រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ជើងឯក១០លានរៀលស្រាផែនដីនៅលើសង្វៀនCTN កាលពីរសៀលថ្ងៃសៅរ៍ទី១ មិថុនា កន្លងមកនេះ កីឡាករសាំង ស៊ីថា មកពីសមាគមកីឡាប្រដាល់ក្រសួងការពារជាតិ និងកីឡាករវ៉ោយ សុធន មកពីក្លិបរាជសីហ៍ ខេត្តបន្ទាយមានជ័យ បានចាញ់ពិន្ទុគូប្រកួតទាំងមិនអស់ចិត្តធ្វើឱ្យបាត់បង់ឱកាសក្តាប់យក៣ពិន្ទុ ក្នុងការប្រកួតលើកដំបូងដូចគ្នា ។
គូប្រកួតសាំង ស៊ីថា គឺកីឡាករ ខុន រាជ មកពីក្លិបកងពលធំអន្តរាគមន៍លេខ៣ ព្រះវិហារ ចំណែកគូប្រកួតរបស់វ៉ោយ សុធន គឺកីឡាករពៅ សក្តិសិទ្ធ មកពីសមាគមកីឡាប្រដាល់ក្រសួងមហាផ្ទៃ ។ ជួបគ្នាលើកនេះសាំង ស៊ីថា បានព្យាយាមប្តូរស្នៀតកណ្តាប់ដៃជាមួយខុន រាជ តាំងពីនៅក្នុងទឹកទី១មកម្លេ៉ះ ប៉ុន្តែរាល់ការវាយចេញរបស់គេមិនសូវចំគោលដៅបានល្អឡើយ ផ្ទុយទៅវិញបែរជាត្រូវខុន រាជ វាយបកសងវិញ ចូលមុខនិងពោះទឹកពេញៗតែម្តង ។
ចូលដល់ទឹកទី២ សាំង ស៊ីថា បានប្តូរមកលេងស្នៀតកែង និងជង្គង់វិញម្តង ប៉ុន្តែរាល់ការវាយចេញរបស់គេ ខុន រាជ ហាក់គ្មានការកោតញញើតបន្តិចណាសោះ ។ ពេលខ្លះខុន រាជ ព្យាយាមដកថយ និងគេចចេញពីការវាយលុករបស់សាំង ស៊ីថា មែន តែនៅពេលគេវាយបកសងវិញម្តងៗគឺចំគោលដៅបានល្អធ្វើឱ្យសាំង ស៊ីថា ស្រុតចុះកម្លាំងយ៉ាងខ្លាំង ចាប់ពីទឹកទី៣រហូតទៅ ប៉ុន្តែខុន រាជ ក៏មិនបានវាយសម្រុកខ្លាំងក្លានោះដែរ ទើបការប្រកួតបានបន្តរហូតដល់ចប់ទឹកទី៥ ហើយខុន រាជ ជាអ្នកឈ្នះពិន្ទុ ។
ចំណែកឯពៅ សក្តិសិទ្ធ ពេលជួបខ្លាចាស់វ៉ោយ សុធន លើកនេះមិនទាន់ហា៊នបើកការវាយសម្រុកនៅទឹកទី១ ភ្លាមទេ ខណៈវ៉ោយ សុធន ក៏ធ្វើដូចគ្នាដែរ ។ ប៉ុន្តែឈានចូលដល់ទឹកទី២ភ្លាមពៅស័ក្តិសិទ្ធ មិនបន្ធូរដៃឱ្យវ៉ោយ សុធន ទៀតឡើយ ស្នៀតជើងនិងស្នៀតកណ្តាប់ដៃរបស់គេ បានវាយសម្រុកទៅលើគូប្រកួតយ៉ាងសាហាវធ្វើឱ្យវ៉ោយ សុធន បង្ខំចិត្តដកថយមកអែបខ្សែរេញ គេចចេញពីការវាយប្រហារនេះ ។ វ៉ោយ សុធន ឃើញវាយបកសងវិញម្តងម្កាល តែមិនសូវចំគោលដៅបានល្អទេ ខណៈស្នៀតជើងនិងស្នៀតកណ្តាប់ដៃរបស់គេពេលទាត់និងវាយចេញម្តងៗហាក់មានភាពផ្សងព្រេងច្រើន ។ កម្លាំងរបស់វ៉ោយ សុធន ចាប់ផ្តើមចុះខ្សោយជាបណ្តើរៗនៅ ពេលឈានចូលដល់ទឹកទី៤ និងទី៥ ធ្វើឱ្យគេស្ទើរគ្មានឱកាសការពារខ្លួនបានទៀតផង ទើបចប់ការប្រកួតគេត្រូវចាញ់ពិន្ទុពៅ សក្តិសិទ្ធ ដោយគ្មានការតវ៉ា ។
នៅក្នុងសប្តាហ៍នេះ ខុន រាជ និងពៅ សក្តិសិទ្ធ ជាអ្នកមានសំណាងរកបាន៣ពិន្ទុម្នាក់ ខណៈសប្តាហ៍មុនកីឡាករមាស ភិរម្យ មកពីក្លិបកងទ័ពជើងទឹក និងកីឡាករឌុន រដ្ឋា មកពីក្លិបអេភូថងកីឡា រកបាន៣ពិន្ទុម្នាក់ដូចគ្នា ។ រីឯគូប្រកួតមិត្តភាពវិញកីឡាករអាន សុផល មកពីក្លិបមិត្តប៉ូលិស ផ្តួលកីឡាករគុណ សំណង មកពីក្លិបខេមរិន្ទមានឫទ្ធិឱ្យសន្លប់ក្នុងទឹកទី៤ និងកីឡាករនី ចាន់រ៉ា មកពីក្លិបសិង្ហកីឡា ឈ្នះកីឡាករសៅ ប៊ុនធឿន មកពីក្លិបតាព្រហ្មមានជ័យបង្ក្រាបគ្រឿងញៀនមុនស្នូរជួងបញ្ចប់ទឹកទី៥ ៕
ចែករំលែកព័តមាននេះ