ខេត្តបាត់ដំបង ៖ មន្ត្រីយោធាវ័យក្មេង០២នាក់ បានស្លាប់ជាបន្តបន្ទាប់ នៅក្នុងឧប្បតិហេតុគ្រោះថ្នាក់ចរាចរណ៍ដ៏រន្ធត់មួយ រវាងរថយន្តនិងម៉ូតូ ពេលធ្វើដំណើរចេញពីអង្គភាពទៅមើលម្ដាយឈឺនៅឯស្រុកកំណើត កាលពីវេលាម៉ោង៣ និង៣០នាទីរសៀលថ្ងៃទី២២ ឧសភា…
ខេត្តបាត់ដំបង ៖ មន្ត្រីយោធាវ័យក្មេង០២នាក់ បានស្លាប់ជាបន្តបន្ទាប់ នៅក្នុងឧប្បតិហេតុគ្រោះថ្នាក់ចរាចរណ៍ដ៏រន្ធត់មួយ រវាងរថយន្តនិងម៉ូតូ ពេលធ្វើដំណើរចេញពីអង្គភាពទៅមើលម្ដាយឈឺនៅឯស្រុកកំណើត កាលពីវេលាម៉ោង៣ និង៣០នាទីរសៀលថ្ងៃទី២២ ឧសភា នៅលើកំណាត់ផ្លូវជាតិលេខ៥ ត្រង់ចំណុចភូមិក្បាលថ្នល់ ឃុំកំពង់ព្រៀង ស្រុកសង្កែ ។
សមត្ថកិច្ចបាននិយាយថា បើតាមការត្រួតពិនិត្យ និងតាមការបំភ្លឺនានាពីសាក្សី ក្នុងឧប្បតិហេតុគ្រោះថ្នាក់ចរាចរណ៍ដែលបង្កឲ្យមានមនុស្សស្លាប់នេះ កំហុសភាគច្រើនបង្កដោយភាគីរថយន្ត ដែលបត់ឆ្លងថ្នល់ដោយខ្វះការប្រុងប្រយ័ត្ន ខណៈដែលមន្ត្រីយោធាទាំង០២នាក់ កំពុងជិះស្របទិសពីក្រោយចាប់ហ្វ្រាំងមិនទាន់ ក៏ជ្រុលទៅបុកគូទរថយន្តនោះពេញទំហឹងតែម្ដង ។
យោងតាមរបាយការណ៍មន្ត្រីមូលដ្ឋាន ជនរងគ្រោះទាំង០២នាក់ ម្នាក់ឈ្មោះ សឿន ស៊ិន អាយុ២១ឆ្នាំ (ស្លាប់នៅចំណុចកើតហេតុ) រស់នៅភូមិព្រៃដំរី ឃុំបឹងខ្នា ស្រុកបាកាន ខេត្តពោធិ៍សាត់ និងម្នាក់ទៀតឈ្មោះ ចៀន ពេជ្រ អាយុ២៣ឆ្នាំ (របួសធ្ងន់ តែបានស្លាប់នៅមន្ទីរពេទ្យ) រស់នៅភូមិលាវ ឃុំចំរើនផល ស្រុកសំពៅមាស ខេត្តពោធីសាត់។ ជនរងគ្រោះទាំង០២នាក់ ជាមន្ត្រីយោធា ដែលមានអង្គភាព នៅខេត្តប៉ៃលិន ។
បើតាមព័តមានមន្ត្រីយោធាទាំង០២នាក់ បានសុំច្បាប់មេអង្គភាព ដើម្បីទៅសួរសុខទុក្ខ និងមើលម្ដាយឈឺនៅឯស្រុកកំណើត តែពេលពួកគាត់ជិះម៉ូតូមកដល់ចំណុចកើតហេតុ ក៏ជួបគ្រោះថ្នាក់ចរាចរណ៍ រហូតបាត់បង់ជីវិត ។ របាយការណ៍បានឲ្យដឹងទៀតថា រថយន្តបង្កនោះ ម៉ាកហាន់ដាយ ពណ៌.ស ពាក់ស្លាកលេខ ព្រះសីហនុ 3A-6223 អ្នកបើកបរបានរត់ចោលរថយន្ត ក្រោយបង្កគ្រោះថ្នាក់។
អធិការស្រុកសង្កែ លោក យុត តុងហូ បានប្រាប់ថា ជនរងគ្រោះ បានជិះម៉ូតូស្របទិសជាមួយរថយន្ត ពីខាងលិចទៅកើត ពេលដល់ចំណុចកើតហេតុ ស្រាប់តែរថយន្តបានបត់ឆ្វេង ដោយខ្វះការប្រុងប្រយ័ត្ន ធ្វើឲ្យជនរងគ្រោះដែលជិះពីក្រោយយ៉ាងប្រកិត បន្ថយល្បឿនមិនទាន់ក៏ជ្រុលទៅបុកគូទរថយន្តពីក្រោយពេញទំហឹងតែម្ដង។
លោកអធិការបានបញ្ជាក់ថា ពេលកើតហេតុភ្លាមៗ ជនរងគ្រោះម្នាក់បានស្លាប់ រីឯម្នាក់ទៀតរងរបួស តែគាត់បានស្លាប់ពេលបញ្ជូនដល់មន្ទីរពេទ្យ។ ដោយឡែក អ្នកបើកបររថយន្តបង្ក ដែលគេមិនទាន់ស្គាល់អត្តសញ្ញាណ បានរត់ចោលរថយន្ត ប៉ុន្តែពេលនេះ មន្ត្រីការិយាល័យចរាចរណ៍ នៃស្នងការខេត្ត បាននាំយកមធ្យោបាយបង្កគ្រោះថ្នាក់ទៅរក្សារទុក និងកំពុងធ្វើការស្រាវជ្រាវ ដើម្បីរកមុខអ្នកបើកបររថយន្តឲ្យមកទទូលខុសត្រូវចំពោះមុខច្បាប់ ៕
ចែករំលែកព័តមាននេះ