បញ្ហាអាកាសធាតុក្តៅហួតហែងរហួតសឹងក្លាយជារលកកម្តៅដ៏សែនក្តៅ កំពុងវាយប្រហារពិភពលោក រួមទាំងប្រទេសកម្ពុជាផងដែរ ដោយសារតែរលកកម្តៅនៅទីតាំងខ្លះ មានចន្លោះពី៤០អង្សាសេ ទៅ ៤២អង្សាសេ ពិសេសចន្លោះម៉ោងជិត១១ថ្ងៃ រហូតម៉ោង៣រសៀល ។…
បញ្ហាអាកាសធាតុក្តៅហួតហែងរហួតសឹងក្លាយជារលកកម្តៅដ៏សែនក្តៅ កំពុងវាយប្រហារពិភពលោក រួមទាំងប្រទេសកម្ពុជាផងដែរ ដោយសារតែរលកកម្តៅនៅទីតាំងខ្លះ មានចន្លោះពី៤០អង្សាសេ ទៅ ៤២អង្សាសេ ពិសេសចន្លោះម៉ោងជិត១១ថ្ងៃ រហូតម៉ោង៣រសៀល ។
អាកាសធាតុកាន់តែក្តៅសិស្សសាលាតូចៗ និងមនុស្សចាស់ជរា ប្រឈមហានិភ័យសុខភាពខ្លាំងជាងគេរហូតនៅតាមសាលារៀនមួយចំនួនលោកគ្រូអ្នកគ្រូចាប់ផ្តើមនូវវិធានការចាំបាច់ៗមួយចំនួនដូចសាលាខ្លះបាញ់ដំបូងសាលាអោយត្រជាក់ និងកន្លែងខ្លះទៀតក៏លោកគ្រូ អ្នកគ្រូណែនាំសិស្សតូចៗស្អំក្បាលនឹងកន្សែងត្រជាក់ជាដើម ។
ថ្មីៗនេះទៀតសោត ជាការឆ្លើយតបនឹងបញ្ហាអាកាសធាតុក្តៅហួតហែងនោះ សាលាមួយកន្លែងដែលហាក់មានបញ្ហាកម្តៅក្តៅខ្លាំងពេក លោកគ្រូសម្រេចចិត្តបូមទឹកបញ្ចូលថ្នាក់រៀនពេញប្រៀប ដើម្បីធ្វើអោយបរិយាកាសក្នុងថ្នាក់រៀនមានស្ថានភាពកម្តៅថមថយ ដើម្បីជួយដល់កូនសិស្សនានា ។
ជាការពិតណាស់ ដូចបានជម្រាបជូនខាងលើ នៅសាលារៀនមួយកន្លែងបានអនុវត្តន៍វិធានខុសៗគ្នា ពោលធ្វើយ៉ាងណាកាត់បន្ថយកម្តៅ ខណៈនៅតំបន់ខ្លះកម្តៅបានហក់ឡើងដល់៤០អង្សាសេ ឬ៤១អង្សា ឬតំបន់ខ្លះទៀតឈានដល់៤២អង្សាសេជាដើមនោះ ដូច្នេះសាលាបានអោយសិស្សអនុវត្តវិធានការបែបនេះ ។
តាមរយៈរូបភាព២សន្លឹក ដែលបងប្អូនបានចាប់អារម្មណ៍នោះ ទី១ ការបូបទឹកបញ្ចូលថ្នាក់ ដោយលោកគ្រូបានឡើងថា « យើងមិនអាចហាមព្រះអាទិត្យមិនអោយបញ្ចេញកម្តៅបានទេ តែយើងអាចរកវិធីកាត់បន្ថយកម្តៅបានខ្លះៗងាយៗ »។ ទី២ វិធានការអោយសិស្សយកកន្សែងស្អំក្បាល ដើម្បីកាត់បន្ថយការឡើងកម្តៅជាដើម ។
គួរបញ្ជាក់ដែរថា វិធានការទាំងពីរកំពុងមានការចាប់អារម្មណ៍ខ្លាំង ក្រោយនៅតាមបណ្តាញសាលាជាច្រើនបានអនុវត្តវិធានខុសគ្នា ដោយនៅខេត្តសៀមឯណោះវិញ ក៏មានការបញ្ចេញឡានទឹក ដោយធ្វើការបាញ់នៅលើអគារ ដើម្បីបញ្ចុះកម្តៅជាដើមនោះ ។
តាមរយៈបទសម្ភាសន៍ជាមួយសារព័ត៌មានកោះសន្តិភាព លោក ប៊ិន សិទ្ធ ដែលជាគណៈគ្រប់គ្រងបានជម្រាបថា នៅសាលាបឋមសិក្សាគោកព្នៅ មានការបូមទឹកបញ្ចូលថ្នាក់នេះ ដោយហេតុថា អាកាសធាតុប្រែប្រួលក្តៅខ្លាំង ម្ល៉េះហើយលោកគ្រូសម្រេចចិត្តធ្វើបែបនេះ ព្រោះថា ត្រឹមបាញ់ទឹកនៅបរិណសាលានោះ វាមិនត្រជាក់បានយូរនោះទេ យ៉ាងច្រើនសើមបាន១០ទៅ២០នាទី ។ ចំពោះការបូមទឹកបញ្ចូលថ្នាក់រៀនលោកគ្រូយល់ថា ធ្វើអោយថ្នាក់រៀនត្រជាក់បានយូរ ណាមួយកាត់បន្ថយបានច្រើន ហើយក្នុងនោះលោកគ្រូក៏មានវិធានការជាច្រើនទៀត ជួយដល់កុមារ ដោយណែនាំពួកគាត់អោយងូតទឹកអោយបានញឹកញាប់ ញុំាទឹកអោយបានច្រើន ស្លៀកសម្លៀកបំបាក់ធូររលុង ជាពិសេសញុំាអាហារណាដែលល្អ ពុំសូវមានជាតិផ្អែមខ្លាំង ។
លើសពីនេះ គណគ្រប់គ្រងលោក ប៊ិន សិទ្ធ បន្ថែមថា ត្រូវរក្សាអនាម័យ ក្នុងកាលដែលឡើងកម្តៅនេះ ព្រោះរយៈពេលនៃការកើនឡើងកម្តៅនេះ លោកសង្កេតឃើញថា សិស្សមានបញ្ហាប្រឈមច្រើន ខ្លះក្តៅខ្លួន ឈឺក្បាល រាករុះ និងបញ្ហាជាច្រើនទៀត ។
ដូចច្នេះ ជាចុងក្រោយ លោក ប៊ិន សិទ្ធ ដែលជាគណៈគ្រប់គ្រងនៃ សាលាបឋមសិក្សាគោកព្នៅ ដែលស្ថិតក្នុងភូមិគោកព្នៅ ឃុំដូនកែ ស្រុកពួក ខេត្តសៀមរាប សូមអោយលោកគ្រូអ្នកគ្រូទាំងអស់មេត្តាតាមដានកូនសិស្សអោយបានល្អ ព្រោះក្នុងរដូវនេះឃើញថា សិស្សមានការឈឺថ្កាត់ច្រើន ។
បើងាកមកសាលារៀនដែលអោយកូនសិស្សយកកន្សែងស្អំក្បាល ដើម្បីកាត់បន្ថយ ការឡើងកម្តៅវិញ ក៏ជារូបភាពមួយដែលទាក់ទាញខ្លាំង ដោយលោកគ្រូបានលើកឡើងសំណេរថា « យោងតាមអាកាសធាតុក្តៅខ្លាំង នាយកសាលាបឋមសិក្សាគំរូស្រុកមង្គលបូរី សូមអំពាវនាវដល់មាតាបិតាសិស្សទាំងអស់ មេត្តាដាក់កន្សែងពោះគោតូចល្មមទុកឲ្យកូនជ្រលក់ទឹកស្អំ ពេលមករៀន ដើម្បីកាត់បន្ថយកម្តៅ និងណែនាំកូនៗញ៉ាំទឹកឲ្យបានច្រើន ។ សូមអរគុណ! »។
តាមរយៈបទសម្ភាសន៍ជាមួយសារព័ត៌មានកោះសន្តិភាព នាយកសាលាបឋមសិក្សាគំរូស្រុក លោកគ្រូ ដៀប វិចិត្រតារា និយាយថា មូលហេតុ ដែលឱ្យសិស្សយកកន្សែងពោះគោមកសាលារៀន ដើម្បីស្អំក្បាល ដោយសារជួយឱ្យត្រជាក់អាចអង្គុយរៀនបាន ។ ក្នុងនោះលោកបានណែនាំសិស្សទាំងអស់កុំដើរលេងនៅបរិវេណខាងក្រៅ ឬរត់លេងហាលថ្ងៃ ដូច្នេះត្រូវញ៉ាំទឹកឱ្យបានច្រើន ដើម្បកាត់បន្ថយការឡើងកម្តៅក្នុងខ្លួន និងបញ្ចៀសជម្ងឺផ្សេងៗ ខណៈពេលអាកាសធាតុក្តៅខ្លាំងដូច្នេះ ។
លោកគ្រូ វិចិត្រតារាដែលជានាយក សាលាបឋមសិក្សាគំរូស្រុក ដែលមានទីតាំងស្ថិតនៅ ក្នុងភូមិឬស្សីក្រោក ឃុំឬស្សីក្រោក ស្រុកមង្គលបូរី ខេត្តបន្ទាយមានជ័យ បន្តថា នៅពេលក្តៅខ្លាំងដូច្នេះ កូនសិស្សរបស់លោកមួយចំនួន មានអាក្ការៈឈឺក្បាល ខ្លះឈាមច្រមុះ និងខ្លះទៀតមិនចង់រៀនជាដើម ។
តាមការបង្ហើបរបស់លោកគ្រូបន្តថា នៅសាលាលោកគ្រូផ្ទាល់ មិនតែអនុវត្តនូវវិធានការយកកន្សែងពោះគោ ដើម្បីស្អំក្បាលអោយបញ្ចុះកម្តៅប៉ុណ្ណោះទេ ក៏មានការបាញ់ទឹកនៅខាងមុខសាលារៀន នៅជុំវិញថ្នាក់ដើម្បីកាត់បន្ថយការឡើងកម្តៅ និងកង្ហារទៀតផងនោះ ដូច្នេះសិស្សអាចនឹងមានភាពថមថយចំពោះការឡើងកម្តៅនេះ ។
ក្រោយមានការឡើងកម្តៅបែបនេះ លោកគ្រូ ដៀប វិចិត្រតារា សូមផ្តាំដល់សាលារៀនទាំងអស់ សូមយកចិត្តទុកដាក់ រកវិធានការបែបណា ជួយសិស្ស ដើម្បីបន្តការរៀន និងបង្រៀនដូចធម្មតា និងចូលរួមដាំដើមឈើឱ្យបានច្រើនក្នុងសាលារៀន ។
បើមកមើលសាលាបឋមសិក្សាវត្តបូព៌ដែលមានទីតាំងស្ថិតនៅវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាបឯណោះវិញ ក៏មានយកចិត្តទុកដាក់ពីគណគ្រប់គ្រងផងដែរ ដោយសាលមួយកន្លែងនេះបានបាញ់ទឹកលើដំបូលសាលាអោយសិស្សដោយបង្ហោះក្នុងបណ្តាញសង្គមថា « គណៈគ្រប់គ្រងសាលាបឋមសិក្សាវត្តបូព៌ សូមគោរពថ្លែងអំណរគុណដល់ អភិបាលនៃគណៈអភិបាលខេត្ត និងថ្នាក់ដឹកនាំគ្រប់ជាន់ថ្នាក់ ជាពិសេសការិយាល័យបង្ការ និងពន្លត់អគ្គិភ័យ នៃស្នងការដ្ឋានខេត្តសៀមរាប ដែលបានជួយឡានទឹកចំនួន ៦ ឡានមកបាញ់ទឹកនៅជុំរិញបរិវេណសាលា ដើម្បីជាចំណែកកាត់បន្ថយនៅការកើនឡើងកម្តៅបានមួយកម្រិត ។ នៅរសៀលថ្ងៃទី៣០ ខែមេសា ឆ្នាំ២០២៤៕ ដោយ៖លីហួ គីមឆាយ
ចែករំលែកព័តមាននេះ