រាជធានីភ្នំពេញ ៖ សាលាតូរ្យតន្ដ្រីស៊ីមហ្វូនីបានរៀបចំការប្រគំតន្ដ្រីជាលើកទី៣ និងពិព័រណ៍សិល្បៈគំនូរនៃសិស្សរបស់ខ្លួន កាលពីថ្ងៃទី២ មិថុនា ឆ្នាំ២០១៣ នៅសណ្ឋាគារអាំងទែរកុងទីណង់តាល់ ក្រោមវត្ដមានរបស់លោកសោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ កញ្ញា Sharon I-hsuan Chang នាយិកាសាលា និងលោកស្រី Rachel Hiskins គ្រូបង្រៀនផ្នែក
រាជធានីភ្នំពេញ ៖ សាលាតូរ្យតន្ដ្រីស៊ីមហ្វូនីបានរៀបចំការប្រគំតន្ដ្រីជាលើកទី៣ និងពិព័រណ៍សិល្បៈគំនូរនៃសិស្សរបស់ខ្លួន កាលពីថ្ងៃទី២ មិថុនា ឆ្នាំ២០១៣ នៅសណ្ឋាគារអាំងទែរកុងទីណង់តាល់ ក្រោមវត្ដមានរបស់លោកសោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ កញ្ញា Sharon I-hsuan Chang នាយិកាសាលា និងលោកស្រី Rachel Hiskins គ្រូបង្រៀនផ្នែកសិល្បៈគំនូរ ។
កម្មវិធីដែលប្រារព្ធធ្វើឡើងរយៈពេលជាង៣ម៉ោងនេះគឺមានការប្រគំតន្ដ្រីបែបក្លាស៊ិក ដោយប្រើឧបករណ៍ព្យ៉ាណូ សូឡូ ព្យ៉ាណូដៃបួន វីយូឡុង ឆេឡូ និងព្យ៉ាណូលក្ខណៈជាក្រុម ។ ការប្រគំតន្ដ្រីបែបទាន់សម័យ ដោយលេងព្យ៉ាណូ ហ្គីតាអេឡិចត្រូនិក ហ្គីតាបាស ស្គរ និងយូកូលីលី ។ការប្រគល់វិញ្ញាបនបត្រដល់សិស្សបានធ្វើឡើងនាឱកាសនោះ ។
លោកសោម សុគន្ធ មានប្រសាសន៍ថា ក្រោយសង្គ្រាមរាប់ទសវត្សរ៍ និងដោយសារការប្រឹងប្រែងយ៉ាងខ្លាំងរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី សន្ដិភាពពេញលេញកំពុងតែផ្ដល់នូវផ្លែផ្កាលើគ្រប់វិស័យ ជាអាទិ សាលាតូរ្យតន្ដ្រីស៊ីមហ្វូនីបានចាប់បើកដំណើរការតាំងពីខែមិថុនា ឆ្នាំ២០១០ ដែលជាសាលាបណ្ដុះបណ្ដាលតូរ្យតន្ដ្រីឯកជនដំបូងបង្អស់នៅក្នុងព្រះរាជាណាចក្រកម្ពុជា និងមានការគាំទ្រពីក្រសួងវប្បធម៌ និងវិចិត្រសិល្បៈ ។
សាលាស៊ីមហ្វូនីបានអនុវត្ដកម្មវិធីតាមបែបបទមហាវិទ្យាល័យតូរ្យតន្ដ្រី Trinity Guildhall នៃចក្រភពអង់គ្លេស ព្រមទាំងមានការចូលរួមជួយជ្រោមជ្រែងសហការពីមហាវិទ្យាល័យតូរ្យតន្ដ្រីនៃសាកលវិទ្យាល័យភូមិន្ទវិចិត្រសិល្បៈ ។ ជាលទ្ធផលក្នុងរយៈពេល៣ឆ្នាំកន្លងទៅនេះមានការគាំទ្រពីមាតាបិតា ក៏ដូចជាសិស្សានុសិស្សដោយបានចុះឈ្មោះចូលរៀនឧបករណ៍តន្ដ្រី និងសិល្បៈគំនូរកើនឡើងគួរឱ្យកត់សម្គាល់ ។ គួបផ្សំសកម្មភាពរបស់សាលាដែលខិតខំបង្កើតព្រឹត្ដិការណ៍ជាបន្ដបន្ទាប់ ដូចជាការប្រគំតន្ដ្រី សិក្ខាសាលា ដោយមានការចូលរួមពីក្រុមតន្ដ្រីមកពីបរទេស និងសាកលវិទ្យាល័យភូមិន្ទវិចិត្រសិល្បៈក្នុងគោលបំណងដើម្បីចែករំលែកបទពិសោធន៍ដ៏ប៉ិនប្រសប់ពីគ្នាទៅវិញទៅមក គឺជាការចាំបាច់ដែលសាលាគួរតែយកចិត្ដទុកដាក់ធ្វើជាប្រចាំ ។ ទាំងនេះគឺជាឱកាសសិក្សាស្វែងយល់ធ្វើឱ្យសតិ និងបញ្ញាស្មារតីរបស់បុត្រធីតាកាន់តែរឹងប៉ឹង និងអភិវឌ្ឍន៍យ៉ាងឆាប់រហ័ស ។
លោករដ្ឋលេខាធិការបានសម្ដែងក្ដីសង្ឃឹមយ៉ាងមុតមាំថា សិស្សដែលខិតខំរៀននៅក្នុងសាលាតូរ្យតន្ដ្រីនេះនឹងក្លាយទៅជាអ្នកដែលមានទេពកោសល្យជំនាញពិតប្រាកដក្នុងការរួមចំណែកលើកស្ទួយសិល្បៈតូរ្យតន្ដ្រី និងគំនូរក្នុងប្រទេសកម្ពុជាឱ្យកាន់តែរីកចម្រើន ។ ក្នុងនាមក្រសួង លោកសម្ដែងការលើកទឹកចិត្ដឱ្យសាលាខិតខំពង្រីកការផ្សព្វផ្សាយតម្លៃនៃការអប់រំពីតន្ដ្រី និងសិល្បៈគំនូរនៅក្នុងព្រះរាជាណាចក្រកម្ពុជា កាន់តែទូលំទូលាយ ត្រឹមត្រូវតាមស្ដង់ដាអន្ដរជាតិដល់ក្មេងកម្ពុជាជំនាន់ក្រោយ និងដើម្បីក្លាយជាធនធានមនុស្សដ៏សំខាន់សម្រាប់គ្រួសារ និងប្រទេសជាតិទៅថ្ងៃអនាគត ។
យោងតាមរបាយការណ៍សាលាឱ្យដឹងថា ក្នុងរយៈពេល៣ឆ្នាំកន្លងមកនេះ សាលាតូរ្យតន្ដ្រីស៊ីមហ្វូនីបានរៀបចំសកម្មភាពជាបន្ដបន្ទាប់ដូចជា នៅឆ្នាំ២០១១ សាលាបានបង្កើតនូវការប្រគំតន្ដ្រីដែលសម្ដែងរួមគ្នាដោយក្រុមតន្ដ្រីមកពីតៃវ៉ាន់ Rueifang Youth Symphony Orchestraជាមួយនឹងសាលាស៊ីមហ្វូនី ។ នៅឆ្នាំដដែលសាលាបានរៀបចំសិក្ខាសាលាជាបន្ដបន្ទាប់ដែលមានការចូលរួមពីក្រុមតន្ដ្រីមកពីហុងកុង តៃវ៉ាន់ អាមេរិក សាកលវិទ្យាល័យភូមិន្ទវិចិត្រសិល្បៈ និងសាលាស៊ីមហ្វូនី ក្នុងការចែករំលែកបទពិសោធន៍ដ៏ប៉ិនប្រសប់របស់ពួកគេទៅវិញទៅមក ។
ក្នុងឆ្នាំ២០១២ សាលាបានរៀបចំឱ្យមានការប្រឡងជ្រើសរើសចំណាត់ថ្នាក់ដែលបានទទួលស្គាល់ដោយនាយកដ្ឋានផ្នែកតន្ដ្រីនៃសាកលវិទ្យាល័យភូមិន្ទវិចិត្រសិល្បៈ ។ នៅឆ្នាំ២០១៣ សាលាបានចាប់ផ្ដើមបើកវគ្គសិក្សាផ្នែកសិល្បៈគំនូរដោយមានគ្រូដែលមានបទពិសោធន៍ខ្ពស់មកពីចក្រភពអង់គ្លេស និងអូស្រ្ដាលី ដើម្បីជំរុញដល់កុមារកម្ពុជាឱ្យបង្កើនការគិត ការច្នៃប្រឌិតខ្ពស់ក៏ដូចជាការបង្កើតគំនិតថ្មីៗ ៕
ចែករំលែកព័តមាននេះ