រាជធានីភ្នំពេញ ៖ រដ្ឋសភានៃព្រះរាជាណាចក្រកម្ពុជា ដឹកនាំដោយសម្តេចអគ្គមហាពញាចក្រីហេង សំរិន នឹងបើកសម័យប្រជុំវិសាមញ្ញដើម្បីពិនិត្យលើសេចក្តីស្នើច្បាប់ស្តីពី«ការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជា ប្រជាធិបតេយ្យ» ។ ច្បាប់នេះដែលមាន១ជំពូកនិង៥មាត្រា នឹងត្រូវគណៈកម្មាធិការអចិន្ត្រៃយ៍នៃរដ្ឋសភា លើកយកមកប្រជុំពិភាក្សាជាលើកទី២ នៅថ្ងៃទី៥ មិថុនា ខាងមុខ មុនដាក់ចូលក្នុងកិច្ចប្រជុំវិសាមញ្ញារដ្ឋសភាពេញអង្គដែលគ្រោងធ្វើនៅថ្ងៃទី៧ ខែមិថុនា ។
សេកក្តីស្នើច្បាប់នេះ ធ្លាប់ត្រូវបានគណៈកម្មាធិការអចិន្ត្រៃយ៍នៃរដ្ឋសភាប្រជុំពិភាក្សាម្តងរួចមកហើយ កាលពីថ្ងៃទី៣១ ឧសភា ក្រោមអធិបតីភាពសម្តេចពញាចក្រីហេង សំរិន ប្រធានរដ្ឋសភា ។ មន្ត្រីនៃគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន និងជាសមាជិកគណៈកម្មាធិការអចិន្ត្រៃយ៍នៃរដ្ឋសភា បានមានប្រសាសន៍កាលពីព្រឹកថ្ងៃទី៣ មិថុនា ថា បន្ទាប់ពីកិច្ចប្រជុំគណៈកម្មាធិការអចិន្ត្រៃយ៍កន្លងទៅ កាលពីសប្តាហ៍មុន គឺបានប្រគល់ភារកិច្ចរៀបចំខ្លឹមសារនៃសេចក្តីស្នើច្បាប់នេះឱ្យទៅគណៈកម្មការនីតិកម្មរដ្ឋសភា ដើម្បីរៀបចំជូនគណៈកម្មាធិការអចិន្ត្រៃយ៍សម្រេច ។
បើសិនជាគណៈកម្មាធិការអចិន្ត្រៃយ៍សម្រេច នឹងដាក់ចូលក្នុងសម័យប្រជុំសភាពេញអង្គជាវិសាមញ្ញនៅថ្ងៃសុក្រទី៧ មិថុនា ។ សេចក្តីស្នើច្បាប់ថ្មីនេះ បានកំណត់ដាក់ទោសលើជនណាដែលមិនទទួលស្គាល់របបខ្មែរក្រហម ថាមានការធ្វើទារុណកម្ម និងការសម្លាប់មនុស្សជិត២លាននាក់ ដោយត្រូវផ្តទ្ទាទោស ដាក់ពន្ធនាគារពី៦ខែទៅ២ឆ្នាំ និង ពិន័យជាប្រាក់ពី១លានរៀលទៅ៤លានរៀល ។ សេចក្តីស្នើច្បាប់នេះ បានព្រាងឡើងក្រោយពីប្រធានស្តីទីបក្សប្រឆាំងគឺលោកកឹម សុខា ត្រូវបានគេអះអាងថាមិនទទួលស្គាល់មន្ទីរស២១របស់ខ្មែរក្រហម ហើយត្រូវបានអតីតអ្នករងគ្រោះក្នុងមន្ទីរឃុំឃាំងនេះគឺលោក ជុំ ម៉ី អាយុ៨៣ឆ្នាំ និងលោកប៊ូ ម៉េង អាយុ៧២ឆ្នាំ ទាមទារឱ្យសុំទោសជាសាធារណៈ ។
សេចក្តីព្រាងច្បាប់ស្តីពីការប្រឆាំងការមិន ទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបេតយ្យ ត្រូវបានសម្រេចជាផ្លូវការហើយនឹងត្រៀមដាក់សេចក្តី ស្នើច្បាប់នោះចូលក្នុងសម័យប្រជុំវិសាមញ្ញរដ្ឋសភាក្នុងពេលខាងមុខ ។ សេចក្តីប្រកាសបានឲ្យដឹងថា គណៈកម្មាធិការអចិន្ត្រៃយ៍រដ្ឋសសភាបានពិនិត្យពិភាក្សាលើរបៀបវារៈពិនិត្យលើសំណើអនុម័តច្បាប់លើសេចក្តីព្រាងច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបេតយ្យ ។
ក្រោយពីពិនិត្យ និងពិភាក្សាលើសេចក្តីព្រាងច្បាប់នេះ គណៈកម្មាធិការអចិន្ត្រៃយ៍រដ្ឋសភាបានឯកភាពប្រគល់សេចក្តីព្រាងច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យជូនគណៈកម្មការនីតិកម្ម និងយុត្តិធម៌ពិនិត្យសិក្សា ។ ច្បាប់ដែលផ្តន្ទាទោសលើអ្នកមិនទទួលស្គាល់របបប្រល័យពូជសាសន៍ខ្មែរក្រហមនោះ គឺមាន៥មាត្រា បានចែងផ្តន្ទាទោសពី៦ខែទៅ ២ឆ្នាំ និងពិន័យជាប្រាក់ពី១លានរៀលទៅ៤ លានរៀល ។ ចំពោះអ្នកដែលមិនរាងចាល អាចត្រូវផ្តន្ទាទោសចូលក្នុងក្រមព្រហ្មទណ្ឌហើយពិន័យជាប្រាក់ពី៥០លានរៀលទៅ៥០០លានរៀល ។
សូមរំលឹកថា សេចក្តីស្នើច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ ត្រូវបានសមាជិករដ្ឋសភាមកពីគណបក្សប្រជាជនកម្ពុជាចំនួន៩០រូបតាក់តែងឡើងបន្ទាប់ពីសម្តេចតេជោ ហ៊ុន សែន នាយករដ្ឋមន្ត្រីបាន ប្រកាសអំពាវនាវឲ្យមានច្បាប់ថ្មីនោះកាលពីថ្ងៃចន្ទទី២៧ ឧសភា កន្លងមក ។ ចុងក្រោយនេះ សមាជិករដ្ឋសភា៤៦រូប បានស្នើសុំឲ្យសម្តេចប្រធានរដ្ឋសភា បើកសម័យប្រជុំវិសាមញ្ញស្របទៅតាមមាត្រា៨៣នៃរដ្ឋធម្មនុញ្ញដើម្បីអនុម័តលើសេចក្តីស្នើច្បាប់ថ្មីនោះ ។
មាត្រា៨៣នៃរដ្ឋធម្មនុញ្ញនៃព្រះរាជាណាចក្រកម្ពុជាបានចែងថា រដ្ឋសភាប្រជុំសាមញ្ញពីរដង ក្នុងមួយឆ្នាំ ។ សម័យប្រជុំនីមួយៗមានថិរវេលាយ៉ាងតិចបីខែ ។ បើមានសំណូមពរពីព្រះមហាក្សត្រ ឬសេចក្តីស្នើសុំពីនាយករដ្ឋមន្ត្រី ឬពីសមាជិករដ្ឋសភាចំនួនមួយភាគបីយ៉ាងតិច គណៈកម្មាធិការអចិន្ត្រៃយ៍រដ្ឋសភាកោះប្រជុំរដ្ឋសភាវិសាមញ្ញ ។ ក្នុងករណីនេះ របៀបវារៈជាក់លាក់នៃសម័យប្រជុំជាវិសាមញ្ញត្រូវផ្សាយដល់ប្រជារាស្ត្រមួយថ្ងៃមុននឹងថ្ងៃកំណត់ប្រជុំ ៕
ចែករំលែកព័តមាននេះ