ខេត្តព្រះសីហនុ ៖ នៅក្នុងឱកាសបវេសនកាលឆ្នាំសិក្សា២០១៨-២០១៩ ឈានចូលមកដល់ មាតា-បិតា អាណាព្យាបាលសិស្សជាច្រើនអ្នក ដែលនាំកូនមកចុះឈ្មោះចូលរៀននៅសាលាបឋមសិក្សាសាគូរ៉ា មិត្តភាពកម្ពុជា-ជប៉ុន ដែលមានទីតាំងស្ថិតនៅក្បែរផ្សារទំនប់រលកចាស់ក្នុងមណ្ឌល០៣ សង្កាត់លេខ០១ ក្រុង.ខេត្តព្រះសីហនុ បានសម្តែងការហួសចិត្ត និងអាសូរសាលា ខណ:ដែលពួកគាត់បានជូនកូន-ចៅទៅចុះឈ្មោះឲ្យចូលរៀននៅសាលាខាងលើហើយឃើញទីធ្លាសាលាមានស្មៅដុះស្ទើរតែគ្របលិចសាលាទៅហើយ និងនៅតាមបន្ទប់រៀននីមួយៗមិនមានការសម្អាត ដើម្បីរៀបចំទទួលសិស្សឲ្យចូលរៀននាថ្ងៃទី០១ ខែវិច្ឆិកា ឆ្នាំ២០១៨ ដែលជាថ្ងៃបើកបវេសនកាល ត្រូវឈានចូលមកដល់។
ប្រភពខាងលើបានធ្វើការរិះគន់ត្រង់ៗទៅលើថ្នាក់ដឹកនាំសាលាបឋមសិក្សាខាងលើ ប្រធាន និងអនុប្រធាន ការិយាល័យអប់រំ យុវជន និងកីឡាក្រុងព្រះសីហនុ ជាពិសេសលោកប្រធានមន្ទីរអប់រំ យុវជន និងកីឡាខេត្ត ដែលធ្វេសប្រហែសបណ្តែតបណ្តោយឲ្យបុគ្គលិក និងថ្នាក់ដឹកនាំនៅក្រោមឱវាទសាលាខាងលើ ខ្វះការទទួលខុសត្រូវក្នុងការសម្អាតទីធ្លាក្នុងបរិវាណសាលាទុកចោលឲ្យស្មៅដុះទ្រុបទ្រុល ក្លាយទៅជាជម្រកមូសខ្លា និងជម្រកសត្វអសិរពិសបាត់បង់សោភ័ណ្ឌភាព បរិស្ថាន និងអនាម័យរបស់សិស្សានុសិស្សដែលត្រូវមកចូលរៀននៅក្នុងថ្ងៃបវេសនកាលឆ្នាំសិក្សាថ្មី។
តាមការឲ្យដឹងពីមាតា-បិតា អាណាព្យាបាលសិស្សថា សាលាខាងលើ គឺជាអំណោយដ៏ថ្លៃថ្លារបស់រដ្ឋាភិបាលប្រជាជននៃប្រទេសជប៉ុនជាអ្នកសាងសង់ឲ្យ ដោយហេតុថាប្រទេសជាមិត្តគេមើលឃើញពីកង្វះខាតសាលារៀននៅមូលដ្ឋានខាងលើ ស្របពេលដែលកំណើនសិស្សពីមួយឆ្នាំទៅមួយឆ្នាំមានការកើនឡើងជាលំដាប់។
ពួកគាត់បានបន្តឲ្យដឹងទៀតថា ទន្ទឹមនឹងសមិទ្ធផលដែលប្រទេសជាមិត្តបានខិតខំពុះពារការលំបាកចំណាយទាំងកម្លាំងកាយ និងថវិការដ៏សន្ធឹកសន្ធាប់កសាងបានឲ្យសិស្សានុសិស្សចូលរៀន ហើយយើងជាបុគ្គលិក និងថ្នាក់ដឹកនាំគ្រប់លំដាប់ថ្នាក់នៅក្នុងសាលាខាងលើ ជាពិសេសអស់លោកថ្នាក់ដឹកនាំការិយាល័យអប់រំ រហូតដល់លោកប្រធានមន្ទីរអប់រំ យុវជន និងកីឡាខេត្ត គួរតែយកចិត្តទុកដាក់ក្នុងការថែទាំឲ្យបានល្អរប្រសើរ ដើម្បីទុកជាសម្បត្តិជាតិយើងនិងជាថ្នាលបណ្តុះគ្រប់ពូជនៃធនធានមនុស្សដល់ក្មេងៗជំនាន់ក្រោយដែលជាទំពាំងស្នងឬស្សីក្នុងការដឹកនាំអភិវឌ្ឍន៍ប្រទេសជាតិយើង។
ពួកគាត់ឱ្យដឹងទៀតថា ចុះបើទីតាំងថ្នាលបណ្តុះគ្រប់ពូជខាងលើក្លាយទៅជាជម្រកមូសខ្លា និងជម្រកសត្វអសិរពិស និងនៅលើគំនរសំរាមទៅហើយ តើផ្នត់គំនិតដែលសិស្សានុសិស្សមកក្រេបយកនៅក្នុងសោភ័ណ្ឌភាពបរិស្ថានកខ្វក់បែបនេះនិងទៅជាយ៉ាងណា…? មានតែទ្រាំទៅតាមយថាកម្មទេ កូនៗរបស់ពួកគាត់។
មន្ត្រីរាជការនៅក្នុងសាលាខេត្តម្នាក់ក្នុងលក្ខខណ្ឌសុំមិនបង្ហាញអត្តសញ្ញាណ បានលើកឡើងថា កន្លងមក លោកបានដឹកនាំក្រុមគ្រូពេទ្យស្ម័គ្រចិត្តព្យាបាលជំងឺមិនបង់ប្រាក់នៃជនជាតិបរទេស បានកំណត់យកទីតាំងសាលាខាងលើក្នុងការដាក់ប៉ុស្តិ៍បណ្តោះអាសន្ន ដើម្បីព្យាបាលជំងឺជូនប្រជាពលរដ្ឋក្នុងមូលដ្ឋានដែលនៅជិតទីតាំងសាលា។
គាត់បានបន្តទៀតថា រូបគាត់មានការខកចិត្ត និងមានភាពអៀនខ្មាសជាមួយក្រុមគ្រូពេទ្រស្ម័គ្រចិត្តយ៉ាងខ្លាំង ខណៈបានឃើញទិដ្ឋភាពនៅក្នុងបរិវេណទីធ្លាសាលារៀនខាងលើពោរពេញទៅដោយព្រៃស្មៅ និងគំនរសម្រាម ? ទ្វារសាលារៀនរងការបែកបាក់នៅលើដំបូលសាលារំលេចទៅដោយសំបកដបទឹកសុទ្ធ (ផ្លាស្ទីក) ដែលជាការបញ្ជាក់ពីភាពមិនមានការទទួលខុសត្រូវពីគណ:គ្រប់គ្រងលើវិស័យខាងលើបន្តិចណាទាល់តែសោះ។
ជាចុងក្រោយគាត់បានសំណូមពរដល់គ្រប់គ្រឹះស្ថានសិក្សាទាំងរដ្ឋ និងវិស័យឯកជនសុំកុំយកគំរូតាមសាលាខាងលើ ដែលនាំឲ្យជះឥទ្ធិពលមិនល្អរដល់វិស័យអប់រំ ដែលបច្ចុប្បន្នក្រសួងអប់រំ យុវជន និងកីឡា ក៏ដូចជាប្រមុខរាជរដ្ឋាភិបាលកំពុងយកចិត្តទុកដាក់ និងលើកតម្កើងដោយចាត់ទុកថា ជាវិស័យចំបងក្នុងការបណ្តុះបណ្តាលនូវធនធានមនុស្សសម្រាប់ជាទុនក្នុងការអភិវឌ្ឍន៍សេដ្ឋកិច្ចជាតិ។
ចែករំលែកព័តមាននេះ