ខេត្តព្រះសីហនុ ៖ កាលពីព្រឹកថ្ងៃទី៨ មីនា កុមារា កុមារី យុវជន យុវនារីដែលជាសិស្សានុសិស្សក្រីក្រ(កុមារកំព្រា) គ្មានទីពឹងមកពីសាលាដុនបូស្កូ និងសាលាអង្គការម្លប់តាប៉ាងប្រមាណជា៣០០នាក់ បានមកជួបជុំគ្នាចូលរួមក្នុងពិធីបើកសម្ពោធហាងលក់ការ៉េមអ៊ីតាលីរបស់សាលាដុនបូស្កូដែលមានយីហោ«ជីឡាតូអ៊ីតាសៀនណូ» មានទីតាំងស្ថិតនៅមហោស្រពចាស់ក្នុងក្រុមទី៤ ភូមិ២ សង្កាត់លេខ២ ក្រុងព្រះសីហនុ។
ពិធីបើកសម្ពោធហាងលក់ការ៉េមដែលជាហាងរបស់សាលាដុនបូស្កូនេះ បានប្រព្រឹត្តទៅក្រោមការគ្រោងទុករបស់លោកចន វីសឺ នាយកសាលាដុនបូស្កូ ដែលលោកបានខិតខំពុះពាររកថវិកាក្នុងការជួយទំនុកបំរុងការរៀនសូត្រដល់កុមារកំព្រា ក្មួយៗយុវជន យុវនារីដែលជួបប្រទះការខ្វះខាតក្នុងការសិក្សាមិនអាចបន្តការសិក្សាទៅមុខទៀតបាន ដោយលោកនាយកចន វីសឺ បើកហាងការ៉េមខាងលើដើម្បីរកមូលនិធិសំរាប់ទ្រទ្រង់ការសិក្សារបស់ក្មួយៗសិស្សានុសិស្សដែលកំពុងប្រឈមនៅក្នុងដំណើរជីវិតគ្មានទីពឹងរបស់ពួកគេ។
កញ្ញារស់ ជំនោរស្មី អ្នកគ្រប់គ្រងហាងការ៉េមបានបញ្ជាក់ថា ការប្រមូលកុមារៗ ក្មួយៗសិស្សានុសិស្ស គ្មានទីពឹងមកជួបជុំក្នុងពិធីបើកសម្ពោធហាងនេះ គឺដើម្បីឱ្យពួកគេបានស្គាល់គ្នាទៅវិញទៅមក មិនរើសអើងគ្នា ព្រោះក្មួយៗកំពុងរស់នៅក្នុងភាពគ្មានទីពឹងដូចគ្នា និងត្រូវចេះអប់រំខ្លួនឱ្យទៅជាកូនល្អ សិស្សល្អ ពលរដ្ឋល្អនៅក្នុងសង្គមទៀតផង។
កញ្ញាបានបញ្ជាក់ទៀតថា នៅក្នុងថ្ងៃបើកសម្ពោធហាងនេះ លោកនាយកចន វីសឺ បានឱ្យក្មួយៗសិស្សានុសិស្សមកពីសាលាដុនបូស្កូ និងសាលាម្លប់តាប៉ាងទទួលទានការ៉េមទាំងអស់គ្នាដើម្បីសាកល្បងស្នាដៃរបស់កញ្ញាដែលបានឆ្លងកាត់វគ្គសិក្សាជំនាញឯកទេសទៅតាមរូបមន្តនៅប្រទេសអ៊ីតាលី។ នេះជាគំនិតផ្តួចផ្តើមរបស់លោកនាយកចន វីសឺ ដែលលោកតែងតែគិតគូរផ្តល់នូវចំណេះដឹងសំរាប់ប្រកបរបរចិញ្ចឹមជីវិតរបស់ពួកគេទៅថ្ងៃអនាគត។ ក្នុងពិធីនេះក៏មានការចែកសាប៊ូ និងសំភារសិក្សាដល់សិស្សានុសិស្សដែលចូលរួមផងដែរ ៕
ចែករំលែកព័តមាននេះ