រាជធានីភ្នំពេញ ៖ ព្រឹត្តិការណ៍ប្រកួតកីឡាC.C.C AQUATHLON (ហែលទឹក និងរត់ប្រណាំង)លើកទី២ ត្រូវបានរៀបចំធ្វើកាលពីថ្ងៃទី១ មិថុនា នៅសណ្ឋាគារ Cambodia Country Club (CCC) រាជធានីភ្នំពេញ ដើម្បីអបអរសាទរទិវាកុមារអន្តរជាតិក្រោមអធិបតីភាព លោកខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាប្រធានកិត្តិយសសហព័ន្ធកីឡាទ្រីយ៉ាត្លុងកម្ពុជា ដោយមានការចូលរួមពីលោកប៊ូ ជុំសេរី អនុរដ្ឋលេខាធិការក្រសួងអប់រំយុវជននិងកីឡា លោកគង់ ឫទ្ធីជព្វ ប្រធានសហព័ន្ធកីឡាទ្រីយ៉ាត្លុងកម្ពុជា និងគណៈប្រតិភូកីឡាជាច្រើនរូបទៀត ។
លោកគង់ ឫទ្ធីជព្វ ប្រធានសហព័ន្ធកីឡាទ្រីយ៉ាត្លុងកម្ពុជាមានប្រសាសន៍ក្នុងឱកាសនោះថា នេះជាលើកទី២ហើយដែលយើងរៀបចំប្រកួតកីឡា C.C.C AQUATHLON ដោយលើកនេះគឺដើម្បីអបអរសាទរទិវាកុមារអន្តរជាតិនិងកុមារកម្ពុជា ។ ពិតណាស់ កុមារចាំបាច់មានថ្នាលបណ្តុះបណ្តាលលើគ្រប់វិស័យរួមទាំងវិស័យកីឡាផងដែរ បើកុមារមានថ្នាលបណ្តុះបណ្តាលនោះយើងនឹងមានធនធានមនុស្សល្អៗទៅថ្ងៃអនាគត ហេតុនេះហើយទើបការប្រកួតយើងបានបញ្ចូលឱ្យមានការប្រកួតសម្រាប់កុមារដែលជាផ្នែកមួយមិនអាចមើលរំលងបាន ។
ស្របពេលថ្ងៃនេះជាថ្ងៃដែលពិភពលោកប្រារព្ធពិធីអបអរសាទរទិវាកុមារអន្តរជាតិផងនោះ យើងក៏បានធ្វើការប្រកួតដើម្បីអបអរសាទរទិវាកុមារកម្ពុជាផងដែរ ។ ចំពោះលទ្ធផលចំណាត់ថ្នាក់នៃការប្រកួតមានដូចខាងក្រោម ៖ វិញ្ញាសាអាយុ១៧ឆ្នាំនារី ដែលត្រូវហែល១៥០ម៉ែត្រ និងរត់៣.២០០ម៉ែត្រ លេខ១បានទៅលើកីឡាការិនីម៉េត ម៉ារីយ៉ាន លេខ២ កីឡាការិនី នេន សុម៉ាលី និងលេខ៣កីឡាការិនីអ៊ុំ រាជនីធម៌ ។ កីឡាការិនីទាំងបីនាក់នេះមកពីមជ្ឈមណ្ឌលជាតិហ្វឹកហ្វឺនកីឡាជាមួយគ្នា ។
វិញ្ញាសាអាយុ១៣ទៅ១៧ឆ្នាំ បុរស ដែលត្រូវហែល១៥០ម៉ែត្រ និងរត់៣.២០០ម៉ែត្រ ដែរនោះ លេខ១ បានទៅលើកីឡាករឃីម សម្បត្តិ លេខ២កីឡាករម៉េត សុភត្រ្តា ទាំង ពីរនាក់នេះមកពីមជ្ឈមណ្ឌលជាតិហ្វឹកហ្វឺនកីឡាជាមួយគ្នា និងលេខ៣ កីឡាករសេង ខន មកពីក្លិបPSE ។ វិញ្ញាសាអាយុ៣៥ឆ្នាំឡើងបុរសដែលត្រូវហែល២៥០ម៉ែត្រ និងរត់៤.០០០ម៉ែត្រ លេខ១បានទៅលើកីឡាករបរទេសឈ្មោះ Jorge Ramos លេខ២ កីឡាករពៅ ហុក មកពីក្លិបធនធានមនុស្ស និងលេខ៣កីឡាករឃុត ស្រស់ មកពីក្លិបឫទ្ធិសែន ។
វិញ្ញាសាអាយុ១៨ឆ្នាំ ទៅ៣៥ឆ្នាំនារី ដែលត្រូវហែល៣៥០ម៉ែត្រ និងរត់៣.៨០០ម៉ែត្រ លេខ១បានទៅលើកីឡាការិនី Hay Leysayby មកពីក្លិបរាជសីហ៍ , លេខ២ កីឡាការិនីហែម ថុនវិទីនី និងលេខ៣កីឡាការិនី សេង សម្ផស្ស ទាំងពីរនាក់នេះមកពីមជ្ឈមណ្ឌលជាតិហ្វឹកហ្វឺនកីឡាជាមួយគ្នា ។
វិញ្ញាសាអាយុ១៨ឆ្នាំទៅ៣៥ឆ្នាំបុរស ដែលត្រូវហែល៣៥០ម៉ែត្រ និងរត់៤.៨០០ម៉ែត្រ លេខ១បានទៅលើកីឡាករហែម ប៊ុនទីង មកពីក្លិប AAP , លេខ២ កីឡាករ នាង ពេជ្រពិសិដ្ឋ មកពីក្លិបឫទ្ធិសែន និងលេខ៣ កីឡាករម៉ា វីរ៉ូ មកពីក្លិបធនធានមនុស្ស ។
គួរបញ្ជាក់ថា ក្លិបដែលបានចូលរួមក្នុងព្រឹត្តិការណ៍នេះមានចំនួន១២ គឺក្លិបឫទ្ធិសែន, ក្លិបក្រសួងព័ត៌មាន ក្លិបរាជសីហ៍ , ក្លិបនាយទាហានសកម្ម ,មជ្ឈមណ្ឌលជាតិហ្វឹកហ្វឺនកីឡា , ក្លិបAAP , ក្លិប CCC ,ក្លិប PSE, ក្លិបតាខ្មៅ,ក្លិបអង្គការមិត្តសម្លាញ់ , ក្លិបសាកលវិទ្យាល័យធនធានមនុស្ស និងក្លិបមហាជន ដែលមានកីឡាករ -កីឡាការិនីសរុបចំនួន១៨៣នាក់ ក្នុងនោះកីឡាការិនី២៦នាក់ ៕
ចែករំលែកព័តមាននេះ