ខេត្តស្ទឹងត្រែង ៖ រថយន្តកាមរីហើមចំនួនពីរគ្រឿងត្រូវបានក្រុមនគរបាលចរាចរណ៍ស្ទាក់ចាប់បាននៅចំណុចបារ៉ាស់ត្រួតពិនិត្យលើផ្លូវជាតិលេខ៩ថ្មី ស្ថិតក្នុងភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់ កាលពីវេលាម៉ោង៨និង៤៥នាទីយប់ ក្នុងថ្ងៃទី២៥ ខែតុលា ឆ្នាំ២០១៨…
ខេត្តស្ទឹងត្រែង ៖ រថយន្តកាមរីហើមចំនួនពីរគ្រឿងត្រូវបានក្រុមនគរបាលចរាចរណ៍ស្ទាក់ចាប់បាននៅចំណុចបារ៉ាស់ត្រួតពិនិត្យលើផ្លូវជាតិលេខ៩ថ្មី ស្ថិតក្នុងភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់ កាលពីវេលាម៉ោង៨និង៤៥នាទីយប់ ក្នុងថ្ងៃទី២៥ ខែតុលា ឆ្នាំ២០១៨ ។
ស្ថិតក្នុងការបង្ក្រាបនោះត្រូវបានគេប្រាប់ឲ្យដឹងថា រថយន្តដឹកឈើប្រណិតទាំងអស់មានចំនួនបីគ្រឿងប្រភេទកាមរីហើមបានធ្វើសកម្មភាពលួចដឹកឈើចេញពីទឹកដីខេត្តព្រះវិហារឆ្ពោះទៅកាន់ទីផ្សារគោលដៅ ដោយឆ្លងកាត់ខេត្តស្ទឹងត្រែង លុះមកដល់ចំណុចបារ៉ាស់ត្រួតពិនិត្យក៏ត្រូវបានកម្លាំងនគរបាលចរាចរណ៍ធ្វើការឃាត់ទុកបានតែចំនួនពីរគ្រឿង ចំណែកមួយគ្រឿងទៀតបានទម្លុះគោលដៅត្រួតពិនិត្យបន្តឆ្ពោះទៅមុខដោយសុវត្ថិភាព ។
ខណៈសមត្ថកិច្ចកំពុងបង្ក្រាបរថយន្តដឹកឈើទាំងនេះមានស្ត្រីម្នាក់ដែលអះអាងថា ជាម្ចាស់ឈើ បានចេញមុខមកបកស្រាយថា សូមឲ្យសមត្ថកិច្ចដោះលែងឈើរបស់គាត់ទៅព្រោះថា គាត់បានបង់លុយរត់ការផ្លូវនៅកន្លែងបារ៉ាស់ត្រួតពិនិត្យនេះរួចរាល់អស់ហើយមុននឹងពួកគាត់ធ្វើសកម្មភាពដឹកជញ្ជូនឈើទាំងនេះ ។
ស្ត្រីម្ចាស់ឈើខាងលើបានយំបន្តរៀបរាប់បន្តថា បើអាជ្ញាធរខេត្តដាក់កម្លាំងបិតឈើមិនអោយចេញ ចុះហេតុដូចម្តេចក៏កម្លាំងចម្រុះនៅទីនេះមិនប្រាប់គាត់បែរជាយកលុយគាត់ហើយពេលដែលគាត់ដឹកឈើចេញស្រាប់តែចាប់គាត់ទៅវិញ?
ពាក់ព័ន្ធករណីខាងលើកម្លាំងនគរបាលចរាចរណ៍នៅទីនោះបានប្រាប់ថា គឺធ្វើតាមតួនាទី និងបទបញ្ជារបស់លោក អូត សុីវុត្ថា ស្នងការរងទទួលផែនចរាចរណ៍ដោយមិនឲ្យប៉ះពាល់លុយកាក់សុីសំណូកសូកប៉ាន់ និងធ្វើបាបកៀបសង្កត់ប្រជាពលរដ្ឋនោះទេ ។ ចំពោះរឿងនេះម្ចាស់ឈើគាត់បានបង់លុយឲ្យសមត្ថកិច្ចរូបណា បុគ្គលសមត្ថកិច្ចរូបនោះគួរទទួលខុសត្រូវ ។
នៅចំពោះមុខសមត្ថកិច្ចម្ចាស់ឈើបានរៀបរាប់ព្រមទាំងមានមានការថតសំលេងទុកស្តាប់ផងដែរនូវឈ្មោះបុគ្គលមួយចំនួននៅគោលដៅនោះដែលបានយកលុយគាត់មានលោក អឿ គឹមហេង មេព្រៃជាប្រធានគោលដៅ, លោក ចំណាន ជាមន្ត្រីនគរបាលនៅស្នងការដ្ឋាននគរបាលខេត្ត (អត់ទាន់ស្គាល់នៅការិយាល័យមួយណា) ។
សូមបញ្ជាក់ថា កម្លាំងចម្រុះចាំត្រួតពិនិត្យបទល្មើសនៅទីនោះមានកម្លាំងជំនាញរដ្ឋបាលព្រៃឈើជាប្រធាន កម្លាំងស្នងការនគរបាលខេត្ត កម្លាំងយោធា និងកម្លាំងអាវុធហត្ថ ហើយក្នុងនោះក៏មានកម្លាំងជំនាញនគរបាលចរាចរណ៍ជើងគោកផងដែរដែលសរុបប្រហែលជិត២០នាក់ក្នុងគោលដៅនីមួយៗ ។
តាបបទបញ្ជារបស់ប្រធានគណបញ្ជាការឯកភាពខេត្តដែលមានលោក ម៉ុម សារឿន ជាប្រធានបានអនុញ្ញាតិឲ្យដាក់ប៉ុស្តិ៍ត្រួតពិនិត្យបទល្មើសផ្សេងៗ ជាពិសេសបទល្មើសព្រៃឈើចំនួនបីកន្លែងសំខាន់ៗ គឺគោលដៅទី១-លើកំណាត់ផ្លូវជាតិលេខ៩ ពីស្ទឹងត្រែងទៅខេត្តព្រះវិហារ ត្រង់ចំណុចអូរចង្ហារ ។ គោលដៅទី២-លើផ្លូវជាតិលេខ៧៨ ពីខេត្តស្ទឹងត្រែងទៅខេត្តរតនគិរីត្រង់ ចំណុចជិតស្ពានស្រែពក និងគោលដៅទី៣-លើផ្លូវជាតិលេខ៧ ពីស្ទឹងត្រែងទៅខេត្តក្រចេះ ត្រង់ចំណុចស្នាក់ការរដ្ឋបាលព្រៃឈើភ្នំក្រហម ។ បច្ចុប្បន្នរថយន្តទាំងពីរគ្រឿងខាងលើត្រូវបានជំនាញយកទៅរក្សាទុកនៅខណ្ឌរដ្ឋបាលព្រៃឈើខេត្តស្ទឹងត្រែង ៕
ចែករំលែកព័តមាននេះ