ខេត្តកំពង់ស្ពឺ៖ ដោយសារតែឥទ្ធិពលគ្រឿងញៀនធ្វើឱ្យបុរសជាឪពុកចុងម្នាក់យកកាំបិតកាប់កូនស្រីចុងបណ្តាលឱ្យរងរបួសឈាមដាបពេញក្នុងផ្ទះបង្កឱ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចជួយអន្តរាគមន៍។ បុរសជាឪពុកចុងភ័យពេកក៏ឡើងទៅលាក់ខ្លួនលើដើមស្វាយព្យាយាមចង-កសម្លាប់ខ្លួន កម្លាំងសមត្ថកិច្ចព្យាយាមជួយសង្គ្រោះដឹកយកទៅមន្ទីរពេទ្យបង្អែកខេត្តកំពង់ស្ពឺដែរ ប៉ុន្តែបុរសជាឪពុកបានខាំអណ្តាតខ្លួនឯងថែមទៀតពេទ្យជួយលែងបានក៏ស្លាប់តែម្តងទៅ។
សមត្ថកិច្ចខេត្តកំពង់ស្ពឺបាននិយាយឱ្យដឹងថា÷ កាលពីវេលាម៉ោង១០និង២០នាទីយប់ថ្ងៃទី១៥ ខែតុលា ឆ្នាំ២០២៥ នៅក្នុងភូមិភ្នំបាត ឃុំជើងរាស់ ស្រុកសាមគ្គីមុន្នីជ័យ ខេត្តកំពង់ស្ពឺ កើតមានករណីប៉ុនប៉ងឃាតកម្ម អតីតឪពុកចុង បានយកកាំបិតកាប់ទៅកូនចុងជាស្ត្រីមេម៉ាយកូនមួយ ហើយប៉ុនប៉ងសម្លាប់ខ្លួនឯង ដោយដុតភ្លើងនៅលើដើមស្វាយ យកខ្សែចង-ក លុះសមត្ថកិច្ចជួយមកដល់ដី ស្រាប់តែខាំអណ្តាតខ្លួនឯងថែមទៀត ពេលនោះកំលាំងសមត្ថកិច្ចក៏បានដឹកយកទៅសង្គ្រោះដែរ ប៉ុន្តែជាអកុសលជនសង្ស័យជាឪពុកចុងរូបនោះបានស្លាប់ នៅឯមន្ទីរពេទ្យបង្អែកខេត្តកំពង់ស្ពឺបាត់ទៅហើយ។
សមត្ថកិច្ចខេត្តកំពង់ស្ពឺបាននិយាយបន្តថា ជនរងគ្រោះមានឈ្មោះស៊ុ ឡី អាយុ២៩ឆ្នាំ (ត្រូវជាកូនចុង) បណ្ដាលឲ្យរងរបួសធ្ងន់ ឈាមដាបពេញផ្ទះ ។ ចំណែក ឪពុកចុងជាជនសង្ស័យមានឈ្មោះ ប៊ុត វិន អាយុ៤៣ឆ្នាំ រស់នៅជាមួយគ្នាក្នុងភូមិភ្នំបាត ឃុំជើងរាស់ ស្រុក សាមគ្គីមុន្នីជ័យ ខេត្តកំពង់ស្ពឺ។
សមត្ថកិច្ចខេត្តកំពង់ស្ពឺបានបញ្ជាក់ថា មូលហេតុដែលជនសង្ស័យដៃដល់ជាឪពុកចុង ទាស់ពាក្យសម្តីជាមួយប្រពន្ធ ជនរងគ្រោះតែងតែការពារម្តាយ។ ជនដៃដល់ដាច់ចិត្តទាញយកកាំបិតកាប់ទៅលើកូនស្រីចុងនោះ គឺបណ្តាលមកពីប្រើប្រាស់សារធាតុញៀនលើកំរិត ហើយឪពុកចុងដែលជាជនសង្ស័យខាងលើតែងតែប្រើអំពើហិង្សាទៅលើប្រពន្ធកូនទៀត ស្ត្រីរងគ្រោះជាកូនតែងតែស្តីបន្ទោស ហើយជនដៃដល់ខឹងជនរងគ្រោះស្តីបន្ទោសនោះ ក៏ទប់កំហឹងមិនបានទាយកាំបិតកាប់សន្ធប់ចំនួន០៥កាំបិត ចំភ្លៅខាងឆ្វេងចំនួន០២កាំបិត ចំភ្លៅស្តាំចំនួន០១កាំបិត ចំត្រចៀកខាងស្តាំចំនួន០១កាំបិត និងចំបោះដៃផុតខាងឆ្វេងចំនួន០១កាំបិតបណ្តាលឲ្យរងរបួសធ្ងន់ធ្ងរ។ប្រជាពលរដ្ឋរាយការណ៍ទៅសមត្ថកិច្ច ក្រោយធ្វើសកម្មភាពរួចជនសង្ស័យដៃដល់បានរត់គេចខ្លួនឡើងទៅពួនសម្ងំ ក្នុងខ្ទមនៅលើដើមស្វាយក្រោយផ្ទះប្រជាជលរដ្ឋ ដោយមានកាន់កាំបិតផ្កាក់ និងកូនកាំបិតចុងស្រួចជាច្រើន ដើម្បីទុកការពារខ្លួនកុំឲ្យសមត្ថកិច្ចទៅឃាត់ខ្លន ។
សមត្ថកិច្ចខេត្តកំពង់ស្ពឺបានបញ្ជាក់បននថែមថា លុះដល់វេលាម៉ោង៩និង១០នាទីព្រឹកថ្ងៃទី១៦ ខែតុលា ឆ្នាំ២០២៥ ជនសង្ស័យដៃដល់បានប្រមូលយកសម្ភារៈ ដុតភ្លើងនៅលើដើមស្វាយចោល រួចយកខ្សែដើម្បីចង-កសម្លាប់ខ្លួន។ពេលឃើញដូចនោះកម្លាំងសមត្ថកិច្ចបានឡើងលើដើមស្វាយទៅជួយកាត់ខ្សែសង្គ្រោះជីវិត។ នៅពេលជួយយកមកដល់ដីហើយជនសង្ស័យ បានខាំអណ្ដាតដើម្បីសម្លាប់ខ្លួន ហើយបានបញ្ជូនមកសង្ក្រោះនៅមន្ទីរពេទ្យបង្អែកខេត្តកំពង់ស្ពឺ លុះរហូតដល់វេលាម៉ោង១១និង៤០នាទីព្រឹកថ្ងៃទី១៦ ខែតុលា ឆ្នាំ២០២៥ សង្ស័យបានស្លាប់នៅមន្ទីរពេទ្យ ។ សមត្ថកិច្ចធ្វើការដកហូតវត្ថុតាង រួមមានកាំបិតផ្គាក់០១.កាំបិត
ស្នៀតចំនួន០៣ និងឧបករណ៍ប្រើប្រាស់គ្រឿងញៀនមួយចំនួនផងដែរ។
តាមការពិនិត្យរបស់នគរបាលជំនាញការិយាល័យបច្ចេកនិងវិទ្យាសាស្ត្រខេត្តកំពង់ស្ពឺ និងគ្រូពេទ្យកោសល្យវិច័យ ស្លាប់ដោយចង-ក។ ក្រោយធ្វើការពិនិត្យសាកសពបុរសខាងលើនគរបាលបានប្រគល់ឲ្យសាច់ញាតិក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ