រាជធានីភ្នំពេញ ៖ ការប្រកួតបើកឆាករវាងកីឡាករសារឹម ង៉ា មកពីសមាគមកីឡាប្រដាល់ក្រសួងការពារជាតិ និងសិស្សច្បង ឃឹម ពេជ្រចិន្តា មកពីក្លិបបូរីនាគរាជ បានធ្វើឱ្យរញ្ជួយសង្វៀនបឹងស្នោគួរសមកាលពីថ្ងៃអាទិត្យសប្តាហ៍មុន ។ អ្វីដែល សារឹម ង៉ា ធ្វើឱ្យមហាជនកោតសរសើរនោះគឺនៅពេលដែលគេអាចបំបាក់កីឡាករឃឹម ពេជ្រចិន្តា ឱ្យបរាជ័យដោយបានទាំងធ្វើឱ្យកីឡាកររូបនេះស្ទើរឆ្លងទឹកទី៥ មិនរួច។
រាជធានីភ្នំពេញ ៖ ការប្រកួតបើកឆាករវាងកីឡាករសារឹម ង៉ា មកពីសមាគមកីឡាប្រដាល់ក្រសួងការពារជាតិ និងសិស្សច្បង ឃឹម ពេជ្រចិន្តា មកពីក្លិបបូរីនាគរាជ បានធ្វើឱ្យរញ្ជួយសង្វៀនបឹងស្នោគួរសមកាលពីថ្ងៃអាទិត្យសប្តាហ៍មុន ។ អ្វីដែល សារឹម ង៉ា ធ្វើឱ្យមហាជនកោតសរសើរនោះគឺនៅពេលដែលគេអាចបំបាក់កីឡាករឃឹម ពេជ្រចិន្តា ឱ្យបរាជ័យដោយបានទាំងធ្វើឱ្យកីឡាកររូបនេះស្ទើរឆ្លងទឹកទី៥ មិនរួច។
នៅចន្លោះទឹកទី១ ដល់ទី៣ កីឡាករឃឹម ពេជ្រចិន្តា នៅរក្សាជំហររឹងមាំ និងបង្ហាញសន្ទុះវាយបកទៅមកៗជាមួយកីឡាករសារឹម ង៉ា ក្នុងលក្ខណៈប្រហាក់ប្រហែលគ្នានៅឡើយទេ បើទោះជាមើលទៅកីឡាករឃឹម ពេជ្រចិន្តា មានសភាពវាយលុកបែបកញ្ជ្រោល ដែលផ្ទុយពីកីឡាករសារឹម ង៉ា ដែលទាល់តែមានប្រឡោះទើបសម្រុកវាយ ហើយកម្រខុសគោលដៅនោះក្តី ។ ជាក់ស្តែងនៅក្នុងទឹកទី៣ កីឡាករឃឹម ពេជ្រចិន្តា ឈ្នះដាច់តែម្តង ដែលកាន់តែពិបាកប៉ាន់ស្មានថា រវាងសិស្សច្បងនិងសិស្សប្អូនទាំងពីរ តើអ្នកណាជាអ្នកឈ្នះក្នុងជំនួបដែលពួកគេជួបគ្នាលើកដំបូង ។
រហូតដល់ទឹកទី៤ និងទី៥ ទើបគេឃើញសន្ទុះរបស់កីឡាករឃឹម ពេជ្រចិន្តា ចាញ់ប្រៀបដាច់កីឡាករសារឹម ង៉ា តែម្តង ។ ២ទឹកចុងក្រោយនេះ កីឡាករសារឹម ង៉ា ដែលមានកម្លាំងនៅមាំទាំជាង ហាក់ព្រមានសិស្សច្បងចាស់ដៃជាងមុន ដោយក្រៅពីម៉ាត់ចំផូងៗ គេក៏ទាត់ផុតៗក្បាល ឃឹម ពេជ្រចិន្តា និងបានប៉ែងជើងឱ្យដួលច្រងាប់ច្រងិលខុសពីដើមទឹក ។ ឈានជិតដល់ទឹកចុងក្រោយ កីឡាករបង្គោលខៀវ ឃឹម ពេជ្រចិន្តា កាន់តែអស់ដៃអស់ជើងបាត់ជំហរ ដោយសូម្បីតែក្នុងពេលស្ទុះវាយបង្គោលក្រហម ក៏ដួលត្រឡប់ត្រឡិនធ្វើឱ្យអ្នកទស្សនាហួសចិត្តដែរ ។
ទោះបីយ៉ាងណា មិនមានអ្នកណាម្នាក់សម្តែងការរិះគន់ចំពោះសភាពចុះខ្សោយរបស់កីឡាករឃឹម ពេជ្រចិន្តា នោះទេ ដោយសារតែគេដឹងរួចទៅហើយថា កីឡាករបង្គោលក្រហម សារឹម ង៉ា ជាជើងខ្លាំងស្រករក្រោយដែលមានកម្លាំងខ្លាំង និងច្រើនបញ្ចេញកម្លាំងវាយសម្រុកបានល្អចាប់ពីទឹកទី៣។ កីឡាករសារឹម ង៉ា សើចផង លោតផង តាំងពីមុនពេលប្រកាសថា គេឈ្នះពិន្ទុលើកីឡាករឃឹម ពេជ្រចិន្តា ។ កីឡាករទាំងពីរនឹងជួបគ្នាសងសឹកឆាប់ៗ បើទោះជាការព្យាករនៅតែបង្ហាញថា ឃឹម ពេជ្រចិន្តា ពិតជាពិបាកជាមួយកីឡាករសារឹម ង៉ា សម្រាប់ជំនួបក្រោយៗដដែលនោះក៏ដោយ ។
សម្រាប់គូប្រកួតផ្សេងទៀត កីឡាករឆាយ រដ្ឋា មកពីក្លិបបាត់ដំបងពាយ័ព្យ ចាញ់កីឡាករប្រាក់ ស៊ីណាត មកពីក្លិបកងរាជអាវុធហត្ថរាជធានីភ្នំពេញ ដោយពិន្ទុ ។ កីឡាករឯម ស៊ីថុង មកពីក្លិបឫទ្ធិពោធិ៍សែនជ័យ ឈ្នះកីឡាករផាន់ សារ៉ែម មកពីក្លិបគជសារកីឡាដោយពិន្ទុ ។ កីឡាករថន វាសនា មកពីក្លិបនាគមានជ័យ ឈ្នះកីឡាករទូច ស័ក្ត មកពីក្លិបរស្មីកុមារកំព្រាដោយពិន្ទុ និងកីឡាករចាន់ ស៊ីណាត មកពីក្លិបនិរោធមានជ័យ និងកីឡាករលាភ សំណាង មកពីក្លិបកងពលតូចលេខ៧០ ត្រូវបញ្ឈប់មិនឱ្យប្រកួតត្រឹម ទឹកទី៤ (ស្មើគ្នា) ដោយសារកីឡាករទាំងពីរបែកចិញ្ចើមធ្ងន់ធ្ងរដូចគ្នា ដែលមិនអាចឱ្យពួកគេបន្តការប្រកួតទៀតបាន ៕
ចែករំលែកព័តមាននេះ