ខេត្តរតនគិរី ៖ ប្រជាពលរដ្ឋចំនួន៣៩៣គ្រួសារ ដែលរស់នៅក្នុងភូមិអង្ក្រង១ អង្ក្រង២ និងអង្ក្រង៣ ឃុំស្រែអង្ក្រង ស្រុកកូនមុំ កាលពីព្រឹកថ្ងៃទី១ មិថុនា ២០១៣ ត្រូវបានទទួលការពិនិត្យសុខភាពដោយឥតគិតថ្លៃ និងទទួលអំណោយពីក្រុមហ៊ុនហ៊ងអាញយ៉ាឡាយគ្រុប ដែលដឹកនាំដោយលោកង្វៀង វា៉ន់ស៊ី អគ្គនាយកក្រុមហ៊ុនហ៊ងអាញយ៉ាឡាយគ្រុប ។
លោក ង្វៀង វ៉ាន់ស៊ី អគ្គនាយកក្រុមហ៊ុនហ៊ងអាញយា៉ឡាយគ្រុប មានប្រសាសន៍ថា ដោយមើលឃើញការលំបាក របស់ប្រជាពលរដ្ឋក្នុងឃុំស្រែអង្ក្រង ស្រុកកូនមុំ ដែលរស់នៅជុំវិញដីគម្រោងអភិវឌ្ឍន៍ដំណាំកៅស៊ូ និងដូងប្រេងរបស់ក្រុមហ៊ុនហ៊ងអាញយ៉ាឡាយគ្រុប ទើបនៅព្រឹកថ្ងៃទី១ មិថុនា ក្រុមហ៊ុនបានចាត់តាំងក្រុមគ្រូពេទ្យសរុបចំនួន៤៥នាក់ ក្នុងនោះមានវេជ្ជបណ្ឌិតចំនួន៩នាក់ របស់ក្រុមហ៊ុនចុះមកពិនិត្យ និងព្យាបាលជំងឺដោយឥតគិតថ្លៃជូនប្រជាពលរដ្ឋទាំង៣៩៣គ្រួសារ ដែលរស់នៅក្នុងភូមិអង្ក្រង១ អង្ក្រង២ និងអង្ក្រង៣ ព្រមទាំងផ្តល់អំណោយជាអង្ករផងដែរ ។
លោកស្រី វ៉ែន ភូមី ក្រុមប្រឹក្សាឃុំស្រែអង្ក្រងឱ្យដឹងថា ប្រជាពលរដ្ឋក្មេងចាស់ប្រុសស្រីជិត២ពាន់នាក់ មកពីភូមិអង្ក្រង១ អង្ក្រង២ និងអង្ក្រង៣ ស្ថិតក្នុងឃុំស្រែអង្ក្រង ស្រុកកូនមុំ ត្រូវបានពិនិត្យជំងឺ និងទទួលថ្នាំពេទ្យដោយឥតគិតថ្លៃ ពីក្រុមគ្រូពេទ្យរបស់ក្រុមហ៊ុនហ៊ងអាញយា៉ឡាយគ្រុប ។ មិនតែប៉ុណ្ណោះ ក្រុមហ៊ុននេះក៏ចែកអំណោយ ដល់ប្រជាពលរដ្ឋទាំង៣៩៣គ្រួសារ ដែលក្នុងមួយគ្រួសារទទួលបានអង្ករ៥០គីឡូក្រាម ស្ករ.ស២គីឡូក្រាម និងអំបិល១គីឡូក្រាម ។ ក្នុងនាមលោកស្រីជាតំណាងឱ្យប្រជាពលរដ្ឋ រស់នៅឃុំស្រែអង្ក្រងមានសេចក្តីត្រេកអរជាពន់េពក ពេលដែលឃើញក្រុមហ៊ុនហ៊ងអាញយា៉ឡាយ ដឹកនាំក្រុមគ្រូពេទ្យចុះមកពិនិត្យសុខភាព និងផ្តល់ថ្នាំពេទ្យជូនប្រជាពលរដ្ឋដោយឥតគិតថ្លៃ មិនតែប៉ុណ្ណោះក្រុមហ៊ុនក៏បានផ្តល់ជាអំណោយទៀតផង ។ ក្រុមហ៊ុនហ៊ងអាញយា៉ឡាយ ជាក្រុមហ៊ុនអភិវឌ្ឍន៍ដំណាំកៅស៊ូ និងដូងប្រេងដែលមានដីជាប់នឹងសហគមន៍ឃុំស្រែអង្ក្រង ហើយក្រុមហ៊ុនក៏បានផ្តល់ការងារឱ្យប្រជាពលរដ្ឋ ទៅធ្វើការនៅក្នុងក្រុមហ៊ុននេះផងដែរ ។
លោកអគ្គនាយកក្រុមហ៊ុនហ៊ងអាញយ៉ាឡាយគ្រុបបានបញ្ជាក់ថា មានសហគមន៍ចំនួន១៨ ដែលមានប្រជាពលរដ្ឋរស់នៅជុំវិញដីគម្រោងប្រហែលជាង២.៥០០គ្រួសារ ស្មើនឹងប្រជាពលរដ្ឋចំនួនប្រហែល១ម៉ឺននាក់ មានជីវភាពខ្វះខាតជាច្រើន ដូច្នេះក្រុមហ៊ុនហ៊ងអាញយា៉ឡាយ និងចលនាប្រជាពលរដ្ឋឱ្យចូលធ្វើការក្នុងដីគម្រោងវិនិយោគ ដើម្បីលើកកម្ពស់ប្រាក់ចំណូល ហើយក្រុមហ៊ុននឹងរៀបចំពិនិត្យសុខភាព និងចែកចាយថ្នាំពេទ្យដោយឥតគិតថ្លៃជូនប្រជាពលរដ្ឋក្នុងរយៈពេល៦ខែម្តង បើសិនជាមានប្រជាពលរដ្ឋណាមានជំងឺធ្ងន់ធ្ងរ ក្រុមហ៊ុននឹងបញ្ជូនទៅព្យាបាលនៅមន្ទីរពេទ្យហ៊ងអាញយា៉ឡាយ ប្រទេសវៀតណាម ៕
ចែករំលែកព័តមាននេះ