ពួកបាតុករដែលចាប់តាំងពី៥ថ្ងៃមកហើយធ្វើបាតុកម្មប្រឆាំងនាយករដ្ឋមន្ត្រីតួកគី លោករីសេប អ័រដូហ្គាន នោះកាលពីយប់ថ្ងៃទី៤ មិថុនា បានវិលត្រឡប់មកធ្វើការតវ៉ាប្រឆាំងទៀតនៅតាមដងវិថីនៃក្រុងអីុស្តង់ប៊ុល និងក្រុងអង់ការ៉ា ដោយមានអ្នកចូលរួមរបស់មនុស្សជាច្រេើនពាន់នាក់ ទោះបីមានការសុំទោសរបស់រដ្ឋាភិបាលដល់បណ្តាជនរងគ្រោះដោយសារអំពើព្រៃផ្សៃរបស់ប៉ូលិសក្តី។
ប្រឈមមុខនឹងពួកបាតុករ ប៉ូលិសតួកគីកាលពីយប់ថ្ងៃទី៤មកទី៥ មិថុនា បានប្រើប្រាស់ឧស្ម័នបង្ហូរទឹកភ្នែក និងកាណុងបាញ់ទឹកប៉ុនប៉ងបំបែកពួកគេ ។
យោងតាមម៉ាស៊ីនឃោសនាក្នុងស្រុកថា ពួកអ្នកតវ៉ាប៉ុនប៉ងលើកគ្នាឆ្ពោះទៅកាន់ខុទ្ទកាល័យរបស់នាយករដ្ឋមន្ត្រីក្នុងទីក្រុងទាំង២នោះ ដោយធ្វើមិនដឹងមិនឮចំពោះកម្លាំងប៉ូលិសដែលគំរាមពីបទបញ្ជាឱ្យបំបែកពួកគេ ។ កាលពីថ្ងៃទី៤ មិថុនា ក្រោយរាត្រីនៃអំពើហិង្សាកំណត់ពីការស្លាប់បាតុករទី២ម្នាក់ទៀតមក ឧបនាយករដ្ឋមន្ត្រីតួកគី លោក BULENT ARINC ប៉ុនប៉ងបញ្ឈប់ចលនាតវ៉ាដោយចាត់ទុកថា ស្របច្បាប់ចំពោះការទាមទារទាំងឡាយរបស់ពួកអ្នកការពារបរិស្ថាន ជាប្រភពនៃចលនារំជើបរំជួលទាំងនេះ ហើយស្នើដល់ពួកអ្នកមិនសប្បាយចិត្តឱ្យស្ថិតនៅផ្ទះ ឈប់ធ្វើបាតុកម្មទៀត ។
ខុសពីភាសាម៉ឺងម៉ាត់របស់ប្រមុខរដ្ឋាភិបាលដែលពេលនេះកំពុងបំពេញទស្សនកិច្ចនៅអាហ្វ្រិករហូតដល់ថ្ងៃទី៦ មិថុនា លោកARINC បានថ្លែងសុន្ទរកថាដោយប្រើពាក្យបង្រួបបង្រួម។ ពេលចេញពីប្រជុំជាមួយប្រធានាធិបតីលោកអាប់ឌុលឡាហ៍ ហ្គុសមក ដំបូងលោក ARINC បានសុំទោសចំពោះអ្នករបួសជាច្រើននាក់ លើកលែងតែពួកអ្នកធ្វើសកម្មភាពបង្កការបំផ្លិចបំផ្លាញនៅតាមវិថីទាំងឡាយ ហើយប៉ុនប៉ងបំផ្លាញសេរីភាពរបស់អ្នកដទៃ ៕
ចែករំលែកព័តមាននេះ