ទីក្រុងយេរូសាឡឹម៖ នៅទីបំផុត នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ប្រកាសទទួលយកបទឈប់បាញ់ដែលផ្ដួចផ្ដើមឡើងដោយលោកត្រាំហើយ។ ការទទួលយកនេះធ្វើឡើងបន្ទាប់ពីអ៊ីស្រាអែលអះអាងថាខ្លួនធ្វើបានសម្រេចនូវផែនការបោសសម្អាតអ្វីដែលជាការគំរាមកំហែងចំពោះសន្តិសុខជាតិរបស់ខ្លួន។ នោះគឺកម្មវិធីនុយក្លេអ៊ែរ និងមីស៊ីលរបស់អ៊ីរ៉ង់។ ប៉ុន្មានម៉ោងមុនពេលបទឈប់បាញ់ចូលជាធរមាន…
ទីក្រុងយេរូសាឡឹម៖ នៅទីបំផុត នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ប្រកាសទទួលយកបទឈប់បាញ់ដែលផ្ដួចផ្ដើមឡើងដោយលោកត្រាំហើយ។ ការទទួលយកនេះធ្វើឡើងបន្ទាប់ពីអ៊ីស្រាអែលអះអាងថាខ្លួនធ្វើបានសម្រេចនូវផែនការបោសសម្អាតអ្វីដែលជាការគំរាមកំហែងចំពោះសន្តិសុខជាតិរបស់ខ្លួន។ នោះគឺកម្មវិធីនុយក្លេអ៊ែរ និងមីស៊ីលរបស់អ៊ីរ៉ង់។
ប៉ុន្មានម៉ោងមុនពេលបទឈប់បាញ់ចូលជាធរមាន គេស្ដាប់ឮសំឡេងស៊ីរ៉ែនប្រកាសអាសន្នស្រែកកងរំពងពាសពេញប្រទេសអ៊ីស្រាអែល។ មីស៊ីលមួយគ្រាប់របស់អ៊ីរ៉ង់ផ្លោងត្រូវចំទីក្រុងបៀស៊ីបា (Beersheba) បណ្ដាលឱ្យស្លាប់មនុស្ស៣នាក់។ នៅម៉ោង៥:០៩ ម៉ោងសាកលនៃថ្ងៃអង្គារ លោកត្រាំបង្ហោះសារនៅលើបណ្ដាញសង្គមដើម្បីបញ្ជាក់ថាបទឈប់បាញ់ចាប់ផ្ដើមចូលជាធរមានហើយ។ លោកសូមជំរុញឱ្យភាគីទាំង២ អ៊ីរ៉ង់ និងអ៊ីស្រាអែលកុំរំលោភលើបទឈប់បាញ់នេះឱ្យសោះ។
ទីភ្នាក់ងារព័ត៌មានអ៊ីរ៉ង់ផ្សាយថាអ៊ីរ៉ង់បានបាញ់មីស៊ីលគ្រាប់ចុងក្រោយមុនពេលបទឈប់បាញ់ចូលជាធរមាន។ ខុទ្ទកាល័យរបស់លោកណឺតាន់យ៉ាហ៊ូអរគុណលោកត្រាំដែលជួយជ្រោមជ្រែងផ្នែកយោធា និងចូលរួមចំណែកបោសសម្អាតកម្មវិធីនុយក្លេអ៊ែររបស់អ៊ីរ៉ង់។ បន្ទាប់ពីអ៊ីស្រាអែលសម្រេចតាមផែនការរបស់ខ្លួន និងតបទៅតាមសំណើរបស់លោកត្រាំ អ៊ីស្រាអែលឯកភាពទទួលបទឈប់បាញ់នេះ។
លោកណឺតាន់យ៉ាហ៊ូត្រៀមថ្លែងសុន្ទរកថាទៅកាន់ជនរួមជាតិនៅល្ងាចថ្ងៃអង្គារ។ លោកព្រមានទុកជាមុនថាបើសិនអ៊ីរ៉ង់រំលោភបទឈប់បាញ់នេះ លោកនឹងឆ្លើយតបយ៉ាងខ្លាំងក្លាបំផុត។ អ៊ីស្រាអែលបានរួមកម្លាំងគ្នាជាមួយអាមេរិកវាយប្រហារទីតាំងដែលសង្ស័យថាមានលាក់ទុកវត្ថុធាតុផ្សំសម្រាប់ផលិតអាវុធនុយក្លេអ៊ែរ។
កាលពីថ្ងៃអាទិត្យ ត្រាំបញ្ជាឱ្យទម្លាក់គ្រាប់បែក និងបាញ់មីស៊ីលដាក់ទីតាំងបីកន្លែង។ អ៊ីរ៉ង់តែងតែបដិសេធជានិច្ចថាខ្លួនគ្មានមហិច្ឆតាផលិតនុយក្លេអ៊ែរទេ។ អគ្គមគ្គុទ្ទេសក៍អ៊ីរ៉ង់បញ្ជាក់ថាបើសិនអ៊ីរ៉ង់ចង់ធ្វើដូច្នេះមែន គ្មាននរណាអាចហាមឃាត់បានឡើយ៕
ចែករំលែកព័តមាននេះ