ខេត្តពោធិ៍សាត់ ៖ «ក្រោមម្លប់សន្តិភាព»រាជរដ្ឋាភិបាលកម្ពុជា បាននិងកំពុងអភិវឌ្ឍវិស័យទេសចរណ៍របស់ខ្លួនយ៉ាងសកម្ម ដើម្បីទាក់ទាញភ្ញៀវទេសចរជាតិនិងអន្តរជាតិ ឱ្យមកទស្សនាកម្សាន្ត តាមគោលដៅទេសចរណ៍ក្នុងប្រទេស ។ នេះសបញ្ជាក់ឱ្យឃើញថា គោលនយោបាយវិស័យទេសចរណ៍…
ខេត្តពោធិ៍សាត់ ៖ «ក្រោមម្លប់សន្តិភាព»រាជរដ្ឋាភិបាលកម្ពុជា បាននិងកំពុងអភិវឌ្ឍវិស័យទេសចរណ៍របស់ខ្លួនយ៉ាងសកម្ម ដើម្បីទាក់ទាញភ្ញៀវទេសចរជាតិនិងអន្តរជាតិ ឱ្យមកទស្សនាកម្សាន្ត តាមគោលដៅទេសចរណ៍ក្នុងប្រទេស ។ នេះសបញ្ជាក់ឱ្យឃើញថា គោលនយោបាយវិស័យទេសចរណ៍ គឺជាកត្តាដ៏សំខាន់មួយនិងត្រូវបានចាត់ទុកថាជាមាសបៃតង ក្នុងការរួមចំណែកដល់កំណើនសេដ្ឋកិច្ចជាតិ និងការអភិវឌ្ឍសង្គម តាមរយៈការបង្កើតការងារ បង្កើនប្រាក់ចំណូល និងជំរុញការវិនិយោគ ។
ជាក់ស្តែង ដូចជាគោលដៅទេសចរណ៍ថ្មី ស្ពានទី២៨ នៃគម្រោងកសាងផ្លូវជាតិលេខ១០ ដែលជាស្ពានខ្ពស់ជាងគេនៅក្នុងព្រះរាជាណាចក្រកម្ពុជា បានក្លាយជាទីចាប់អារម្មណ៍ថ្មីមួយ សម្រាប់ភ្ញៀវទេសចរក្នុងស្រុក មកពីទីជិតឆ្ងាយ សម្រុកមកលេងកម្សាន្ត ។ អ្នកខ្លះឆ្ពោះទៅសមុទ្រទឹកប្រៃ ខេត្តកោះកុង និងខ្លះទៀតឈប់សម្រាកសំចតនៅឃុំអូរសោម ស្រុកវាលវែង ខេត្តពោធិ៍សាត់ ដែលមានអាកាសធាតុត្រជាក់ និងមានផ្ទៃសមុទ្រទឹកសាបផងដែរ ។
ថ្មីៗនេះ ស្ពានទី២៨ ត្រូវបានរាជរដ្ឋាភិបាលកម្ពុជា ក្រោមការដឹកនាំរបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រី សម្រេចប្រសិទ្ធនាមស្ពានខ្ពស់ជាងគេនៅកម្ពុជានេះថា «ស្ពានតេជោសន្តិភាពឫស្សីជ្រំ» ។ ស្ពានទី២៨ នៃគម្រោងកសាងផ្លូវជាតិលេខ១០ តភ្ជាប់ពីសំឡូត-វាលវែង-កោះកុង មានកម្ពស់៩០ម៉ែត្រ ប្រវែង៥៣៧ម៉ែត្រ និងទទឹង១០ម៉ែត្រ សណ្តូកខ្លួនឆ្លងកាត់ស្ទឹងឫស្សីជ្រំ ស្ថិតក្នុងភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ ។
ស្ពានខ្ពស់ជាងគេនៅកម្ពុជានេះកសាងដោយប្រើប្រាស់ថវិកាជាតិសរុបប្រមាណ២៥លានដុល្លារ កសាងដោយក្រុមហ៊ុន CRBC និងត្រួតពិនិត្យបច្ចេកទេសដោយក្រុមហ៊ុនក្វាងចូវវ៉ាងអាន ។បច្ចុប្បន្ន ស្ពាននេះត្រូវបានបើកឱ្យប្រជាពលរដ្ឋឆ្លងកាត់ជាអចិន្ត្រៃយ៍ កាលពីថ្ងៃទី១៥ ខែឧសភា ឆ្នាំ២០២៥កន្លងទៅ ក្រោយពេលវឌ្ឍនភាពការតភ្ជាប់ធ្នឹមស្ពាន និងគម្រោងកសាងផ្លូវជាតិលេខ១០ សម្រេចលទ្ធផល១០០% ។
បងប្អូនប្រជាពលរដ្ឋដែលជាអ្នកទេសចរ អាចធ្វើដំណើរឆ្លងកាត់ ឈប់ថតរូប ទស្សនាកម្សាន្ត ជាមួយនឹងទិដ្ឋភាពស្ពានខ្ពស់ត្រដែត អមដោយព្រៃព្រឹក្សាខៀវស្រងាត់ មានអ័ព្ទត្រជាក់ភ្នែក ពិសេសឆ្លងកាត់ស្ទឹងឫស្សីជ្រំនៃគម្រោងវារីអគ្គិនី ជាធុងអាគុយនៃព្រះរាជាណាចក្រកម្ពុជា ។
ក្នុងបេសកកម្ម ដឹកនាំក្រុមការងារចុះដាំកូនក្ងោកដើម្បីលម្អនៅតាមសងខាងផ្លូវ និងរៀបចំសណ្តាប់ធ្នាប់ក្បែរស្ពានលេខ២៨ ក្នុងឃុំអូរសោម ស្រុកវាលវែង កាលពីថ្ងៃទី២២ ខែមិថុនា ឆ្នាំ២០២៥កន្លងទៅ ឯកឧត្តម ខូយ រីដា អភិបាលខេត្តពោធិ៍សាត់ បានស្វាគមន៍យ៉ាងកក់ក្តៅចំពោះភ្ញៀវទេសចរ ដែលបានមកកម្សាន្តនៅទឹកដីខេត្តពោធិ៍សាត់ ដោយគូសបញ្ជាក់ថា «សន្តិភាព» គឺមានសារៈសំខាន់លើសអ្វីៗទាំងអស់ បើគ្មានសន្តិភាព យើងក៏គ្មានឱកាសបានដើរហើរ និងគ្មានឱកាសកសាងជាតិបានទេ ។
ដូច្នេះហើយ បានជាសម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃកម្ពុជា និងបន្តដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រី គឺសម្តេចប្តេជ្ញាបន្តថែរក្សាការពារសន្តិភាព និងស្ថិរភាពពេញលេញ ទោះក្នុងតម្លៃណាក៏ដោយ ។
បងប្អូនពុកម៉ែប្រជាពលរដ្ឋ បានថ្លែងអំណរគុណប្រមុខរាជរដ្ឋាភិបាលកម្ពុជា និងថ្នាក់ដឹកនាំគ្រប់លំដាប់ថ្នាក់ ដែលបានអភិវឌ្ឍកែប្រែតំបន់មួយនេះឱ្យមានភាពទាក់ទាញ ជាទីចាប់អារម្មណ៍សម្រាប់ទេសចរជាតិ និងអន្តរជាតិ និងបានចាត់ទុកថា «ទេសចរណ៍ រស់ក្នុងសន្តិភាព ទេសចរណ៍ក្នុងស្រុក ដើម្បីលើកស្ទួយសហគមន៍យើង» ៕
ចែករំលែកព័តមាននេះ