគាំពារសង្គម។ ពាក់ព័ន្ធនឹងកិច្ចការគាំពារសង្គមនេះ លោកស្រីបញ្ជាក់ថា មានចំណុចពីរជាកត្តាសំខាន់ដែល UNDP មានការគាំទ្រយ៉ាងខ្លាំងគឺ ទី១-ជំរុញបញ្ហាធនធានមនុស្ស និងទី២-យុទ្ធសាស្ត្រគាំពារសង្គមរបស់រាជរដ្ឋាភិបាល ។
ចំណុចនេះក្នុងនាមលោកស្រីអ្នកតំណាង សម្របសម្រួលអង្គការសហប្រជាជាតិ នៅកម្ពុជា លោកស្រីនឹងប្រឹងប្រែងឱ្យអស់ពីសមត្ថភាពធ្វើយ៉ាងណាជួយដល់កម្ពុជាដើម្បីឆ្ពោះទៅកាន់ការអភិវឌ្ឍ ។ជាការឆ្លើយតប សម្តេចតេជោនាយករដ្ឋមន្ត្រីបានថ្លែងអំណរគុណតំណាងអង្គការសហប្រជាជាតិទាំងអស់ដែលមានវត្តមាននៅក្នុងព្រះរាជាណាចក្រកម្ពុជា ដែលកន្លងមកតែងតែជួយដល់កម្ពុជា នៅក្នុងពេលជួបផលលំបាក និងថ្លែងអំណរគុណប្រព័ន្ធអង្គការសហប្រជាជាតិ ទាំងអស់នៅកម្ពុជាដែលបានសហការជួយដល់កម្ពុជាក្នុងការរៀបចំយុទ្ធសាស្ត្រជំរុញការអភិវឌ្ឍ ជាពិសេសគាំទ្រដល់យុទ្ធសាស្ត្រគាំពារសង្គម ។
សម្តេចតេជោមានប្រសាសន៍ថា សម្តេចមានការព្រួយបារម្ភ នៅពេលដែលមានវិបត្តិហិរញ្ញវត្ថុពិភពលោក ព្រោះថាប្រជាជនដែលបានឆ្លងកាត់បន្ទាត់ភាពក្រីក្រ ហើយអាចធ្លាក់ចុះទៅវិញបាន ហើយយុទ្ធសាស្ត្រគាំពារសង្គមនេះ គឺរាជរដ្ឋាភិបាលបានដាក់ចេញនិងមិនត្រឹមតែដាក់ឱ្យល្អមើលនោះទេ គឺត្រូវអនុវត្តឱ្យបានហ្មត់ចត់ផង ។ ការបញ្ចប់នូវឡូត៍នេសាទ និងការប្រគល់កម្មសិទ្ធិដីធ្លីជូនប្រជាពលរដ្ឋគឺសុទ្ធសឹង តែជាចំណែកមួយនៃសកម្មភាពរបស់យុទ្ធសាស្ត្រគាំពារសង្គមរបស់រាជរដ្ឋាភិបាល ។
សម្តេចតេជោបានបន្តថា យើងកំពុងតែរៀបចំយុទ្ធសាស្ត្រចតុកោណជំហានទី៣ ដូច្នេះស្នើឱ្យUNDP សហការជាមួយរាជរដ្ឋាភិបាលកម្ពុជា ដើម្បីធ្វើយ៉ាងណាឱ្យយុទ្ធសាស្ត្រនេះមានការស៊ីសង្វាក់គ្នា និងដើរស្របគ្នាជាមួយនឹងយុទ្ធសាស្ត្ររបស់អង្គការសហប្រជាជាតិ ៕
ចែករំលែកព័តមាននេះ