ខេត្តកំពង់ឆ្នាំង ៖ យ៉ាងហោចណាស់ យុវជនម្នាក់បានរងរបួសធ្ងន់ និង២នាក់ទៀត រងរបួសស្រាល ក្នុងហេតុការណ៍ដេញកាប់គ្នាផ្អើលឈុលនៅកណ្តាលវង់រាំធុងបាស់នៃពិធីបុណ្យឡើងអ្នកតា កាលពីល្ងាចថ្ងៃទី១ មិថុនា នៅក្នុងភូមិក្បាលថ្នល់ ឃុំផ្សារ ស្រុកបរិបូណ៍ ។ យុវជនរងគ្រោះទាំង៣នាក់ ត្រូវក្រុមដាវសាមូរ៉ៃដេញកាប់យ៉ាងសាហាវដូចក្នុងរឿងវីដេអូហុងកុងអ៊ីចឹង ។
ខេត្តកំពង់ឆ្នាំង ៖ យ៉ាងហោចណាស់ យុវជនម្នាក់បានរងរបួសធ្ងន់ និង២នាក់ទៀត រងរបួសស្រាល ក្នុងហេតុការណ៍ដេញកាប់គ្នាផ្អើលឈុលនៅកណ្តាលវង់រាំធុងបាស់នៃពិធីបុណ្យឡើងអ្នកតា កាលពីល្ងាចថ្ងៃទី១ មិថុនា នៅក្នុងភូមិក្បាលថ្នល់ ឃុំផ្សារ ស្រុកបរិបូណ៍ ។ យុវជនរងគ្រោះទាំង៣នាក់ ត្រូវក្រុមដាវសាមូរ៉ៃដេញកាប់យ៉ាងសាហាវដូចក្នុងរឿងវីដេអូហុងកុងអ៊ីចឹង ។
យុវជនរងគ្រោះទាំង៣នាក់ គឺ១-ឈ្មោះ រឿន វាសនា អាយុ២៤ឆ្នាំ របួសធ្ងន់ ដោយមុតកំភួនដៃនិងខ្នងដៃលិចដល់ឆ្អឹង ។ ២-ឈ្មោះផាត់ វិសាល អាយុ១៩ឆ្នាំ របួសខ្នង១កាំបិត ។ យុវជនរងគ្រោះទាំងពីរនាក់រស់នៅក្នុងភូមិក្បាលថ្នល់ និង៣-ឈ្មោះ គឹម ខួច អាយុ១៩ឆ្នាំ របួសក្បាលមួយកាំបិត រស់នៅក្នុងភូមិជើងខ្នារ ឃុំពន្លៃ ស្រុកបរិបូរណ៍ ។ ក្រោយកើតហេតុ អ្នករបួសស្រាលត្រូវបានបញ្ជូនទៅកាន់មណ្ឌលសុខភាពស្រុកបរិបូណ៍ ចំណែកអ្នករបួសធ្ងន់ត្រូវគេបញ្ជូនទៅកាន់មន្ទីរពេទ្យខេត្ត ។
លោក អែម រុិន មេភូមិក្បាលថ្នល់បានឱ្យដឹងជុំវិញការកាប់ប្រហារគ្នានេះថា អ្នកស្រុកក្នុងភូមិក្បាលថ្នល់ ឃុំផ្សារ បាននាំគ្នាធ្វើបុណ្យឡើងអ្នកតាម្ចាស់ស្រុក ឈ្មោះ តាអំពិលព្រះ តាមប្រពៃណីក្នុងភូមិរបស់ខ្លួនមានរយៈពេល៣ថ្ងៃ គឺចាប់ពីថ្ងៃទី៣០-៣១ ឧសភា និងបញ្ចប់នៅថ្ងៃទី១ មិថុនា ។ នៅក្នុងពិធីនោះក៏មានចាក់ធុងបាស់រាំលេងកម្សាន្តផងដែរ ។
លោកមេភូមិបានបន្តថា នៅថ្ងៃកើតហេតុជាថ្ងៃចុងក្រោយ លោកមិនដឹងថា មានទំនាស់រឿងអ្វីនោះទេ? ស្រាប់តែមានក្មេង២ក្រុមដែលសុទ្ធតែស្រវឹងជោកបានទាស់សម្តីគ្នា ហើយពេលនោះគេឃើញមានក្មេងមួយក្រុមបានស្ទុះទៅយកដាវសាមូរ៉ៃពីក្រោមកែបម៉ូតូដេញកាប់ក្មេងមួយក្រុមទៀត បណ្តាលឱ្យរងរបួសធ្ងន់និងស្រាល៣នាក់ រួចនាំគ្នារត់គេចខ្លួន ។ ប៉ុន្តែត្រូវអ្នកស្រុកដែលស្ថិតនៅកន្លែងរាំកម្សាន្តនោះ និងប្រជាការពារក្នុងភូមិនាំគ្នាចាប់ជនដៃដល់បានម្នាក់ចងបណ្តើរយកមកប្រគល់ឱ្យគាត់ ។
បន្ទាប់មក គាត់ក៏បានដឹកអ្នករបួសទៅកាន់មន្ទីរពេទ្យ រួមជាមួយជនដៃដល់ម្នាក់នោះយកទៅប្រគល់ឱ្យនគរបាលប៉ុស្តិ៍ ប៉ុន្តែពេលពួកគាត់កំពុងតែរវល់លើកជនរងគ្រោះចូលមណ្ឌលសុខភាពស្រុក ស្រាប់តែជនដៃដល់រូបនោះបានលោតចុះពីលើរថយន្តរត់គេចខ្លួនបាត់តែម្តង ។ លោក ជាង វណ្ណារិទ្ធ អធិការនគរបាលស្រុកបរិបូណ៍ បានឱ្យដឹងថា លោកកំណត់បានមុខសញ្ញាហើយ ដែលពេលនេះពួកនោះកំពុងរត់គេចខ្លួន ។
ជារឿយៗឱ្យតែមានពិធីបុណ្យទាន មង្គលការ ហើយមានធុងបាស់ គឺតែងតែកើតមានអំពើហិង្សាកាប់ចាក់គ្នារវាងក្រុមយុវជន ខុសភូមិ ខុសបក្ខពួកគ្នា មិនសូវលោះពេលប៉ុន្មានឡើយ ដែលកត្តាទាំងអស់នេះបានធ្វើឱ្យប៉ូលិសឈឺក្បាលមិនតិចទេ ៕
ចែករំលែកព័តមាននេះ