រាជធានីភ្នំពេញ ៖ អ្នកភូមិម្នាក់បានដាំបាយនៅលើផ្ទះរបស់ខ្លួន ហើយបានជ្រុះភ្លើងកន្ទុយអុសធ្លាក់លើស្មៅ និងព្រៃទៅក្នុងដីឡូត៌ទំនេរមួយកន្លែ ដែលស្ថិតនៅជាប់ផ្ទះគាត់នោះបង្កឲ្យមានការឆាបឆេះសន្ធោសន្ធៅតែម្ដង ។
ពេលនោះអាជ្ញាធរ និងសមត្ថកិច្ច ព្រមទាំងកម្លាំងប្រជាការពារបានចេញទៅអន្តរាគមន៍ព្រមទាំងរាយការណ៍ជូនក្រុមអ្នកពន្លត់អគ្គិភ័យឲ្យជួយនាំយករថយន្តពន្លត់អគ្គិភ័យចំនួន២គ្រឿងទៅបាញ់ពន្លត់ទើបរលត់ទៅវិញទាំងស្រុង ។ ហេតុការណ៍នេះបានកើតឡើងកាលពីវេលាម៉ោង៣និង៣៥នាទី រសៀលថ្ងៃទី០១ ខែសភា ឆ្នាំ២០២៤ នៅក្នុងដីឡូត៌ទំនេរមួយកន្លែង ស្ថិតនៅតាមបណ្តោយផ្លូវលំ ក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
សមត្ថកិច្ចបានឲ្យដឹងថា នៅមុនពេលកើតមានអ្នកភូមិម្នាក់ ដែលមានផ្ទះនៅជាប់ដីឡូត៌ខាងលើនោះ បានដាំបាយនៅលើផ្ទះដោយគាត់បានប្រើចង្ក្រាន្តដុតអុស ខណៈនោះស្រាប់តែភ្លើងកន្ទុយអុសបានជ្រុះធ្លាក់ទៅលើស្មៅ និងព្រៃនៅក្នុងដីឡូត៌ជាប់ផ្ទះគាត់នោះ ។ ទើបបង្កឲ្យមានការឆាបឆេះសន្ធោសន្ធៅតែម្ដង ជាហេតុធ្វើឲ្យមានការភ្ញាក់ផ្អើលយ៉ាងខ្លាំង ហើយភ្លាមៗនោះ កម្លាំងអាជ្ញាធរ និងសមត្ថកិច្ចខណ្ឌពោធិ៍សែនជ័យ ព្រមទាំងប៉ុស្តិ៍សំរោងក្រោម និងកម្លាំងប្រជាការពារបានចេញទៅអន្តរាគមន៍ ។
ប្រភពដដែលបានប្រាប់ឲ្យដឹងថា បន្ទាប់មកដោយសារមើលឃើញស្ថានភាពមិនអាចពន្លត់បានទើបរាយការណ៍ជូនក្រុមអ្នកពន្លត់អគ្គិភ័យ ដើម្បីឲ្យជួយ ព្រោះមានការព្រួយបារម្ភខ្លាចឆេះរាលដល់ផ្ទះអ្នកភូមិ ។
ក្រោយមកក៏មានរថយន្តពន្លត់អគ្គិភ័យចំនួន២គ្រឿង ចេញទៅបាញ់ពន្លត់ រហូតភ្លើងរលត់ទៅវិញទាំងស្រុង ទន្ទឹម នោះអាជ្ញាធរក៏បានណែនាំដល់ប្រជាពលរដ្ឋមានការប្រុងប្រយ័ត្នខ្ពស់ចំពោះគ្រោះអគ្គិភ័យដែលតែងតែកើតឡើងនៅពេលមានការធ្វេសប្រហែស ៕
ចែករំលែកព័តមាននេះ