ទីក្រុងប៉េកាំង ៖ កំណើនសេដ្ឋកិច្ចប្រទេសចិនបានយកឈ្នះលើការរំពឹងទុករបស់បណ្តាសេដ្ឋវិទូ បើទោះបីជាពន្ធគយរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ព្រមទាំងវិបត្តិអូសបន្លាយនៅក្នុងទីផ្សារអចលនទ្រព្យរបស់ខ្លួន…
ទីក្រុងប៉េកាំង ៖ កំណើនសេដ្ឋកិច្ចប្រទេសចិនបានយកឈ្នះលើការរំពឹងទុករបស់បណ្តាសេដ្ឋវិទូ បើទោះបីជាពន្ធគយរបស់ប្រធានាធិបតីអាមេរិក លោក ដូណាល់ ត្រាំ (Donald Trump) ព្រមទាំងវិបត្តិអូសបន្លាយនៅក្នុងទីផ្សារអចលនទ្រព្យរបស់ខ្លួន ដែលមានទម្ងន់លើកំណើនយ៉ាងណាក៏ដោយ។
ប្រភពពីទីភ្នាក់ងារសារព័ត៌មាន Reuters និង BBC ចេញផ្សាយនៅថ្ងៃទី១៥ ខែកក្កដា ឆ្នាំ២០២៥ បានឱ្យដឹងថា តួលេខផ្លូវការបង្ហាញថា សេដ្ឋកិច្ចរបស់ប្រទេសចិនបានកើនឡើង ៥,២% នៅក្នុងត្រីមាសនៃខែមេសាដល់ខែមិថុនា បើធៀបនឹងរយៈពេលដូចគ្នាកាលពីឆ្នាំមុន ដោយធ្លាក់ចុះពី ៥,៤% ក្នុងត្រីមាសទី១ ប៉ុន្តែនោះល្អជាងការព្យាករណ៍ ៥,១% ដោយសេដ្ឋវិទូជាច្រើន។
រហូតមកដល់ពេលនេះ ប្រទេសសេដ្ឋកិច្ចធំទី២ពិភពលោកមួយនេះ បានជៀសផុតពីការធ្លាក់ចូលក្នុងវិបត្តិសេដ្ឋកិច្ច ដែលមួយផ្នែកដោយសារវិធានការរបស់រដ្ឋាភិបាល ដើម្បីជួយទ្រទ្រង់សេដ្ឋកិច្ច និងដំណើរការចរចាលើកិច្ចព្រមព្រៀងពាណិជ្ជកម្មជាមួយអាមេរិក។ ការិយាល័យស្ថិតិជាតិរបស់ចិនលើកឡើងនៅក្នុងសេចក្តីថ្លែងការណ៍មួយថា សេដ្ឋកិច្ចទប់ទល់ជាមួយសម្ពាធ និងធ្វើឱ្យមានភាពប្រសើរឡើងជាលំដាប់ បើទោះបីជាមានបញ្ហាប្រឈមមួយចំនួនយ៉ាងណាក៏ដោយ។
ក្រុមមន្ត្រីចិនអះអាងថា កំណើនសេដ្ឋកិច្ចត្រូវបានជំរុញដោយការពង្រីកផលិតកម្មក្នុងអត្រា ៦,៤% ជាមួយនឹងតម្រូវការខ្ពស់សម្រាប់ឧបករណ៍បោះពុម្ព 3D រថយន្តអគ្គិសនី និងមនុស្សយន្តឧស្សាហកម្ម។ ទន្ទឹមជាមួយគ្នានោះ វិស័យផ្តល់សេវាកម្មរបស់ប្រទេសចិន ដែលរួមមានដូចជា ការដឹកជញ្ជូន ហិរញ្ញវត្ថុ និងបច្ចេកវិទ្យា ក៏បានផលចំណេញគួរឱ្យកត់សម្គាល់ផងដែរ។ ទោះយ៉ាងណាក៏ដោយ នៅក្នុងខែមិថុនា កំណើនការលក់រាយបានថយចុះមកត្រឹម ៤,៨% ធៀបនឹងឆ្នាំមុន និងទាបជាងបើធៀបនឹងការកើនឡើង ៦,៤% កាលពីខែឧសភាកន្លងទៅ។
តួលេខផ្លូវការនៅថ្ងៃទី១៥ ខែកក្កដា ឆ្នាំ២០២៥ ក៏បានបង្ហាញពីការធ្លាក់ចុះតម្លៃផ្ទះថ្មីនៅក្នុងប្រទេសចិនក្នុងខែមិថុនា ដោយបានធ្លាក់ចុះក្នុងអត្រាប្រចាំខែលឿនបំផុតនៅក្នុងរយៈពេល៨ខែ។ ទិន្នន័យនេះបង្ហាញថា វិស័យអចលនទ្រព្យចិនកំពុងបន្តជួបការលំបាក បើទោះបីជាមានវិធានការជាច្រើន ដើម្បីគាំទ្រតម្លៃអចលនទ្រព្យក៏ដោយ។
សេដ្ឋវិទូមកពីសាកលវិទ្យាល័យជាតិសិង្ហបុរីបានរំពឹងថា នឹងមានផលប៉ះពាល់កាន់តែធំពីពន្ធគយលើសេដ្ឋកិច្ចរបស់ប្រទេសចិន ប៉ុន្តែប្រទេសយក្សអាស៊ីមួយនេះ នៅតែមានភាពធន់ខ្ពស់ប្រឈមនឹងបញ្ហានេះ។ សេដ្ឋវិទូបានបន្ថែមថា កំណើនត្រូវបានជំរុញដោយការនាំចេញជាចម្បង ដោយសារបណ្តាក្រុមហ៊ុនប្រញាប់ប្រញាល់ដឹកជញ្ជូនទំនិញ មុនពេលពន្ធថ្មីរបស់លោក ត្រាំ ឬការផ្លាស់ប្តូរយុទ្ធសាស្ត្រនាំចេញរបស់ចិនចូលជាធរមាន។
គួររំលឹកថា សង្គ្រាមពន្ធគយរវាងប្រធានាធិបតីចិន លោក ស៊ី ជិនភីង (Xi Jinping) និងលោក ត្រាំ បាននាំឱ្យអាមេរិកដាក់ពន្ធលើការនាំចូលរបស់ចិនរហូតដល់ ១៤៥% ហើយជាការសងសឹក ចិនបានប្រកាសពន្ធ ១២៥% លើទំនិញមួយចំនួនរបស់អាមេរិក។ ទោះយ៉ាងណាក៏ដោយ ពន្ធគយទៅវិញទៅមករវាងយក្សសេដ្ឋកិច្ចទាំងពីរត្រូវបានផ្អាក បន្ទាប់ពីការចរចានៅទីក្រុងហ្សឺណែវ ប្រទេសស្វីស និងទីក្រុងឡុងដ៍ ចក្រភពអង់គ្លេស ខណៈដែលឥឡូវនេះ ភាគីទាំងពីរមានពេលរហូតដល់ថ្ងៃទី១២ ខែសីហា ឆ្នាំ២០២៥ សម្រាប់ចរចាដើម្បីឈានសម្រេចបានកិច្ចព្រមព្រៀងពាណិជ្ជកម្មរយៈពេលវែង៕
ចែករំលែកព័តមាននេះ