សហរដ្ឋអាមេរិក ៖ នៅថ្ងៃទី២៤ ខែមិថុនា ឆ្នាំ២០២៥ តម្លៃប្រេងឆៅបានធ្លាក់ចុះយ៉ាងខ្លាំងដល់កម្រិតទាបបំផុតក្នុងរយៈពេលជាង១សប្តាហ៍ ស្របពេលតម្លៃមាសក៏បានធ្លាក់ចុះដល់កម្រិតទាបនៅក្នុងរយៈពេលជិត២សប្តាហ៍ផងដែរ បន្ទាប់ពីប្រធានាធិបតីអាមេរិក លោក ដូណាល់…
សហរដ្ឋអាមេរិក ៖ នៅថ្ងៃទី២៤ ខែមិថុនា ឆ្នាំ២០២៥ តម្លៃប្រេងឆៅបានធ្លាក់ចុះយ៉ាងខ្លាំងដល់កម្រិតទាបបំផុតក្នុងរយៈពេលជាង១សប្តាហ៍ ស្របពេលតម្លៃមាសក៏បានធ្លាក់ចុះដល់កម្រិតទាបនៅក្នុងរយៈពេលជិត២សប្តាហ៍ផងដែរ បន្ទាប់ពីប្រធានាធិបតីអាមេរិក លោក ដូណាល់ ត្រាំ (Donald Trump) បានប្រកាសអំពីបទឈប់បាញ់មួយត្រូវបានព្រមព្រៀងគ្នារវាងអ៊ីរ៉ង់ និងអ៊ីស្រាអែល។ នេះបើយោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយ។
ការប្រកាសរបស់លោក ត្រាំ បានជួយកាត់បន្ថយការព្រួយបារម្ភពីការរំខានការផ្គត់ផ្គង់ប្រេងនៅតំបន់មជ្ឈិមបូព៌ា ដែលជាតំបន់ផលិតប្រេងដ៏សំខាន់មួយ ព្រមទាំងជួយកាត់បន្ថយតម្រូវការលោហធាតុមាស ដែលជាទ្រព្យសម្បត្តិដ៏មានសុវត្ថិភាពបំផុត ប្រឆាំងនឹងភាពមិនប្រាកដប្រជាភូមិសាស្ត្រនយោបាយ។
អនាគតប្រេងឆៅម៉ាក Brent ដែលជាប្រេងស្តង់ដារពិភពលោក បានធ្លាក់ចុះដល់ ២,០៨ដុល្លារ ឬ ២,៩% នៅត្រឹមតម្លៃ ៦៩,៤០ដុល្លារក្នុង១បារ៉ែលនៅម៉ោងជាង១០ព្រឹកថ្ងៃទី២៤ ខែមិថុនា (ម៉ោងនៅកម្ពុជា) បន្ទាប់ពីធ្លាក់ចុះមុនជាង ៤% និងឈានដល់កម្រិតទាបបំផុតចាប់តាំងពីថ្ងៃទី១១ ខែមិថុនា។ ប្រេងឆៅអាមេរិក West Texas Intermediate (WTI) បានធ្លាក់ចុះ ២,០៣ដុល្លារ ឬ ៣% មកនៅត្រឹម ៦៦,៤៨ដុល្លារក្នុង១បារ៉ែល ដោយបានធ្លាក់ចុះ ៦% ដល់កម្រិតទាបបំផុតចាប់តាំងពីថ្ងៃទី៩ ខែមិថុនា នៅក្នុងការជួញដូរព្រឹកព្រលឹមថ្ងៃដដែល។
ស្របពេលតម្លៃមាស បានធ្លាក់ចុះ ០,៩% មកនៅត្រឹម ៣ ៣៣៨ដុល្លារក្នុង១អោន ឬស្មើនឹង ៤ ០២១ដុល្លារក្នុង១តម្លឹង គិតត្រឹមម៉ោង១២ថ្ងៃត្រង់ ម៉ោងនៅកម្ពុជា បន្ទាប់ពីបានធ្លាក់ចុះដល់កម្រិតទាបបំផុត ចាប់តាំងពីថ្ងៃទី១១ ខែមិថុនា ក្នុងការជួញដូរព្រឹកព្រលឹមថ្ងៃដដែល។
លោក ត្រាំ បានប្រកាសកាលពីថ្ងៃទី២៣ ខែមិថុនា ថា អ៊ីស្រាអែល និងអ៊ីរ៉ង់បានយល់ព្រមទាំងស្រុងលើបទឈប់បាញ់មួយ ដោយបន្ថែមទៀតថា អ៊ីរ៉ង់នឹងចាប់ផ្តើមបទឈប់បាញ់ភ្លាមៗ បន្ទាប់មកគឺអ៊ីស្រាអែលនៅ១២ម៉ោងក្រោយ។ ប្រសិនបើភាគីទាំងសងខាងរក្សាភាពស្ងប់ស្ងាត់បាននោះមានន័យថា សង្គ្រាមនឹងបញ្ចប់ជាផ្លូវការក្រោយរយៈពេល២៤ម៉ោង ដោយបញ្ចប់ជម្លោះរយៈពេល១២ថ្ងៃ។
អ្នកវិភាគទីផ្សារជាន់ខ្ពស់នៅក្រុមហ៊ុន Phillip Nova បានអះអាងថា ប្រសិនបើបទឈប់បាញ់ត្រូវបានអនុវត្តតាមការប្រកាសពិតប្រាកដមែន នោះវិនិយោគិនអាចរំពឹងថានឹងវិលទៅរកភាពប្រក្រតីវិញ សម្រាប់ទីផ្សារប្រេង ក៏ដូចជានឹងដើរតួយ៉ាងសំខាន់ក្នុងការកំណត់តម្លៃប្រេងពិភពលោកផងដែរ។ ទោះយ៉ាងណាក៏ដោយ អ្នកវិនិយោគនៅតែបន្តតាមដានស្ថានការណ៍មួយនេះ យ៉ាងយកចិត្តទុកដាក់ជាទីបំផុត។
អ៊ីរ៉ង់ជាប្រទេសផលិតប្រេងឆៅធំជាងគេទី៣ របស់អង្គការ OPEC ហើយការបន្ធូរបន្ថយភាពតានតឹងនឹងអនុញ្ញាតឱ្យប្រទេសនេះ នាំចេញប្រេងកាន់តែច្រើន និងការពារការរំខានការផ្គត់ផ្គង់ ដែលជាកត្តាសំខាន់នៃការកើនឡើងតម្លៃប្រេងឆៅក្នុងប៉ុន្មានថ្ងៃថ្មីៗនេះ។
តម្លៃប្រេងឆៅ Brent បានកើនឡើងដល់ ៨១,៤០ដុល្លារក្នុង១បារ៉ែល កាលពីព្រឹកថ្ងៃទី២៣ ខែមិថុនា កន្លងទៅ ដែលជាការកើនឡើងដល់កម្រិតខ្ពស់បំផុតក្នុងរយៈពេលប្រាំខែ បន្ទាប់ពីអាមេរិកបានវាយប្រហារទីតាំងនុយក្លេអ៊ែរសំខាន់ៗអ៊ីរ៉ង់ កាលពីចុងសប្តាហ៍មុន ដោយបង្កឱ្យមានការភ័យខ្លាចនៃការរីករាលដាលនៅក្នុងជម្លោះអ៊ីស្រាអែល និងអ៊ីរ៉ង់។ ដោយពេលនោះបានបង្កើតឱ្យមានការភ័យខ្លាចកាន់តែខ្លាំងថា ការសងសឹករបស់អ៊ីរ៉ង់អាចរួមបញ្ចូលទាំងការបិទច្រកសមុទ្រ Hormuz ខណៈការដឹកជញ្ជូនតាមរយៈច្រកសមុទ្រមួយនេះមានប្រហែលមួយភាគប្រាំនៃលំហូរផ្គត់ផ្គង់ប្រេងសកល៕
ចែករំលែកព័តមាននេះ