ខេត្ដព្រៃវែង ៖ កាលពីព្រឹកថ្ងៃទី៣១ ឧសភាកន្លងទៅ មន្ដ្រីដោះស្រាយវិវាទមួយក្រុម មកពីក្រសួងឧស្សាហកម្មរ៉ែ និងថាមពល រួមជាមួយនឹងអាជ្ញាធរដែនដីស្រុកកំពង់ត្របែក បានចុះទៅដោះស្រាយបញ្ហាវិវាទមួយ ដែលបានកើតឡើងជាងមួយឆ្នាំមកហើយនៅផ្សារកអណ្ដើក រវាងប្រជាពលរដ្ឋផ្សារកអណ្តើកនិងរោងសិប្បកម្មផលិតទឹកកក ហ៊ួត អៀង ស្ថិតក្នុងភូមិចំបក់ ឃុំប្រាសាទ ស្រុកកំពង់ត្របែក ។
ខេត្ដព្រៃវែង ៖ កាលពីព្រឹកថ្ងៃទី៣១ ឧសភាកន្លងទៅ មន្ដ្រីដោះស្រាយវិវាទមួយក្រុម មកពីក្រសួងឧស្សាហកម្មរ៉ែ និងថាមពល រួមជាមួយនឹងអាជ្ញាធរដែនដីស្រុកកំពង់ត្របែក បានចុះទៅដោះស្រាយបញ្ហាវិវាទមួយ ដែលបានកើតឡើងជាងមួយឆ្នាំមកហើយនៅផ្សារកអណ្ដើក រវាងប្រជាពលរដ្ឋផ្សារកអណ្តើកនិងរោងសិប្បកម្មផលិតទឹកកក ហ៊ួត អៀង ស្ថិតក្នុងភូមិចំបក់ ឃុំប្រាសាទ ស្រុកកំពង់ត្របែក ។
ការដោះស្រាយបញ្ហាវិវាទខាងលើនេះ កើតឡើងគឺបន្ទាប់ពីមានពាក្យបណ្ដឹងជាបន្ដបន្ទាប់ពីសំណាក់ប្រជាពលរដ្ឋដែលរស់នៅជុំវិញផ្សារកអណ្ដើក ដោយបានដាក់ពាក្យប្ដឹងតាំងពីថ្នាក់ស្រុករហូតដល់ថ្នាក់ខេត្ដ ។ ប៉ុន្ដែរាល់ការដោះស្រាយពីស្ថាប័នជំនាញ និងមន្ដ្រីមូលដ្ឋានទាំងថ្នាក់ស្រុកនិងខេត្ដ គឺពុំមានលទ្ធផលសមស្របដែលអាចធ្វើឱ្យប្រជាពលរដ្ឋទទួលយកបាន ឡើយ ហើយចុងក្រោយបង្អស់នៃពាក្យបណ្ដឹងនេះ ត្រូវបានរុញបន្ដទៅក្រសួងឧស្សាហកម្មរ៉ែ និងថាមពលតែម្ដង ។
បន្ទាប់ពីទទួលបានពាក្យបណ្ដឹងរបស់ប្រជាពលរដ្ឋ ក្រសួងក៏ប្រកាសឱ្យរោងសិប្បកម្មផលិតទឹកកក ហ៊ួត អៀង នេះផ្អាកដំណើរការជាបណ្ដោះអាសន្នរយៈពេល៣ខែ ដើម្បីឱ្យមន្ដ្រីបច្ចេកទេសនៃស្ថាប័នជំនាញចុះទៅត្រួតពិនិត្យពីស្ដង់ដាបច្ចេកទេសនៃគ្រឿងម៉ាស៊ីននៅក្នុងរោងសិប្បកម្មនោះ ហើយក្រោយមកក៏តម្រូវឱ្យម្ចាស់រោងសិប្បកម្មកែតម្រូវគ្រឿងម៉ាស៊ីនមួយចំនួនឱ្យទៅតាមស្ដង់ដា និងដាក់ពាក្យស្នើសុំធ្វើអាជីវកម្មសាជាថ្មី ។ ប៉ុន្ដែរហូតមកដល់បច្ចុប្បន្ននេះ ការជួសជុលកែលម្អរបស់ម្ចាស់សិប្បកម្មនៅតែមិនទាន់អនុលោមទៅតាមស្ដង់ដាដែលកំណត់នៅឡើយ ហើយប្រជាពលរដ្ឋនៅតែមិនអាចទទួលយកបាន ទើបសម្រេចចិត្ដដាក់ពាក្យបណ្ដឹងសុំឱ្យផ្លាស់ប្ដូរទីតាំងរោងសិប្បកម្ម ហ៊ួត អៀង នេះទៅទីតាំងផ្សេងតែម្ដង ។
នៅក្នុងដំណើរការដោះស្រាយបញ្ហាវិវាទនេះ ភាគីវិវាទទាំង២ត្រូវបានអនុញ្ញាតឱ្យឡើងបកស្រាយពីគោលជំហររបស់ខ្លួន និងអំណះអំណាងការពារផងដែរ ។ លោកស្រី ហ៊ួត អៀងម្ចាស់សិប្បកម្មទឹកក ហ៊ួត អៀង បានស្នើសុំបន្ដអាជីវកម្មរបស់ខ្លួនតទៅទៀត ដោយសុខចិត្ដកែសម្រួលគ្រឿងចក្ររបស់ខ្លួនឡើងវិញឱ្យត្រឹមត្រូវតាមស្ដង់ដា ដើម្បីកុំឱ្យប៉ះពាល់ដល់ប្រជាពលរដ្ឋនៅជុំវិញទៀត ។ ដោយឡែកលោក តូច គីម ជាតំណាងប្រជាពលរដ្ឋទាំងអស់នៅផ្សារកអណ្ដើក បានបញ្ជាក់ពីគោលជំហររបស់ខ្លួនថា ពួកគាត់មិនមានជំនឿលើការកែសម្រួលគ្រឿងចក្រអ្វីទៀតទេ ព្រោះកន្លងមក ក្រសួងបានតម្រូវឱ្យម្ចាស់សិប្បកម្មនេះ កែសម្រួលជាច្រើនលើកច្រើនសាមកហើយ ។
ប៉ុន្ដែម្ចាស់សិប្បកម្មមិនធ្វើតាមការកំណត់របស់ក្រសួងឡើយ ហើយនៅតែបង្កផលប៉ះពាល់ដល់ប្រជាពលរដ្ឋដដែល ទើបពួកគាត់ចង់ឱ្យរោងសិប្បកម្មមួយនេះ ប្ដូរទីតាំងទៅកន្លែងផ្សេង ព្រោះនៅពេលសិប្បកម្មនេះបញ្ឆេះម៉ាស៊ីនដំណើរការផលិតទឹកកកម្ដងៗ គឺបានបង្កផលប៉ះពាល់ទៅលើសុខភាព និងការរស់នៅរបស់ពួកគាត់យ៉ាងខ្លាំង ។ តំណាងពលរដ្ឋនិយាយថា សំឡេងរបស់ម៉ាស៊ីនធ្វើឱ្យពួកគាត់មិនអាចសម្រាកបាន ផ្សែង និងម្រែងភ្លើងបានសាយភាយ និងធ្លាក់ទៅលើផ្ទះដែលនៅជុំវិញនោះ ធ្វើឱ្យប្រឡាក់ចាន ឆ្នាំង សម្លៀកបំពាក់ និងរបស់របរប្រើប្រាស់ផ្សេងៗលាងមិនឈ្នះជារៀងរាល់ថ្ងៃ ។
ជាពិសេសគឺក្លិនស្អុយភាយចេញពីកាកសំណល់ក្នុងរោងសិប្បកម្មនេះ រួមទាំងសារធាតុអាម៉ូនីញាក់ ដែលប្រើប្រាស់ធ្វើឱ្យទឹក កកជាទឹកកកនោះ គឺសាយភាយគ្រប់ទីកន្លែងធ្វើឱ្យពិបាកដកដង្ហើមយ៉ាងខ្លាំងរហូតធ្វើឱ្យកូនចៅពួកគាត់ត្រូវដួលសន្លប់ចំនួន២នាក់ និងកើតជំងឺរលាកផ្លូវដង្ហើមត្រូវនាំទៅព្យាបាលនៅមន្ទីរពេទ្យឯភ្នំពេញ ចំនួន២នាក់ទៀតផង នៅមុនពេលរោងសិប្បកម្មនេះត្រូវបានក្រសួងប្រកាសឱ្យផ្អាកដំណើរការ១ខែទៅ២ខែនោះ ។
បន្ទាប់ពីភាគីទាំងពីរបានបង្ហាញពីអ្វីដែលខ្លួនចង់បានហើយនោះ លោកអនុប្រធាននាយកដ្ឋាននៃក្រសួងឧស្សាហកម្មរ៉ែ និងថាមពល ដែលដឹកនាំក្រុមការងារចុះមកដោះស្រាយបញ្ហាវិវាទនោះបានបញ្ជាក់ប្រាប់ភាគីទាំង២ថា នេះជាលើកចុងក្រោយហើយដែលក្រសួងចាត់មន្ដ្រីឱ្យចុះមកដោះស្រាយដោយផ្ទាល់នៅទីតាំងមានទំនាស់ ។
តាមរយៈការអះអាង និងបង្ហាញរបស់ភាគីទាំងពីរ ក្រុមការងាររបស់លោកនឹងធ្វើរបាយការណ៍មួយដាក់ជូនលោករដ្ឋមន្ដ្រីក្រសួងឧស្សាហកម្ម ហើយសិទ្ធិសម្រេចថាឱ្យរោងចក្រសិប្បកម្មទឹកកក ហ៊ួត អៀងនេះបិទឬបើកបន្ដនោះ គឺអាស្រ័យទៅលើលោករដ្ឋមន្ដ្រីជាអ្នកសម្រេច ។ ប៉ុន្ដែបើការសម្រេចរបស់លោករដ្ឋមន្ដ្រីធ្វើឱ្យភាគីណាមួយមិនពេញចិត្ដ ឬមិនទទួលយកបាននោះ បងប្អូនមានសិទ្ធិក្នុងការដាក់ពាក្យប្ដឹងទៅកាន់ស្ថាប័នតុលាការ ។
ទាក់ទិននឹងសិប្បកម្មផលិតទឹកកកនេះ កាលពីខែឧសភា កន្លងមកនោះ នៅឯរាជធានីភ្នំពេញ ក៏មានការតវ៉ាបិទផ្លូវជាតិលេខ៥ទាំងយប់ រហូតដល់ទៅ២ដង ដោយសារតែការជះក្លិនអាសោចិ៍នៃសារធាតុអាម៉ូនីញាក់ បណ្ដាលឱ្យមនុស្សក្មេង ចាស់ប្រុស-ស្រីជាង១០០នាក់បានដួលសន្លប់នាំចូលមន្ទីរពេទ្យ ។ ដោយសារតែការយឺតយ៉ាវក្នុងការដោះស្រាយ សម្ដេចតេជោ ហ៊ុន សែន បានសម្រេចឱ្យបិទសិប្បកម្មនោះតែម្ដង ដោយឱ្យទៅធ្វើកន្លែងថ្មីដែលមិនប៉ះពាល់សុខភាពប្រជាពលរដ្ឋ ៕
ចែករំលែកព័តមាននេះ