រាជធានីភ្នំពេញ ៖ រថយន្តម៉ាកកាមរីស៊េរីឆ្នាំ១៩៩១ មួយគ្រឿងបានបើកថយក្រោយដោយចេតនា និងបានបំបុកទ្វារដែកផ្ទះស្ត្រីម្នាក់បណ្តាលឱ្យរងនូវការខូចខាតទ្វារមុខទាំងស្រុង បន្ទាប់មករថយន្តនោះក៏បានបើករត់គេចទៅបាត់ដោយសុវត្ថិភាព ។ ហេតុការណ៍នេះត្រូវបានគេអះអាងថា អាចផ្តើមចេញពីរឿងគំនុំស្នេហាត្រីកោណ ហើយការបើករថយន្តបំបុកទ្វារផ្ទះនោះគឺជាការព្រមានមួយដល់ស្ត្រីវ័យក្មេងដែលជាម្ចាស់ផ្ទះ ។
ហេតុការណ៍នោះបានបង្កឱ្យមានការភ្ញាក់ផ្អើលឡើង កាលពីវេលាម៉ោង១០និង៣០នាទីយប់ថ្ងៃទី៤ មិថុនា ត្រង់លំនៅឋានមួយកន្លែងមានទីតាំងស្ថិតនៅក្នុងបុរីព្រីនថោន ភូមិក្បាលដំរីស សង្កាត់កាកាប ខណ្ឌពោធិ៍សែនជ័យ ។ ស្ត្រីម្ចាស់ផ្ទះបានសុំមិនឱ្យបញ្ចេញឈ្មោះមានអាយុ២០ឆ្នាំ និងមានស្រុកកំណើតនៅក្នុងស្រុកអង្គរជ័យ ខេត្តកំពត ធ្វើការនៅក្នុងភោជនីយដ្ឋានមួយ ។ ចំណែកឯបុរសជាប្តីមានអាយុជាង៤០ឆ្នាំ ធ្វើការនៅក្នុងកាស៊ីណូណាហ្គា ។
តាមប្រភពព័ត៌មានបានឱ្យដឹងថា នៅមុនពេលកើតហេតុ ខណៈពេលដែលស្ត្រីម្ចាស់ផ្ទះកំពុងស្ថិតនៅក្នុងផ្ទះ ស្រាប់តែមានរថយន្តម៉ាកកាមរីស៊េរីឆ្នាំ១៩៩១ ពណ៌សមួយគ្រឿងបានបើកទៅឈប់នៅខាងមុខនោះបន្តិច ហើយបន្ទាប់មកបានបើកបត់៣ទៅ៤ត្រឡប់តម្រង់គូទចំទ្វារផ្ទះខាងលើ រួចបើកថយក្រោយក្នុងល្បឿនយ៉ាងលឿនបំបុកទ្វារផ្ទះនោះទាំងកំរោល បណ្តាលឱ្យបាក់ខូចខ្ទេចខ្ទី ទើបបើកចាកចេញទៅយ៉ាងលឿនដើម្បីគេចខ្លួន ។
ប្រភពដដែលបានបន្តថា ក្រោយពេលកើតហេតុបានមួយសន្ទុះ ទើបគេឃើញស្ត្រីម្ចាស់ផ្ទះចេញពីក្នុងផ្ទះនោះទៅបាត់ដែរ ដែលមើលទៅទំនងជានាងមានការភ័យខ្លាច ព្រោះនេះមិនមែនជាហេតុការណ៍គ្រោះថ្នាក់ចរាចរណ៍ដោយចៃដន្យនោះឡើយ ។
ប៉ុន្តែគេដាក់ការសង្ស័យថា វាជាចេតនាបំបុកដើម្បីព្រមានដល់ម្ចាស់ផ្ទះដែលគេសង្ស័យថា អាចបណ្តាលមកពីរឿងគំនុំស្នេហាត្រីកោណ ព្រោះម្ចាស់ផ្ទះនោះគឺជាប្រពន្ធចុង។ រីឯបុរសជាប្តីមានប្រពន្ធនិងកូនរួចទៅហើយ ។ ចំណែកការទាក់ទងគ្នារវាងស្រីក្មេងម្ចាស់ផ្ទះ និងបុរសចំណាស់នោះមានរយៈពេល២ឆ្នាំកន្លងមកហើយ ។ គេបានសន្និដ្ឋានទៀតថា ទំនងជាការទាក់ទងស្នេហាត្រីកោណ ហើយត្រូវបានស្រ្តីជាប្រពន្ធដើមដឹងសាច់រឿង ទើបជួលគេឱ្យបើករថយន្តមកបំបុកទ្វារផ្ទះដើម្បីទុកជាការព្រមាន ។
សមត្ថកិច្ចបានឱ្យដឹងថា ក្រោយពេលកើតហេតុ កម្លាំងបានចុះទៅដល់ឃើញទ្វារផ្ទះនោះរងនូវការខូចខាតខ្ទេចខ្ទីទាំងស្រុង ហើយមានម៉ូតូមួយគ្រឿងម៉ាកស្មាសរីវ៉ូ ពណ៌ខ្មៅ ស្ថិតក្នុងផ្ទះនោះ និងមិនបានឃើញម្ចាស់ស្ថិតនៅទីនោះឡើយ ។ ដោយសារខ្លាចមានជនខិលខូចឆ្លៀតឱកាសចូលលួចយកទ្រព្យសម្បត្តិនៅខាងក្នុងនោះ ទើបបូ៉លិសបានដាក់កម្លាំងការពារមួយយប់ទល់ភ្លឺ រហូតដល់ព្រឹកថ្ងៃឡើង ទើបឃើញស្ត្រីម្ចាស់ផ្ទះត្រឡប់ចូលផ្ទះវិញ និងប្រាប់ថា យប់មិញក្រោយពេលកើតហេតុ នាងបានទៅដេកនៅផ្ទះសំណាក់ ព្រោះមិនហ៊ានដេកនៅក្នុងផ្ទះនោះដោយសារខ្លាចគ្រោះថ្នាក់ដល់
ខ្លួន ៕
ចែករំលែកព័តមាននេះ