រាជធានីភ្នំពេញ ៖ រថយន្តដឹកទំនិញធុនយក្សមួយគ្រឿងបានបើកបរក្នុងល្បឿនលឿន ហើយបានជ្រលទៅបុក និងកៀរម៉ូតូ២គ្រឿងបណ្ដាលឲ្យដួលច្រងាប់ច្រងិល។ ប៉ុន្តែមិនបានបណ្ដាលឲ្យអ្នកបើកបររងរបួសធ្ងន់ធ្ងរឡើយ បន្ទាប់មករថយន្តបង្កបានជ្រុលបន្តទៅបុករថយន្តមួយគ្រឿងផ្សេងទៀតបណ្ដាលឲ្យរងការខូចខាតរួច ជ្រុលបន្តទៅកៀរតូបអ្នកលក់ដូរមួយទៀត ទើបទៅមុខលែងរួច និងគាបអ្នកបើកបរជាប់ក្នុងកាប៊ីនថែមទៀតផង។ ហេតុការណ៍នោះបានកើតឡើងកាលពីវេលាម៉ោង៣ និង៣០នាទីរសៀល ថ្ងៃទី១៨ ខែតុលា ឆ្នាំ២០១៨ តាមផ្លូវអូរដឹមកប់ស្រូវ ភូមិខ្លែងតាអែ សង្កាត់សំរោងក្រោម ខណ្ឌពោធិ៍សែនជ័យ។
តាមប្រភព័ត៌មានបានឲ្យដឹងថា នៅមុនពេលកើតហេតុ រថយន្តបង្ក ម៉ាកហ៊ីយ៉ាន់ដាយ ពណ៌ស ពាក់ស្លាកលេខ តាកែវ 3A-2016 ដឹកទំនិញ បើកបរដោយបុរសមិនស្គាល់ឈ្មោះម្នាក់ក្នុងទិសដៅពីត្បូងទៅជើងក្នុង ល្បឿនលឿន។ លុះពេលទៅដល់ត្រង់ ចំណុចកើតហេតុខាងលើ បានបុករះ និងកៀរម៉ូតូ២គ្រឿង ក្នុងនោះមាន១គ្រឿងម៉ាកហុងដាឌ្រីម សេ១២៥ មួយគ្រឿង និងម៉ូតូម៉ាកស៊ុយហ្ស៊ុយគីស្មាស់មួយគ្រឿង ដែលកំពុងបើកបរស្របទិស គ្នាបណ្ដាលឲ្យម៉ូតូដួល ប៉ុន្តែមិនបានបណ្ដាលឲ្យជនរងគ្រោះរងរបួសធ្ងន់ធ្ងរឡើយ។
ប្រភពដដែលបានបន្តទៀតថា បន្ទាប់មករថយន្តបង្កមិនបានឈប់ ឬបន្ថយល្បឿននោះទេ បានជ្រុលបន្តទៅកៀររថយន្តម៉ាកហាយឡែនឌ័រ មួយគ្រឿងទៀត ពណ៌ស ពាក់ស្លាកលេខ ភ្នំពេញ 2AQ-5238។ ក្នុងខណៈកំពុងបើកបរស្របទិស បណ្តាលឲ្យក្រពឹតអស់មួយចំហៀងខាងស្ដាំ រួចហើយរថយន្តបង្កដដែលនោះ ក៏នៅតែមិនទាន់អស់ល្បឿន ទៀហើយបានរេចង្កូតទៅខាងស្តាំ ធ្លាក់ផ្លូវជ្រុលទៅបុកតូបលក់ដូរ និងម៉ូតូហុងដាឌ្រីមពណ៌ខ្មៅ ពាក់ស្លាកលេខ ភ្នំពេញ1AE-9120 សណ្ដោងកន្ទុយរ៉ឺម៉ក ដែលចតនៅជិតនោះទៀតទើបឈប់ស្ងៀម។
ប្រភពខាងលើបានបន្តទៀតថា ខណៈនោះបានធ្វើឲ្យរថយន្តធុនយក្សនេះក្រពឹតមុខរួញកាប៊ីន កៀបជាប់ជើង អ្នកបើកបរចុះរត់គេចខ្លួនមិនកើតឡើយ។ ក្រោយពេលកើតហេតុ អ្នកបើកបររថយន្តបង្ករូបនោះ ត្រូវបាន នគរបាល និងប្រជាពលរដ្ឋជួយគាស់ទាញយកចេញ រួចដឹកបញ្ជូនទៅកាន់មន្ទីរពេទ្យ។ បន្ទាប់មកនគរបាលបាន ចុះទៅពិនិត្យ និងវាស់វែងព្រមទាំងនាំយករថយន្តទាំង២គ្រឿង និងម៉ូតូរងគ្រោះទាំងអស់ទៅរក្សាទុករង់ចាំការដោះស្រាយ រាល់ការប៉ះពាល់ ខូចខាតទ្រព្យសម្បត្តិអ្នកដទៃ៕
https://youtu.be/Xo-MUvyGHas
ចែករំលែកព័តមាននេះ