រាជធានីភ្នំពេញ ៖ លោក ឆែ វិវឌ្ឍនៈ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី២២ ខែឧសភា ឆ្នាំ២០២៦ បានចេញដីកាបង្គាប់ឱ្យចាប់ខ្លួន…
រាជធានីភ្នំពេញ ៖ លោក ឆែ វិវឌ្ឍនៈ ចៅក្រមស៊ើបសួរសាលាដំបូងរាជធានីភ្នំពេញ កាលពីថ្ងៃទី២២ ខែឧសភា ឆ្នាំ២០២៦ បានចេញដីកាបង្គាប់ឱ្យចាប់ខ្លួន ឈ្មោះ នួន នីណារ៉ូ បច្ចុប្បន្ន មានតួនាទីជានាយរងសេនាធិការកងរាជអាវុធហត្ថខេត្តបន្ទាយមានជ័យ ដោយជាប់ពាក់ព័ន្ធពីបទ.សមគំនិតក្នុងអំពើឆបោកតាមប្រព័ន្ធបច្ចេកវិទ្យា និង សម្អាតប្រាក់ ។
យោងតាមដីការបង្គាប់ឱ្យចាប់ខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ បានបញ្ជាក់ថា ឈ្មោះ នួន នីណារ៉ូ ភេទប្រុស អាយុ៤៤ ឆ្នាំ មានទីលំនៅភូមិកំពង់សៀម ស្រុកកំពង់សៀម ខេត្តកំពង់ចាម ត្រូវបានដាក់ក្រោមការពិនិត្យពីបទ.សមគំនិតក្នុងអំពើឆបោកតាមប្រពន្ធបច្ចេកវិទ្យា និងសម្អាតប្រាក់ ប្រព្រឹត្តនៅចំណុចអគារ១៣ជាន់ ស្ថិតនៅភូមិក្បាលស្ពាន២ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ កាលពីអំឡុងឆ្នាំ២០២២ រហូតដល់ថ្ងៃទី២៤ ខែមេសា ឆ្នាំ២០២៦។
បទល្មើសដែលមានបញ្ញត្តិឲ្យផ្តន្ទាទោសតាមមាត្រា២៩ នៃក្រមព្រហ្មទណ្ឌ មាត្រា៥ កថាខណ្ឌ៣ ចំណុច១ នៃច្បាប់ស្តីពីការប្រឆាំងការឆបោកតាមប្រពន្ធបច្ចេកវិទ្យា និងមាកត្រា ៣៨ នៃច្បាប់ស្តីពីការប្រឆាំងការសម្អាតប្រាក់ ។
ដីកាបង្គាប់ឲ្យចាប់ខ្លួនឈ្មោះ នួន នីណារ៉ូ មកប្រគល់ជូនសាលាដំបូងរាជធានីភ្នំពេញ ដើម្បីចាត់ការតាមច្បាប់ និងបញ្ជាដល់ប្រពន្ធពន្ធនាគារ ឬមណ្ឌលឃុំខ្លួនឲ្យទទួល និងឃុំខ្លួនបុគ្គលនេះ និងត្រូវនាំទៅបង្ហាញដល់ចៅក្រមស៊ើបសួរក្នុងរយៈពេលយ៉ាងខ្លីបំផុត ។
ហើយបើតាមអ្នកលេងបណ្តាញសង្គម បានលើកឡើងថា ក្រៅពីតុលាការបានចេញដីកាបង្គាប់ឱ្យចាប់ខ្លួន ចៅក្រមស៊ើបសួរក៏បានចេញដីកាបង្កកទ្រព្យសម្បត្តិរបស់ឈ្មោះ នួន នីណារ៉ូ ចំនួន៩ ទីតាំងនៅក្រុងប៉ោយប៉ែត ខេត្តបន្ទាយមានជ័យផងដែរ ៕
ចែករំលែកព័តមាននេះ