រាជធានីភ្នំពេញ ៖ ប្រភពព័ត៌មានបានឱ្យដឹងកាលពីព្រឹកថ្ងៃទី៤ មិថុនាថា កងរាជអាវុធហត្ថរាជធានីភ្នំពេញ បានចាត់បញ្ជូនសំណុំរឿងកូនប្រុសលោកប្រធានសាខាគយខេត្តកំពង់ចាម ទៅកាន់សាលាដំបូងរាជធានីភ្នំពេញជាផ្លូវការហើយ ។
រាជធានីភ្នំពេញ ៖ ប្រភពព័ត៌មានបានឱ្យដឹងកាលពីព្រឹកថ្ងៃទី៤ មិថុនាថា កងរាជអាវុធហត្ថរាជធានីភ្នំពេញ បានចាត់បញ្ជូនសំណុំរឿងកូនប្រុសលោកប្រធានសាខាគយខេត្តកំពង់ចាម ទៅកាន់សាលាដំបូងរាជធានីភ្នំពេញជាផ្លូវការហើយ ។ សំណុំរឿងនេះមាន៣បទល្មើសគឺ ១-អំពើហិង្សាដោយចេតនា ២-ធ្វើឱ្យខូចខាតដោយចេតនា និង៣-អំពើលួច បង្កឡើងដោយជនជាប់ចោទឈ្មោះ ឃុន ដូរ៉េ ភេទប្រុស អាយុជាង៣០ឆ្នាំ ជាអ្នករកស៊ី មានអាសយដ្ឋានផ្ទះលេខ28E0 ផ្លូវលេខ១១៨ សង្កាត់ផ្សារកណ្តាលទី១ ខណ្ឌដូនពេញ ។
ប្រភពព័ត៌មានបន្តថា ក្នុងសំណុំរឿងនេះមានពាក្យបណ្តឹងជនរងគ្រោះ មានរបាយការណ៍ឆ្លើយតបរបស់សមត្ថកិច្ចក្នុងការអនុវត្តដីកាបញ្ជាឱ្យចូលខ្លួនរបស់ការិយាល័យព័ត៌មានទូទៅនៃបញ្ជាការដ្ឋានកងរាជអាវុធហត្ថ និងដីកាបញ្ជាឱ្យចូលខ្លួនរបស់លោកស្រី ស៊ឺ វណ្ណនី ព្រះរាជអាជ្ញារងអមសាលាដំបូងរាជធានីភ្នំពេញ តម្រូវឱ្យឈ្មោះ ឃុន ដូរ៉េ ចូលខ្លួនទៅបំភ្លឺជូនសមត្ថកិច្ចតាមពាក្យបណ្តឹងពាក់ព័ន្ធនឹងបទល្មើសទាំង៣ខាងលើ ។
តាមពាក្យបណ្តឹងរបស់ឈ្មោះ ជៀប អូឡែន ភេទប្រុស អាយុ៤៨ឆ្នាំ ជាអ្នកបើកបររថយន្ត និងឈ្មោះ ជា គឹមឡាយ (ត្រូវជាកូនស្រី) ស្នាក់នៅផ្ទះលេខ២០២ មហាវិថីម៉ៅសេទុង សង្កាត់ទំនប់ទឹក ខណ្ឌចំការមន បានឱ្យដឹងថា កាលពីវេលាម៉ោងប្រហែល១០យប់ ថ្ងៃទី២៨ មេសា កូនស្រីឈ្មោះ ជា គឹមឡាយ បានទូរស័ព្ទប្រាប់លោកថា ឈ្មោះ ឃុន ដូរ៉េ បានវាយធ្វើបាប និងចាប់នាងដាក់ក្នុងរថយន្តរ៉ង់រ៉ូវែរ ។ ពេលទទួលបានដំណឹងនោះភ្លាម លោកនិងក្រុមគ្រួសារបានម្នីម្នាប្រញាប់ប្រញាល់ធ្វើដំណើរទៅកាន់កន្លែងកើតហេតុ ក៏ឃើញជនសង្ស័យ ឈ្មោះ ឃុន ដូរ៉េ នៅទីនោះមែនរួមជាមួយបក្សពួកច្រើននាក់ទៀត ដែលខ្លះនៅអង្គុយក្នុងរថយន្តម៉ាកហ្វដ១គ្រឿង និងខ្លះចេញមកឈរខាងក្រៅកំពុងគំរាមកូនស្រីលោក ។
ពាក្យបណ្តឹងបន្តថា ពេលនោះកូនប្រុសរបស់លោកឈ្មោះ ឡែន ង៉ែត ក៏ទៅដល់ដែរ ហើយលោកបានសួរទៅឈ្មោះ ឃុន ដូរ៉េ ថា ហេតុអ្វីបានជាធ្វើបាបនាង ជា គឹមឡាយ កូនស្រីរបស់លោក ? គ្រាន់តែសួរប៉ុណ្ណឹង ស្រាប់តែឈ្មោះ ឃុន ដូរ៉េ និងបក្សពួកបានស្ទុះមកចាប់លោក និងកូនប្រុសវាយដំ បណ្តាលឱ្យរបួសដៃ និងក្បាល ។ លុះពេលឃើញលោក និងកូនទ្រុឌទ្រោម ឈ្មោះ ឃុន ដូរ៉េ បានលូកហោប៉ៅខោលោកយកអស់ប្រាក់ចំនួន១.៦០០ដុល្លារ ថែមទាំងយកដុំថ្មវាយកម្ទេចកញ្ចក់រថយន្តកូនប្រុសលោកទៀត រួចនាំគ្នាគេចខ្លួនបាត់ ។
ប៉ុន្តែទោះជាយ៉ាងណា មនុស្សទាំងអស់នោះ និងរថយន្តត្រូវបានកត់ចំណាំអស់ហើយ ដូចជារថយន្តម៉ាករ៉ង់រ៉ូវែររបស់ឈ្មោះ ឃុន ដូរ៉េ ពណ៌ស ពាក់ស្លាកលេខភ្នំពេញ 2T-3277 និងរថយន្តម៉ាកហ្វដពណ៌ស ពាក់ស្លាកលេខ ភ្នំពេញ 2W-3277 ។ លោក ជៀប អូឡែន បានបញ្ជាក់ក្នុងពាក្យបណ្តឹងទៀតថា កូនស្រីលោកធ្លាប់មានទំនាក់ទំនងស្នេហាជាមួយឈ្មោះ ឃុន ដូរ៉េ ជាង៥ឆ្នាំហើយ តែក្រោយមកឈ្មោះ ឃុន ដូរ៉េ បានទៅរៀបការជាមួយអ្នកផ្សេង ដែលធ្វើឱ្យកូនស្រីលោកមានតែការឈឺចាប់ ។ ម្យ៉ាងទៀតឈ្មោះ ឃុន ដូរ៉េ តែងតែគំរាមកំហែងមិនឱ្យកូនស្រីលោករៀបការជាមួយប្រុសដទៃឡើយ ។
រីឯរបាយការណ៍របស់សមត្ថកិច្ចបញ្ជាក់ថា នៅវេលាម៉ោងជាង៩យប់ថ្ងៃទី២៨ មេសា ឆ្នាំ២០១៣ នាង ជា គឹមឡាយ បានទៅរាំលេងនៅក្លិបសេធូ ក្បែរក្រុមហ៊ុនស៊ុយហ្សុ៊យគី ជិតវិទ្យាល័យបាក់ទូក ក្នុងខណ្ឌ៧មករា ដែលមានមិត្តភក្តិស្រីៗ២ទៅ៣នាក់ និងបងប្អូនជីដូនមួយផង ។ ពេលនោះនាង ជា គឹមឡាយ បានហៅស្រាបៀរផឹក ប៉ុន្តែមិនទាន់បានផឹកទេ នាងក៏ចេញទៅក្រៅក្លិប ដើម្បីរង់ចាំមិត្តភក្តិពីរបីនាក់ទៀត ស្រាប់តែពេលកំពុងឈរនិយាយទូរស័ព្ទនោះ ឈ្មោះ ឃុន ដូរ៉េ ជាមនុស្សធ្លាប់ស្រឡាញ់នាងពីមុនបានទៅឆក់ទូរស័ព្ទពីដៃនាង ហើយសម្លុតសួរថា ទៅណា ? ពេលនោះនាងមិនទាន់បានឆ្លើយផង ក៏ត្រូវគូកនរបស់ឈ្មោះ ឃុន ដូរ៉េ ម្នាក់ ស្ទុះមកច្របាច់កនាង រួចស្រែកថាកុំច្រឡោតដាក់ ឃុន ដូរ៉េ ។
ដោយទំនងខ្លាចមានរឿងនៅក្លិបរបស់គេ សន្តិសុខក្លិបក៏បានដេញចេញ តែនាងបានទៅឈរអែបរថយន្តរបស់ ឃុន ដូរ៉េ មិនឱ្យបើកទៅណាទេ និងបានប្រាប់ថា ចាំជួបឪពុកម្តាយនាង និងក្រុមគ្រួសារនាងសិន តែឈ្មោះ ឃុន ដូរ៉េ នៅតែព្យាយាមបើកចេញ ។ ទោះជាយ៉ាងណា ដោយសារតែរថយន្តនោះបែកកង់ គេក៏បានឡើងជិះរថយន្តរបស់មិត្តភក្តិគេចខ្លួនបាត់ទៅមុនសមត្ថកិច្ចទៅដល់ ។
របាយការណ៍របស់សមត្ថកិច្ចបានបន្តថា ឈ្មោះ ឃុន ដូរ៉េ ធ្លាប់មានទំនាស់ជាមួយនាង ជា គឹមឡាយ ២លើកមកហើយ ដែលលើកទី១-សំណុំរឿង នៅកងរាជអាវុធហត្ថស្រុកអង្គស្នួល ខេត្តកណ្តាល និងលើកទី២-សំណុំរឿងនៅកងរាជអាវុធហត្ថលើផ្ទៃប្រទេស ប៉ុន្តែសំណុំរឿងទាំង២នេះត្រូវបានសម្រុះសម្រួលបញ្ចប់អស់ហើយ ដោយមានកិច្ចសន្យាទាំងសងខាង ។ មន្ត្រីកងរាជអាវុធហត្ថបានឱ្យដឹងថា បានជាការិយាល័យជំនាញបង្ខំចិត្តបញ្ជូនសំណុំរឿងនេះទៅកាន់សាលាដំបូងរាជធានីភ្នំពេញ មូលហេតុមកពីអស់សមត្ថភាពនិងកោះហៅ និងស្វែងរកឈ្មោះ ឃុន ដូរ៉េ ដើម្បីសាកសួរ ឬមកសម្រុះសម្រួលគ្នាជាមួយដើមបណ្តឹង ដូច្នេះទុកពេលឱ្យសមត្ថកិច្ចតុលាការចាត់ការតាមផ្លូវច្បាប់តែម្តង ៕
ចែករំលែកព័តមាននេះ