ខេត្តបាត់ដំបង ៖ ការដោះដូរទំនិញសព្វសារពើទាំងអស់ ត្រូវបានបិទទាំងស្រុង រវាងភាគីកម្ពុជា និងថៃ ។ ប្រជាពលរដ្ឋ ភ្ញៀវទេសចរ រួមទាំងពលករឆ្លងដែនផង…
ខេត្តបាត់ដំបង ៖ ការដោះដូរទំនិញសព្វសារពើទាំងអស់ ត្រូវបានបិទទាំងស្រុង រវាងភាគីកម្ពុជា និងថៃ ។ ប្រជាពលរដ្ឋ ភ្ញៀវទេសចរ រួមទាំងពលករឆ្លងដែនផង ក៏មិនត្រូវបានអនុញ្ញាតឲ្យធ្វើឆ្លងព្រំដែនទៅវិញទៅមកដែរ គិតចាប់ពីម៉ោង៩ព្រឹកថ្ងៃទី២៤ មិថុនា នេះតទៅ គ្រប់ច្រកទ្វារព្រំដែនទាំង០៥នៅក្នុងទឹកដី ខេត្តបាត់ដំបង លើកលែងតែអ្នកជំងឺ ឬ យុវសិស្សប៉ុណ្ណោះ ដែលអាចចេញចូលបាន ។ នេះជាការឆ្លើយតបពីភាគីកម្ពុជាទៅនឹងទង្វើបិទបើកច្រកទ្វារព្រំដែនជា«ឯកតោភាគី»របស់ភាគីថៃ ។
អភិបាលខេត្តបាត់ដំបង លោក សុខ លូ បានមានប្រសាសន៍ប្រាប់កោះសន្តិភាព នៅថ្ងៃទី ២៤ មិថុនា នេះថា ច្រកទ្វារព្រំដែនទាំងតូច ទាំងធំចំនួន០៥ ក្នុងទឹកដីខេត្តបាត់ដំបង នៅថ្ងៃនេះ(២៤ ០៦ ២៥) ត្រូវបាន«បិទ»ទាំងអស់ហើយ ។ លោកអភិបាលខេត្តបានបញ្ជាក់ថា ពេលនេះ យើងបិទច្រកទ្វារព្រំដែនទាំងស្រុង មិនអនុញ្ញាតឲ្យមានយានយន្តគ្រប់ ឬ ការដោះដូរទំនិញគ្រប់ប្រភេទឆ្លងកាត់ព្រំដែនឡើយ ។ ប្រជាពលរដ្ឋខ្មែរ ភ្ញៀវទេសចរ ឬ ពលករខ្មែរដែលធ្វើការងារនៅប្រទេសថៃ អាចវិលត្រឡប់ចូលស្រុកកំណើតវិញបាន តែមិនអនុញ្ញាតឲ្យចាកចេញទៅកាន់ប្រទេសថៃវិញបានឡើយ ។
ដោយឡែក ខាងភាគីថៃវិញក៏បានអនុវត្តនូវលក្ខខណ្ឌបែបនេះដូចគ្នាដែរ ។ អភិបាលខេត្តបាត់ ដំបង លោក សុខ លូ បានបញ្ជាក់បន្ថែមថា ភ្ញៀវទេសចរប្រជាពលរដ្ឋ ឬអាជីវករថៃ ដែលធ្វើដំណើរចាកចេញពីប្រទេសកម្ពុជាហើយក្នុងស្ថានភាពនេះ យើងមិនអនុញ្ញាតឱ្យវិលត្រឡប់ចូលមកទឹកដីកម្ពុជាវិញឡើយ ។ ប៉ុន្តែភាគីទាំងពីរបានព្រមព្រៀងគ្នាបើកផ្លូវសម្រាប់អ្នកមានជំងឺ និងយុវសិស្សអាចឆ្លងព្រំដែនទៅវិញទៅមកបាន ។
ខេត្តបាត់ដំបងមានស្រុកចំនួន០៤ និងមានច្រកទ្វារព្រំដែនចំនួន០៥ (ច្រកទ្វារអន្តរជាតិ០២ ច្រកទ្វារតំបន់០៣) ដែលមានភូមិសាស្ត្រជាប់បន្ទាត់ព្រំដែនជាមួយប្រទេសថៃ ។ ១-ស្រុកសំឡូត មានច្រកទ្វារតំបន់«៤០០»។ ២-ស្រុកកំរៀង មានច្រកទ្វារអន្តរជាតិ«ដូង» និងច្រកទ្វារតំបន់«អូរអន្លក់»។ ៣-ស្រុកភ្នំព្រឹក មានច្រកទ្វារតំបន់«អូររំដួល» និង៤-ស្រុកសំពៅលូន មានច្រកទ្វារអន្តរជាតិ«ភ្នំដី» ។
ចំពោះការដោះដូរទំនិញគ្រប់ប្រភេទ រវាងភាគីកម្ពុជា និងថៃ បើតាមការកត់សម្គាល់កន្លងមក ច្រកទ្វារព្រំដែនទាំង០៥ ដែលមមារញឹកខ្លាំងបំផុត គឺច្រកទ្វារអន្តរជាតិ«ដូង» បន្តបន្ទាប់មក ច្រកទ្វារអន្តរជាតិ«ភ្នំដី» ច្រកទ្វារតំបន់«អូររំដួល» និងច្រកទ្វារតំបន់«អូរអន្លក់» រីឯច្រកទ្វារតំបន់«៤០០»នៅស្រុកសំឡូត ហាក់មានសកម្មភាពដោះដូរទំនិញបន្ទាប់បន្សំប៉ុណ្ណោះ ។
ទំនិញដែលភាគីកម្ពុជានាំចូលពីប្រទេសថៃ គេឃើញមានគ្រប់ប្រភេទ ។ ជាពិសេសប្រភេទគ្រឿង សំណង់ សម្ភារៈប្រើប្រាស់ គ្រឿងអេឡិចត្រូនិក ម៉ូតូ បន្លែ ផ្លែឈើ ត្រីសាច់យ៉ាងសន្ធឹកសន្ធាប់ ។ ដោយឡែក បើនិយាយពីភាគីកម្ពុជា នាំទំនិញចេញទៅកាន់ប្រទេសថៃវិញ គេសម្គាល់ឃើញជាដុំកំភូន គ្មានអ្វីក្រៅតែពីផលកសិកម្មឡើយ ដូចជា ដំឡូងនិងពោត ឬផលម្រេចប៉ុណ្ណោះ ។
បើប្រៀបធៀបទំនិញដែលកម្ពុជានាំចូលពីប្រទេសថៃទៅនឹងទំនិញដែលកម្ពុជានាំចេញទៅប្រទេសថៃ វិញគឺខុសគ្នាដាច់ស្រឡះ ដូចមេឃនិងដី ។ ប៉ុន្តែយ៉ាងណា ពេលនេះកម្ពុជា និងថៃ ហាក់កំពុងប្រឈមមុខដាក់គ្នាយ៉ាងខ្លាំង ដោយសារតែបញ្ហារំលោភបំពានព្រំដែនពីភាគីថៃ រហូតឈានដល់ការផ្ទុះអាវុធតបតគ្នាមួយប្រាវទៀតផង ។
ក្រោយពីប្រឈមមុខដាក់គ្នាដោយកាំភ្លើងស្ថានភាពព្រំដែននៃប្រទេសទាំងពីរឡើងកំដៅយ៉ាងខ្លាំង ហើយភាគីថៃ បានសម្រេចជា«ឯកតោភាគី» ក្នុងការទាញទ្វារច្រកព្រំដែនបិទ។ ដោយមិនអាចបន្ធូបន្ថយភាពតានតឹងបាន ភាគីកម្ពុជាក៏បានសម្រេចចិត្តបោះជំហានតាមក្រោយភាគីថៃ តាមរយៈលក្ខខណ្ឌកំណត់ពេលវេលានៃការបិទឬបើកទ្វារច្រកព្រំដែនផង និងបិទមិនឲ្យមានការនាំចូលនូវបន្លែ ផ្លែឈើគ្រប់ប្រភេទ និងប្រេងឥន្ធនៈ ហ្គាស ពីប្រទេសថៃផង ។
ហើយរហូតដល់ពេលនេះ ភាគីថៃក៏បានសម្រេចជា «ឯកតោភាគី» ដើរមុនមួយជំហានទៀត គឺភាគីបាន«បិទច្រកទ្វារព្រំដែនជាមួយកម្ពុជា»ទូទាំងប្រទេសតែម្ដង ។ ដូច្នេះហើយ ទើបភាគីកម្ពុជាសម្រេចបោះជំហានតាមក្រោយកំដរភាគីថៃបន្តទៀត ។ ប៉ុន្តែយ៉ាងណា គេរំពឹងថា ភាពតានតឹងរវាងកម្ពុជា និងថៃ នាពេលនេះនឹងអាចធូរស្រាល វិលត្រឡប់ទៅរកស្ថានភាពដើមវិញ នាពេលខាងមុខនេះជាមិនខាន ៕
ចែករំលែកព័តមាននេះ