រាជធានីភ្នំពេញ ៖ ខណៈវិវាទជាមួយប្រទេសថៃ កំពុងតែមានភាពតានតឹងនៅតាមតំបន់ព្រំដែនរហូតដល់បិទព្រំដែនមួយចំនួន សម្តេចបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានបញ្ជាក់ថា ខ្ញុំបញ្ជា ខ្ញុំជាអ្នកទទួលខុសត្រូវ…
រាជធានីភ្នំពេញ ៖ ខណៈវិវាទជាមួយប្រទេសថៃ កំពុងតែមានភាពតានតឹងនៅតាមតំបន់ព្រំដែនរហូតដល់បិទព្រំដែនមួយចំនួន សម្តេចបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានបញ្ជាក់ថា ខ្ញុំបញ្ជា ខ្ញុំជាអ្នកទទួលខុសត្រូវ ពីព្រោះនៅកម្ពុជាមិនមែនឱ្យថ្នាក់ ក្រោមធ្វើ អ្វីស្រេចតែចិត្តនោះទេ» ពោលគឺនៅប្រទេសកម្ពុជាខុសពីប្រទេសថៃ ។ នៅកម្ពុជានាយករដ្ឋមន្ត្រីបញ្ជាបែបណា គឺត្រូវតែអនុវត្តបែបនោះ ខុសពីថៃ នាយករដ្ឋមន្ត្រីនិយាយផ្សេង យោធាធ្វើផ្សឹង ។
ការលើកឡើងរបស់សម្តេចបវរធិបតីប្រមុខនៃរាជរដ្ឋាភិបាលកម្ពុជា គឺបន្ទាប់ពីសម្តេចបានសម្រេចបិទព្រំដែននៅខេត្តឧត្ដរមានជ័យ និងកំពុងពិចារណាក្នុងការបិទព្រំដែនអានសេះ និងថា បើកាលណាកម្ពុជាបិទហើយ គឺរង់ចាំដល់ថៃបើកដំណើរការធម្មតាដូចថ្ងៃទី៧ មិថុនា ទើបកម្ពុជាបើកដំណើរឡើងវិញ ។
សម្ដេចបវរធិបតី ហ៊ុន ម៉ាណែត ថ្លែងក្នុងពិធីបិទកិច្ចប្រជុំគណៈកម្មាធិការកណ្តាលស.ស.យ.ក នៅសណ្ឋាគារសុខាសៀមរាប កាលពីថ្ងៃទី២៣ ខែមិថុនា ឆ្នាំ២០២៥ បានលើកឡើងថា នៅកម្ពុជាមានតែរដ្ឋាភិបាលមួយគត់ តែមានសិទ្ធិសម្រេចគ្រប់យ៉ាងរាប់ទាំងការបញ្ជាទ័ព ពោល គឺសំឡេងតែមួយ ប៉ុន្តែនៅប្រទេសថៃវិញ រាជរដ្ឋាភិបាល និងនាយករដ្ឋមន្ត្រីគ្មានសិទ្ធិបញ្ជាការងារនោះឡើយ ។
សម្តេចបវរធិបតីបានគូសបញ្ជាក់ថា៖ «ខ្ញុំបញ្ជា ខ្ញុំជាអ្នកទទួលខុសត្រូវ ពីព្រោះនៅកម្ពុជា មិនមែនឱ្យថ្នាក់ក្រោមធ្វើអ្វីស្រេចតែចិត្តនោះទេ មិនមែននៅប្រទេសខ្លះ នាយករដ្ឋ មន្ត្រីនិយាយ តែទាហានធ្វើផ្សេងនោះទេ ។ ខ្ញុំមិនមែនជាអ្នកទៅបំផុសស្មារតីជាតិនិយមនោះទេ ខ្ញុំគ្រាន់តែធ្វើការតាមអ្វីដែលប្រជាជនបោះឆ្នោតឱ្យខ្ញុំធ្វើនោះទេ គឺដឹកនាំបប្រទេសនៅគ្រាហ៍លំបាកដោះស្រាយនៅពេលជួបបញ្ហា»។
សម្តេចបវរធិបតី ហ៊ុន ម៉ាណែត បានសង្កត់ធ្ងន់ទៅភាគីថៃ សូមកុំមកចោទប្រកាន់សម្តេចថា ជាអ្នកលេងល្បែងជាតិនិយម ដើម្បីទាញប្រជាប្រិយភាពឱ្យសោះ ការសម្រេចចិត្តរបស់រាជរដ្ឋាភិបាលកម្ពុជា គឺធ្វើឡើងតាមឆន្ទៈរបស់ប្រជាជនទូទាំងប្រទេសតែប៉ុណ្ណោះ ។ ហើយការសម្រេចចិត្តឆ្លើយតបទៅនឹងការគំរាមកំហែងពីសំណាក់បរទេសជិតខាង គឺជាសម្រេចចិត្តដ៏ត្រឹមត្រូវ ដើម្បីការពារអធិបតេយ្យភាពទឹកដី និងបម្រើឧត្តមប្រយោជន៍របស់កម្ពុជា ក្នុងនាមជានាយករដ្ឋមន្ត្រី ដែលប្រជាពលរដ្ឋបានផ្តល់នូវសេចក្តីទុកចិត្តក្នុងការងារកាច់ចង្កូតនាវាកម្ពុជា ។
សម្តេចបវធិបតី ហ៊ុន ម៉ាណែត បានគូសបញ្ជាក់ថា សម្តេចតេជោ ហ៊ុន សែន ក្នុងនាមជាប្រធានគណបក្សកាន់អំណាច និងនាមខ្ញុំជានាយករដ្ឋមន្ត្រីរបស់កម្ពុជា បែបជាសម្ងំយកសុខ នៅពេលដែលប្រទេសជាតិជួបនឹងការលំបាកដោយសារតែបរទេសមានបំណងឈ្លានពាន គឺមិនអាចធ្វើទៅរួចនោះទេ។ ដោយឡែក សម្រាប់ស្មារតីជាតិ ស្នេហាជាតិផុសឡើងទូទាំងប្រទេសកម្ពុជានៅឈរពីក្រោយខ្នងរាជរដ្ឋាភិបាល ក្រោមដឹកនាំរបស់គណបក្សប្រជាជនកម្ពុជា គឺដោយសារតែរាជរដ្ឋាភិបាល បំពេញកាតព្វកិច្ចនានា ក្នុងបុព្វហេតុជាតិ បូរណភាពទឹកដីរបស់កម្ពុជាតែប៉ុណ្ណោះ ។
ខណៈដែលបញ្ហាតំបន់ព្រំដែនជាមួយថៃកំពុងមានស្ថានភាពក្តៅសម្តេចបវរធិបតី ហ៊ុន ម៉ាណែត បានបន្ថែមថា រាល់វិធានការដែលសម្តេចបានដាក់ចេញ គឺសម្តេចជាអ្នកទទួលខុសត្រូវ ដូច្នេះ សូមមន្ត្រីអនុវត្តទាំងអស់កុំខ្លាចនឹងការអនុវត្តឱ្យសោះ។ ការបំពេញភារកិច្ចរបស់ថ្នាក់ ដឹកនាំរាជរដ្ឋាភិបាល គឺធ្វើឡើងដើម្បីជាតិ មាតុភូមិ ពីការប្រមាថមើលងាយពីសំណាក់បរទេសជិតតែប៉ុណ្ណោះ ៕
ចែករំលែកព័តមាននេះ