អភិបាលខេត្តពោធិ៍សាត់ ចាត់តំណាងចូលរួមបុណ្យសព វីរកងទ័ព ២រូប ដែលបាត់បង់ជីវិតដោយសារគ្រោះថ្នាក់ចរាចរណ៍
ខេត្តពោធិ៍សាត់ ៖ លោក ហៀម ឃួន អភិបាលរងខេត្ត និងលោក សួង សារាវុធ នាយករដ្ឋបាលសាលាខេត្ត…
ខេត្តពោធិ៍សាត់ ៖ លោក ហៀម ឃួន អភិបាលរងខេត្ត និងលោក សួង សារាវុធ នាយករដ្ឋបាលសាលាខេត្ត តំណាងលោក ខូយ រីដា អភិបាល នៃគណៈអភិបាលខេត្តពោធិ៍សាត់ នាព្រឹកថ្ងៃទី២៣ ខែឧសភា ឆ្នាំ២០២៦ បានអញ្ជើញនាំយកសម្ភារៈ និងថវិកាទៅចូលរួមបុណ្យសពវីរកងទ័ពចំនួនពីររូប ដែលបានបាត់បង់ជីវិត ដោយសារគ្រោះថ្នាក់ចរាចរណ៍ នៅលើកំណាត់ផ្លូវជាតិលេខ៥ ត្រង់ចំណុចឃុំកំពង់ព្រៀង ស្រុកសង្កែ ខេត្តបាត់ដំបង កាលពីថ្ងៃទី២២ ខែឧសភា ឆ្នាំ២០២៦ វេលាម៉ោង១៤រសៀល ខណៈពេលត្រឡប់ពីបំពេញបេសកកម្ម ។
សពវីរកងទ័ពទាំងពីររូប ៖ ទី១. ពលឯកឈ្មោះ ញ៉ុង ស៊ិន ភេទប្រុស អាយុ២១ឆ្នាំ ជាពលទាហានកងការពារព្រំដែនលេខ៥០៤ យោធភូមិភាគទី៥ ខេត្តបាត់ដំបង មានទីលំនៅភូមិព្រៃដំរី ឃុំបឹងខ្នារ ស្រុកបាកាន ខេត្តពោធិ៍សាត់ និងទី២. ពលឯកឈ្មោះចៀន ពិសិដ្ឋ ភេទប្រុស អាយុ១៩ឆ្នាំ នៅអង្គភាពជាមួយគ្នា មានទីលំនៅភូមិអូរតូង សង្កាត់ចំរើនផល ក្រុងពោធិ៍សាត់ ។
លោក ហៀម ឃួន អភិបាលរង នៃគណៈអភិបាលខេត្ត បានសម្ដែងការសោកស្ដាយ និងក្ដុកក្ដួលបំផុត ចំពោះមរណៈភាពរបស់ពលឯកទាំងពីររូប និងសូមចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារសព ដែលមានឪពុកម្ដាយ បងប្អូន ជីដូនជីតា កូនក្មួយ សាច់ញាតិ កងកម្លាំងក្នុងអង្គភាព និងប្រជាពលរដ្ឋក្នុងភូមិ មកចូលរួមក្នុងពិធីបុណ្យសពនាពេលនេះ។ មរណភាពរបស់ពលឯកទាំងពីររូប គឺជាការបាត់បង់នូវកម្លាំងកងទ័ពជួរមុខដ៍សំខាន់ ដែលធ្លាប់បានលះបង់សាច់ស្រស់ឈាមស្រស់ ការពារបូរណភាពទឹកដី និងជីវិតប្រជាពលរដ្ឋនៅតាមព្រំដែន ក្នុងខណៈពេលកងទ័ពថៃឈ្លានពានទឹកដីខ្មែរ ទាំងលើកទី១ និងលើកទី២នាពេលថ្មីៗនេះ ។
លោក ហៀម ឃួន បានជម្រាបជូនថា ដោយសារលោក ខូយ រីដា អភិបាល នៃគណៈអភិបាលខេត្តពោធិ៍សាត់ មានការមមាញឹកខ្លាំងក្នុងការងាររាជរដ្ឋាភិបាល ការរៀបចំសោភ័ណភាព សណ្ដាប់ធ្នាប់សាធារណៈ និងការអភិវឌ្ឍខេត្ត ពុំបានមកផ្ទាល់ ទើបចាត់ឲ្យរូបលោក រួមជាមួយនាយករដ្ឋបាលសាលាខេត្ត និងមន្ទីរអង្គភាពនានាក្នុងខេត្ត នាំយកសម្ភារៈ និងថវិកាមួយចំនួន មកចូលរួមក្នុងពិធីបុណ្យសពពលឯកទាំងពីររូប នាពេលនេះ ដោយបុណ្យសពនីមួយៗមានអង្ករ០៧ការ៉ុង ទឹកបរិសុទ្ធ០៣កេស មី០២កេស ទឹកស៊ីអ៊ីវ០២យួរ ទឹកត្រី០២យួរ និងថវិកា ៣លាន៥សែនរៀល ។
លោក ហៀម ឃួន សូមឲ្យក្រុមគ្រួសារនៃសព ទទួលយកសម្ភារៈ និងថវិការបស់លោកអភិបាល នៃគណៈអភិបាលខេត្តពោធិ៍សាត់ ទៅធ្វើបុណ្យជូនពលឯកទាំងពីរនាក់ ទៅតាមទំនៀមទំលាប់ប្រពៃណីព្រះពុទ្ធសាសនា និងសូមឲ្យវិញាណក្ខន្ធពួកគាត់ បានទៅកាន់សុគតិភពកុំបីឃ្លាងឃ្លាតឡើយ ៕«មន្ត្រីយោធា០២នាក់ស្លា.ប់ក្នុងឧប្បត្តិហេតុគ្រោះ ថ្នាក់ចរាចរណ៍ ពេលធ្វើដំណើរទៅមើលម្ដាយឈឺនៅឯស្រុក»
ចែករំលែកព័តមាននេះ