រាជធានីភ្នំពេញ ៖ មន្ត្រីជាន់ខ្ពស់ក្រសួងសាធារណការ និងដឹកជញ្ជូន បានអះអាងថា កម្ពុជានឹងបង្កើនល្បឿនរថភ្លើងរត់ឱ្យបានចន្លោះពី៨០ទៅ១០០គីឡូម៉ែត្រក្នុង១ម៉ោង ឱ្យដូចទៅនឹងប្រទេសជិតខាងដែរ ។
អនុរដ្ឋលេខាធិការ ក្រសួងសាធារណការ និងដឹកជញ្ជូន លោកលី បូរិន បានឲ្យដឹងនាថ្ងៃទី១១ តុលា កន្លងមកថា បច្ចុប្បន្ន ខ្សែរថភ្លើងត្រូវបានតភ្ជាប់ឡើងវិញហើយ តាមរយៈថវិកា ADB និងថវិការាជរដ្ឋាភិបាល រួមទាំងក្រុមហ៊ុន Royal Railway តែមិនទាន់មានល្បឿនលឿននៅឡើយទេ គឺត្រឹមតែ៣០ទៅ៦០គីឡូម៉ែត្រប៉ុណ្ណោះ ក្នុង១ម៉ោង ប៉ុន្តែនៅពេលឆាប់ៗខាងមុខនេះ រថភ្លើងនឹងអាចរត់បានល្បឿនលឿនដូចប្រទេសជិតខាងដែរ គឺពី៨០ទៅ១០០ គីឡូម៉ែត្រ ក្នុង១ម៉ោង ។
លោកបន្តថា ក្នុងអំឡុងពេលបុណ្យភ្ជុំបិណ្ឌ កន្លងទៅថ្មីៗនេះ រថភ្លើងទាំងបីខ្សែដែលត្រូវបានអនុញ្ញាតឱ្យពលរដ្ឋជិះទៅមកដោយមិនគិតថ្លៃនោះ គឺពុំមានអ្នកជិះច្រើនកុះករទេ ដោយសារតែទន្ទឹមគ្នានោះ ក៏មានរថយន្តជិះដោយមិនគិតថ្លៃចំនួនជាង២០០គ្រឿងដែរ ។
លោក លី បូរិន ក៏បានអំពាវនាវឱ្យប្រជាពលរដ្ឋគាំទ្របន្តទៅទៀត និងមានទំនុកចិត្តខ្ពស់ ព្រោះរាជរដ្ឋាភិបាលកំពុងខិតខំកែលម្អនូវគ្រប់ខ្សែរថភ្លើងទាំងអស់ឱ្យកាន់តែប្រសើរឡើង និងមានល្បឿនលឿនជាងមុន ហើយធ្វើឲ្យបានក្នុងពេលឆាប់ៗនេះ ។ ទោះយ៉ាងនេះក្ដី អ្នកនាំពាក្យក្រសួងដដែលនេះ គឺលោកវ៉ាស៊ឹម សូរិយា បានឲ្យដឹងថា រថភ្លើងកម្ពុជាមិនអាចរត់បានល្បឿនលឿននោះទេ ដោយសារផ្លូវរថភ្លើងកម្ពុជាមិនទាន់មានស្តង់ដា ស្របតាមស្តង់ដាអន្តរជាតិ ពិសេសផ្លូវរថភ្លើងមានចំណុចឆ្លងកាត់ច្រើន ដែលធ្វើឲ្យរថភ្លើងមិនអាចរត់បានលឿននៅឡើយ។លោកមានប្រសាសន៍ថា ៖« ដោយសារផ្លូវរថភ្លើងរបស់យើងជាផ្លូវចាស់ និងបានជួសជុលឡើងវិញ ទើបយើងមិនអាចរត់លឿនបាន ។ ម្យ៉ាងទៀត មានប្រជាពលរដ្ឋសាងសង់ផ្លូវឆ្លងកាត់ច្រើន »។ លោកបន្តថា ៖« តាមពិតរថភ្លើងបច្ចុប្បន្នអាចរត់បាន៦០គីឡូម៉ែត្រក្នុងមួយម៉ោង ប៉ុន្តែដោយសារស្ថានភាពផ្លូវមិនទាន់មានស្តង់ដា និងផ្លូវមានចំណុចឆ្លងកាត់ច្រើន ទើបរថភ្លើងអាចរត់បានក្នុងល្បឿនជាមធ្យម៣០គីឡូម៉ែត្រប៉ុណ្ណោះ ក្នុងមួយម៉ោង »។
ប្រទេសកម្ពុជាកំពុងមានការរីកចម្រើនលើវិស័យហេដ្ឋារចនាសម្ព័ន្ធផ្លូវថ្នល់ ផ្លូវដែក ផ្លូវទឹក និងផ្លូវអាកាស ក្នុងនោះផ្លូវថ្នល់បាននិងកំពុងធ្វើឱ្យប្រសើរឡើងពីផ្លូវ២គន្លងទៅ៤គន្លង, គម្រោងសាងសង់ផ្លូវល្បឿនលឿន, គម្រោងសាងសង់ផ្លូវពីបាត់ដំបង ទៅកាន់ខេត្តកោះកុង ដើម្បីកាត់បន្ថយពេលវេលានៃការដឹកជញ្ជូនទៅកាន់កំពង់ផែទឹកជ្រៅ និងគម្រោងសាងសង់ផ្លូវពីខេត្តកំពង់ឆ្នាំងទៅកំពង់ធំ ជាដើម ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិលោកបណ្ឌិត ម៉ី កល្យាណ បានថ្លែងថា បញ្ហាប្រឈមក្នុងសេដ្ឋកិច្ចរបស់យើង គឺការដឹកជញ្ជូនមានតម្លៃថ្លៃ ដោយសារកង្វះហេដ្ឋារចនាសម្ព័ន្ឋ ដែលរដ្ឋាភិបាលបាននិងកំពុងគិតគូរវិនិយោគ ប៉ុន្តែការសាងសង់អ្វីមួយ វាមិនចំណាយពេលមួយថ្ងៃឬមួយឆ្នាំទេ ហេតុនេះរដ្ឋាភិបាលគួរតែពន្លឿនការវិនិយោគលើផ្លូវល្បឿនលឿន និងហេដ្ឋារចនាសម្ព័ន្ឋដទៃទៀត ។ លោកបន្តថា ៖« ការសាងសង់ផ្លូវល្បឿនលឿន ឬហេដ្ឋារចនាសម្ព័ន្ឋនានា ជាការបង្កើនកំណើនសេដ្ឋកិច្ចជាតិ ព្រោះបើចង់ជំរុញកំណើនសេដ្ឋកិច្ចជាតិ ត្រូវតែវិនិយោគលើហេដ្ឋារចនាសម្ព័ន្ឋ »៕
ចែករំលែកព័តមាននេះ