រាជធានីភ្នំពេញ ៖ កម្លាំងនគរបាលព្រហ្មទណ្ឌកម្រិតស្រាលបានធ្វើការស្រាវជ្រាវរកឃើញជនសង្ស័យវ័យក្មេងម្នាក់លួចរថយន្តម៉ាកហាយឡេនឌ័រយកមកផ្ញើចោលនៅក្បែរមន្ទីរពេទ្យអង្គឌួង បង្កឲ្យមានការភ្ញាក់ផ្អើល កាលពីវេលាម៉ោង៧និង៣០នាទីយប់ ថ្ងៃទី៣០ ខែតុលា ឆ្នាំ២០១៨ តាមបណ្តោយផ្លូវ១១៨ កែងផ្លូវព្រះនរោត្តម នៅចំណុចក្បែរនឹងស្តុបអង្គឌួង ស្ថិតនៅក្នុងសង្កាត់ផ្សារចាស់ ខណ្ឌដូនពេញ ។
ជនសង្ស័យដែលឃាត់ខ្លួនបានមានឈ្មោះ សម្ផស្ស ភេទប្រុស អាយុ១៦ឆ្នាំ មុខរបរជាអ្នករត់ម៉ូតូកង់បី ស្នាក់នៅមិនពិតប្រាកដ ។ ចំណែកឯជនរងគ្រោះជាម្ចាស់រថយន្តមានឈ្មោះ សុខ គា ភេទប្រុស អាយុ៣០ឆ្នាំ មុខរបរជាអ្នកបើករថយន្តតាក់ស៊ី ស្នាក់នៅម្តុំផ្សារសាំហាន់ សង្កាត់ទួលសង្កែទី១ ខណ្ឌឬស្សីកែវ ។
តាមប្រភពព័ត៌មានពីជនរងគ្រោះបានរៀបរាប់ឲ្យដឹងថា មុនពេលកើតហេតុម៉ោង១១យប់ ថ្ងៃទី២៧ ខែតុលា ឆ្នាំ២០១៨ គាត់បានឈប់រថយន្តនៅមុខបន្ទប់ជួលរបស់គាត់ ស្រាប់តែលេចមុខជនសង្ស័យម្នាក់មិនស្គាល់អត្តសញ្ញាណបានធ្វើសកម្មភាពលួចយករថយន្តរបស់គាត់ម៉ាកហាយឡេនឌ័រ ពណ៌ខ្មៅ ប៉ុន្តែបិទពណ៌ស ពាក់ស្លាកលេខភ្នំពេញ 2M5759 យកទៅបាត់ ដោយសុវត្ថិភាព រួចហើយជនរងគ្រោះក៏បានទៅដាក់ពាក្យបណ្តឹងនៅប៉ុស្តិ៍ទួលសង្កែទី១ និងទៅដាក់ពាក្យបណ្តឹងនៅការិយាល័យព្រហ្មទណ្ឌកម្រិតស្រាល ដើម្បីឲ្យពួកគាត់ស្រាវជ្រាវ ។ លុះដល់យប់ថ្ងៃទី៣០ ខែតុលា គាត់បានជិះម៉ូតូដើររកមកដល់ផ្លូវ១១៨ កែងផ្លូវព្រះនរោត្តមបានប្រទះឃើញកន្លែងផ្ញើម៉ូតូនឹងរថយន្តនៅក្បែរមន្ទីរពេទ្យ អង្គឌួង គាត់ក៏បានចុចតេឡេទៅស្រាប់តែចំរថយន្តរបស់គាត់ ប៉ុន្តែត្រូវបានជនសង្ស័យដោះដូរដាក់ស្លាកលេខរថយន្តក្លែងក្លាយ 2AH -1637 ទើបកម្លាំងព្រហ្មទណ្ឌកម្រិតស្រាលបានស្រាវជ្រាវទៅរកចាប់ជនល្មើសទៅដល់មុខសណ្ឋាគាររ៉ូយ៉ាល់យកមកកន្លែងកើតហេតុវិញ ។
ក្រោយពេលកើតហេតុកម្លាំងព្រហ្មទណ្ឌកម្រិតស្រាលនៃសង្នការដ្ឋានរាជធានីភ្នំពេញបានកសាងសំណុំរឿងជនសង្ស័យទៅកាន់តុលាការ ដើម្បីធ្វើតាមនីតិវិធី ៕
ចែករំលែកព័តមាននេះ