រាជធានីភ្នំពេញ ៖ កម្លាំងនគរបាលខណ្ឌប្ញស្សីកែវ និងកម្លាំងនគរបាលនៃអធិការដ្ឋានខណ្ឌកំបូល បានសហការគ្នាដេញតាមប្រមាញ់មុខសញ្ញាចោរឆក់យ៉ាងសកម្ម២នាក់ ដែលកំពុងជិះម៉ូតូ១គ្រឿងឌុបគ្នា ។ ខណៈនោះ ដេញតាមតាំងពីភូមិសាស្ត្រខណ្ឌប្ញស្សី រហូតដល់ភូមិសាស្ត្រខណ្ឌពោធិ៍សែនជ័យ…
រាជធានីភ្នំពេញ ៖ កម្លាំងនគរបាលខណ្ឌប្ញស្សីកែវ និងកម្លាំងនគរបាលនៃអធិការដ្ឋានខណ្ឌកំបូល បានសហការគ្នាដេញតាមប្រមាញ់មុខសញ្ញាចោរឆក់យ៉ាងសកម្ម២នាក់ ដែលកំពុងជិះម៉ូតូ១គ្រឿងឌុបគ្នា ។
ខណៈនោះ ដេញតាមតាំងពីភូមិសាស្ត្រខណ្ឌប្ញស្សី រហូតដល់ភូមិសាស្ត្រខណ្ឌពោធិ៍សែនជ័យ ស្រាប់តែចោរ២នាក់នោះ បានផ្ដួលម៉ូតូចោលរួចរត់គេចខ្លួនចូលក្នុងព្រៃកក់មួយកន្លែង ។ ខណៈនោះកម្លាំងនគរបាលខណ្ឌទាំង២ខាងលើ ដោយទាំងកម្លាំងនគរបាលប៉ុស្តិ៍ចោមចៅទី៣ នៃអធិការដ្ឋានខណ្ឌពោធិ៍សែនជ័យមួយទៀតផងដែរ បានឡោមព័ទ្ធចំណុចនោះ ប៉ុន្តែទីបំផុតលោកចោរ២នាក់នោះ នៅតែមានវាសនារត់គេចខ្លួនបាត់ដោយសុវត្ថិភាព ។
ប្រតិបត្តិការខាងលើនោះបានធ្វើឡើង កាលពីវេលាម៉ោង១០និង១៥នាទីព្រឹកថ្ងៃទី២៣ ឧសភា ឆ្នាំ២០២៦ ហើយព្រៃកក់ដែលចោររតគេចខ្លួនចូលទៅបាត់នោះ ស្ថិតនៅក្នុងភូមិអង្គ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនសង្ស័យទាំង២នាក់នោះ មិនត្រូវបានស្គាល់អត្តសញ្ញាណនោះទេ គ្រាន់តែជាមុខសញ្ញាចោរឆក់យ៉ាងសកម្ម និងឆក់មិនរើសមុខនោះទេឲ្យតែអាចលក់បានលុយដូចជាខ្សែក ទូរស័ព្ទដៃ និងកាបូបលុយជាដើម ។
នគរបាលបានប្រាប់ថា នៅវេលាម៉ោងខាងលើ កម្លាំងនគរបាលខណ្ឌឫស្សីកែវ គឺជាម្ចាស់ករណីនោះ បានបើកការស្រាវជ្រាវរហូតកំណត់បានមុខសញ្ញាចោរឆក់២នាក់ខាងលើ រួចក៏បានដេញតាមបង្ក្រាប ។ ប៉ុន្តែចោរមិនព្រមឲ្យឃាត់ខ្លួនស្រួលៗនោះទេ ក៏បានជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៍ខ្មៅពាក់ស្លាកលេខកំពង់ចាម1AG-4649គេចខ្លួនសំដៅទៅផ្លូវជាតិលេខ៤ ។
នគរបាលបានប្រាប់បន្តទៀតថា ពេលនោះកម្លាំងនគរបាលខណ្ឌឫស្សីកែវ និងកម្លាំងនគរបាល នៃអធិការដ្ឋានខណ្ឌកំបូល បានសហការគ្នាដេញតាមបង្ក្រាប ហើយពេលទៅដល់ត្រង់ចំណុចកើតហេតុខាងលើក្រុមចោរក៏បានផ្ដួលម៉ូតូចោលរួចរត់គេចខ្លួនចូលទៅក្នុងព្រៃកក់មួយកន្លែង ។
បន្ទាប់មក កម្លាំងនគរបាលទាំង២ខណ្ឌខាងលើ ដោយមានការចូលរួមពីកម្លាំងនគរបាលប៉ុស្តិ៍ចោមចៅទី៣ នៃអធិការដ្ឋាននគរបាលខណ្ឌពោធិ៍សែនជ័យផង បានធ្វើការឡោមព័ទ្ធទីតាំងនោះ ប៉ុន្តែដោយសារតែទីនោះមានព្រៃក្រាស់ និងមានទឹកជ្រៅផងនោះ ទើបចោរគេចខ្លួនបាត់ ។
ដោយឡែក នគរបាលក្រោយពេលឡោមព័ទ្ធ និងរុករកអស់ចិត្តមិនឃើញចោរ នគរបាលក៏សម្រេចចិត្តដកថយចេញវិញ ហើយនគរបាលខណ្ឌឫស្សីកែវដែលជាម្ចាស់ករណី បាននាំយកម៉ូតូដែលលោកចោរផ្ដួលចោលនោះទៅរក្សាទុកធ្វើការស្រាវជ្រាវបន្តទៀត ៕
ចែករំលែកព័តមាននេះ