រាជធានីភ្នំពេញ ៖ ម្ចាស់ផ្ទះសំណាក់មួយកន្លែងនៅម្តុំផ្សារកណ្តាល បានប្រើហិង្សាដោយ ទះកំផ្លៀងទៅលើភ្ញៀវម្នាក់ បង្កឱ្យមានការភ្ញាក់ផ្អើល ។ ដោយការកើតទុក្ខមិនសុខចិត្ត ក៏ទៅដាក់ពាក្យបណ្តឹងនៅប៉ុស្តិ៍នគរបាល ក៏ត្រូវសមត្ថកិច្ចទះ២កំផ្លៀងថែមទៀត…
រាជធានីភ្នំពេញ ៖ ម្ចាស់ផ្ទះសំណាក់មួយកន្លែងនៅម្តុំផ្សារកណ្តាល បានប្រើហិង្សាដោយ ទះកំផ្លៀងទៅលើភ្ញៀវម្នាក់ បង្កឱ្យមានការភ្ញាក់ផ្អើល ។ ដោយការកើតទុក្ខមិនសុខចិត្ត ក៏ទៅដាក់ពាក្យបណ្តឹងនៅប៉ុស្តិ៍នគរបាល ក៏ត្រូវសមត្ថកិច្ចទះ២កំផ្លៀងថែមទៀត ។ បាតុភាពនេះ បានកើតឡើងនៅវេលាម៉ោង១០និង៣០នាទីយប់ ថ្ងៃទី២២ ខែមិថុនា ឆ្នាំ២០២៥ ក្នុងសង្កាត់ផ្សារកណ្តាលទី២ ខណ្ឌដូនពេញ រាជធានីភ្នំពេញ ។
ប្រភពព័ត៌មានពីបុរស ដែលត្រូវទទួលបាន៣កំផ្លៀងផ្ទួនៗគ្នា ជាអ្នករត់ម៉ូតូកង់បីបានឲ្យដឹងថា មុនពេលកើតហេតុ គាត់បានទទួលដំណឹងពីប្រពន្ធរបស់គាត់ថា មកលេងគាត់នៅភ្នំពេញ ។ រាល់យប់គាត់ដេកនៅក្នុងម៉ូតូកង់បីរបស់គាត់ តែយប់នេះ ដោយដឹងថាប្រពន្ធមកលេង ក៏ទៅជួលបន្ទប់ផ្ទះសំណាក់សម្រាប់ដេក ។ លុះពេលទៅដល់ផ្ទះសំណាក់ ស្រាប់តែខាងផ្ទះសំណាក់ថា គ្មានបន្ទប់ទំនេរនោះទេ ទើបគាត់សុំបង់លុយមុន១៥ដុល្លារ ដើម្បីកក់សម្រាប់ពេលបន្ទប់ទំនេរ គាត់ចូលដេកតែម្តង ។
បុរសរងគ្រោះបានបន្តថា ពេលត្រឡប់មកវិញម្តងទៀត គាត់ក៏បានទៅសាកសួរបុគ្គលិកផ្ទះសំណាក់ តើមានបន្ទប់ទំនេរនៅ ? គេក៏បានប្រាប់ថា បន្ទប់ពេញអស់ហើយ ចាំគេឆែកមើលឱ្យ ។ រួចបុគ្គលិកនោះ ក៏បានឡើងទៅខាងលើប្រាប់ដំណឹងទៅមេការ ។ មេការផ្ទះសំណាក់ ក៏បានចុះមកក្រោមគប់សោទ្វារដាក់គាត់ រួចបានទះគាត់មួយកំផ្លៀងដោយមិនដឹងមូលហេតុ ។
ក្រោយគេប្រើហិង្សាលើរូបគាត់រួចមក គាត់បានទៅដាក់ពាក្យបណ្តឹងនៅប៉ុស្តិ៍ផ្សារកណ្តាលទី២ ខណ:កំពុងសរសេរពាក្យបណ្តឹង ស្រាប់តែមានមន្ត្រីប៉ុស្តិ៍ម្នាក់ ដើរមកទះគាត់ចំនួន២កំផ្លៀងថែមទៀតដោយមិនដឹងរឿង ។ ក្រោយពេលកើតហេតុ សមត្ថកិច្ចបាននាំម្ចាស់ផ្ទះសំណាក់មកកាន់ប៉ុស្តិ៍ ដើម្បីធ្វើការសម្របសម្រួលគ្នាជាមួយអ្នករត់ម៉ូតូកង់បី ដែលខ្លួនបានទះកំផ្លៀង ដោយភាគីខាងម្ចាស់ផ្ទះសំណាក់ បានសងសំណងជំងឺចិត្តចំនួន៤០ម៉ឺនរៀល ដើម្បីបញ្ចប់រឿង ។
ប៉ុន្តែអ្វីដែលភាគីរងគ្រោះទទួលយកមិនបាននោះគឺ ហេតុអ្វីមន្ត្រីសមត្ថកិច្ចក៏ប្រើហិង្សាមកលើរូបគាត់ដែរ ? ទើបគាត់ស្នើសុំរកយុត្តិធម៌ ជុំវិញបូលិសទះកំផ្លៀងគាត់ ។ ជាចុងក្រោយ ក៏មានការសម្របសម្រួលពីសមត្ថកិច្ច ដោយឱ្យមន្ត្រីនោះ ធ្វើការសុំទោសទៅលើជនរងគ្រោះ ហើយគាត់ក៏ព្រមទទួលយក តែកុំឱ្យមានរឿងបែបនេះកើតទៅលើប្រជាពលរដ្ឋផ្សេងទៀតអី ព្រោះគាត់រងគ្រោះមករកសម្ថតកិច្ចឱ្យជួយ បែរជាធ្វើបែបនេះដាក់គាត់ទៅវិញ ។
ទោះបីជាបែបណា មូលហេតុដែលគេទះកំផ្លៀងគាត់បន្តបន្ទាប់នេះ ក៏មិនដឹងថា មកពីហេតុអ្វីដែរ ឬមួយឃើញគាត់តូចទាបនាំគ្នាប្រមាថមើលងាយគាត់ ។ រឿងរ៉ាវនេះក៏មិនដឹងថា បុរសអ្នករត់ម៉ូតូកង់បីរកបន្ទប់ដេកជាមួយប្រពន្ធដែលមកលេងបានឬបែបណា បើរាត្រីរំពឹងលើការក្រេបទឹកឃ្មុំក្លាយជាទឹកខ្មេះបែបនេះទៅវិញ ពិតជាខកចិត្តណាស់ ៕
ចែករំលែកព័តមាននេះ