សង្គ្រាមអីុស្រាអែល-អីុរ៉ង់ ៖ អ្វីៗសុទ្ធតែត្រូវបានគិតគូរម៉ត់ចត់។ ជាការសងសឹកចំពោះការវាយប្រហារកាលពីថ្ងៃទី២២មិថុនា របស់អាមេរិកប្រឆាំងបណ្ដាទីតាំងនុយក្លេអ៊ែររបស់ខ្លួន អីុរ៉ង់អះអាងនាថ្ងៃទី២៣មិថុនាថាបានបាញ់មីសីុលលើមូលដ្ឋានយោធាអាមេរិកAL-UDEIDក្នុងប្រទេសកាតា ដែលជាមូលដ្ឋានយោធាអាមេរិកធំជាងគេនៅមជ្ឈឹមបូព៌៌ា។ ប៉ុន្តែមុនការវាយប្រហារនោះ អីុរ៉ង់បានគិតល្អិតល្អន់ចំពោះការតបតរបស់ខ្លួន។ ទិសដៅគឺកម្រិតការបាត់បង់អាយុជីវិតមនុស្ស ដើម្បីចៀសវាងភាពតានតឹងកាន់តែខ្លាំងក្នុងតំបន់ និងចៀសវាងការជីកកប់លទ្ធភាពនៃការបន្ធូរបន្ថយភាពតានតឹង។
ប្រភព៣ជិតដិតនឹងរបបអីុរ៉ង់បានពន្យល់ប្រាប់ដល់កាសែតញូវយ៉កថែមថា អាជ្ញាធរអីុរ៉ង់បានប្រាប់កាតាឲ្យដឹងមុនការបាញ់មីសីុល ៦គ្រាប់ ដើម្បីឲ្យកាតាមានពេលរៀបចំខ្លួន។ អ្នកទទួលខុសត្រូវអាមេរិកម្នាក់ក៏ថ្លែងទៅកាន់ទូរទស្សន៍CNN ថា ពុំមានជនជាតិអាមេរិកណាម្នាក់រងរបួសឬស្លាប់ក្នុងការវាយប្រហារនេះឡើយ។ អាមេរិកក៏ដូចជាកាតាដែរ ត្រូវបានអីុរ៉ង់ប្រាប់ឲ្យដឹងជាមុន ទើបអាមេរិកអាចដកបណ្ដាយន្តហោះខ្លួនចេញពីមូលដ្ឋានអាកាសចរណ៍នោះទាន់ពេល។ បណ្ដាអ្នកទទួលខុសត្រូវអីុរ៉ង់ក៏បានប្រាប់ដល់កាសែតញូវយ៉កថែមទៀតថា ក្រុងតេហេរ៉ង់គ្រាន់តែចង់តបតជានិម្មិត្តរូបប៉ុណ្ណោះចំពោះអាមេរិក តែមិននាំឲ្យមានការខូចខាតធំដុំចៀសវាងធ្វើឲ្យសភាពការណ៍កាន់តែធ្ងន់ធ្ងរថែមទៀតនៅមជ្ឈឹមបូព៌៌ា។ អីុរ៉ង់ក៏ថ្លែងដែរថា ចំនួនមីសីុលដែលបាញ់ទៅគឹស្មើគ្នានឹងចំនួនគ្រាប់បែកដែលអាមេរិកវាយប្រហារបណ្ដាទីតាំងនុយក្លេអ៊ែររបស់ខ្លួនកាលពីចុងសប្ដាហ៍កន្លងទៅ។
ក្រុមប្រឹក្សាសន្តិសុខជាតិជាន់ខ្ពស់អីុរ៉ង់ អះអាងក្នុងសេចក្ដីប្រកាសមួយដកស្រង់ដោយទីភ្នាក់ងារព័ត៌មានអាមេរិកAPថា ឆន្ទះរបស់អីុរ៉ង់ធ្វើមិនឲ្យមានជនរងគ្រោះ។ ម្យ៉ាងទៀតមូលដ្ឋានយោធាអាមេរិកដែលវាយប្រហារនោះស្ថិតនៅឆ្ងាយដាច់ពីតំបន់មានប្រជាជនរស់នៅនៃប្រទេសកាតា។ សកម្មភាពនោះមិនតំណាងឲ្យគ្រោះថ្នាក់ណាមួយ សម្រាប់ប្រជាជាតិជាមិត្តនិងជាបងប្អូនកាតានិងប្រជាជនប្រទេសនេះ។ អីុរ៉ង់នៅតែប្ដេជ្ញាចិត្តថែរក្សានិងបន្តទំនាក់ទំនងដ៏កក់ក្ដៅនិងជាប្រវត្តិសាស្ត្រជាមួយកាតា។
លោកត្រាំអរគុណអីុរ៉ង់
ប្រធានាធិបតីអាំមេរិកលោកដូណាល់ត្រាំបានទទួលស្គាល់យុទ្ធសាស្ត្របែបនេះរបស់អីុរ៉ង់ និងរហូតដល់អរគុណអីុរ៉ង់ទៀតផង ដោយលោកថាអីុរ៉ង់បានប្រាប់យើងឲ្យដឹងមុន ដែលអាចចៀសវាងការបាត់បង់ជីវិតមនុស្ស និងគ្មានមនុស្សរងរបួស។ លោកថាបែបនេះបង្ហាញថាអីុរ៉ង់ចង់ដើរលើផ្លូវសន្តិភាព និងភាពសុខសាន្តរបស់តំបន់ ហើយខ្ញុំនឹងលើកទឹកចិត្តអីុស្រាអែលឲ្យធ្វើដូចគ្នានេះដែរ។ ក្នុងសារតាមបណ្ដាញសង្គមលោកត្រាំចាត់ទុកការវាយបករបស់អីុរ៉ង់ថាខ្សោយខ្លាំងណាស់។
ចំណែកប្រទេសកាតាវិញនិយាយនាយប់ថ្ងៃទី២៣មិថុនាថា ខ្លួនរក្សាសិទ្ធិតបតវិញដោយសមស្រប ទៅតាមទំហំនៃការឈ្លានពាននិងស្របតាមច្បាប់អន្តរជាតិ។ នេះជាការអះអាងរបស់ក្រសួងការបរទេសកាតាដែលបន្តថា មីសីុលអីុរ៉ង់ទាំងអស់ត្រូវបានស្ទាក់កម្ទេច និងថាមូលដ្ឋានយោធាអាមរិកដែលអីុរ៉ង់វាយប្រហារបានជម្លៀសមនុស្សនិងយន្តហោះចេញមុន៕
ចែករំលែកព័តមាននេះ