អីយ៉ាស់! ការប្រកួតល្ងាចម៉ិញ ធ្វើឱ្យអ្នកគាំទ្រអង្គុយមិនជាប់កៅអីទេ

ថ្ងៃទី ១៤ ខែ តុលា ឆ្នាំ ២០១៨
ម៉ោង ០៩:៤២
ផាត់ តារារដ្ឋ

រាជធានីភ្នំពេញ ៖ ការប្រកួតជ្រើសរើសជើងឯកទម្ងន់៦០គីឡូក្រាម ក្នុងព្រឹត្តិការណ៍ TV5 Boxing Knock Out Series By K-Cement ត្រូវបានបញ្ចប់ហើយកាលពីល្ងាចថ្ងៃទី១៣ តុលា នៅសង្វៀនប៉ុស្ដិ៍លេខ៥ ព្រែកកំពិស ដោយកីឡាករលាភ រដ្ឋា បង្គោលក្រហម បានក្លាយជាម្ចាស់ពានជើងឯក។

យ៉ាងណាមិញ ជ័យជម្នះដែលបានកើតឡើងស្ទើរមិនមានអ្នកណាជឿភ្នែកនោះទេ ដោយសារតែលោកត្រូវបរាជ័យនៅក្នុងការប្រកួតនោះហើយ តែបែរជាសំណាងហុចអោយទាំងមិននឹកស្មាន។

ការប្រកួតដែលបានធ្វើឡើងក្រោមក្រសែភ្នែកអ្នកទស្សនាយ៉ាងច្រើនកុះករនោះ កីឡាករ២រូបដែលមានឈ្មោះមុខឡើងប្រកួតយកចំណាត់ថ្នាក់លេខ១ ត្រូវគេឃើញស្វាហាប់យ៉ាងខ្លាំង ដោយ លាភ រដ្ឋា គ្រាន់តែបើកឆាកភ្លាមក៏ស្ទុះសម្រុកចូលលើបង្គោលខៀវ លន បញ្ញា តែម្ដង។ ខណៈដែលទឹកទី១នោះ ភាគីម្ខាងៗវាយទៅវាយមក ធ្វើអោយអ្នកទស្សនាហើបគូទមិនជាប់នឹងកៅអី។

ឈានដល់ទឹកទី២ កីឡាករបង្គោលខៀវ លន បញ្ញា ដែលមានកម្ពស់ល្អជាង ចាប់ផ្ដើមមានប្រៀបយ៉ាងខ្លាំង ដោយវាយផងទាត់ផង ហើយធ្វើអោយកីឡាករបង្គោលក្រហមទ័លច្រក បាត់បង់ជំហរ ហើយបណ្ដាលឱ្យលោកអាជ្ញាកណ្ដាលរាប់ដល់៨ភ្លាមៗ ដែលធ្វើអោយអ្នកណាក៏មើលឃើញថា គេចាញ់១០០ភាគរយៗ បើការប្រកួតរបស់ លន បញ្ញា រក្សាជំហរបានល្អដូចដែលបានឃើញ។

យ៉ាងណាមិញ អ្វីៗកើតឡើងមិនគួរអោយជឿ ដោយសារតែកីឡាករបង្គោលខៀវ សម្អាងថា លាភ រដ្ឋា ត្រូវរាប់ម្ដង ហើយទំនងជាប៉ងវាយអោយសន្លប់ ក៏ស្ទុះវាយខ្លាំងភ្លេចការពារខ្លួនបណ្ដាលឱ្យកីឡាករ លាភ រដ្ឋា វ័ធត្រូវសៀតផ្កាមួយទំហឹង ហើយវិលក្បុងខ្លួនឯង បណ្ដាលអោយលោកអាជ្ញាកណ្ដាលរាប់ដល់៨។

ឱកាសបាក់ជំហរក្នុងពេលនោះហើយ ដែលធ្វើអោយ លាភ រដ្ឋា មានកម្លាំងចិត្តស្ទុះវាយយកប្រៀប ស្របគ្នាដែលកីឡាករ លន បញ្ញា នៅមិនទាន់ស្វាង និងពង្រឹងជំហរផងនោះ ក៏ធ្វើអោយគេត្រូវរាប់ជាលើកទី២ និងឈានទៅរាប់លើកទី៣ កំណត់ថាចាញ់ដោយស្វ័យប្រវត្តិ។

អ្នកគាំទ្រភាគច្រើន បើក្រោយវាយអោយ លាភ រដ្ឋា រាប់កាលពីដើមទឹកទី២ ហើយកីឡាករ លន បញ្ញា មិនកញ្ជ្រោលសម្រុកខ្លាំង នោះការប្រកួតទាំងមូលគឺកីឡាករ លន បញ្ញា ជាអ្នកកាន់ពានទៅហើយ ដោយសារតែការប្រកួតនេះ បើភាគម្ខាងៗរក្សាលំនឹងអោយឈ្នះចាញ់គ្នាដោយពិន្ទុ គឺលន បញ្ញា នឹងឈ្នះដោយស្វ័យប្រវត្តិ ព្រោះតែអ្នកត្រូវរាប់ម្ដង គឺត្រូវកាត់ពិន្ទុនោះ។

កីឡាករ លាភ រដ្ឋា ទទួលបានទឹកប្រាក់៤ពាន់ដុល្លារ និងពានជើងឯកមួយ ខណៈដែល កីឡាករ លន បញ្ញា ដែលមានប្រៀបទៅហើយ បែរជាបណ្ដោយអោយភ្លាត់វិញ បានត្រឹមតែពានកិត្តិយស និងទឹកប្រាក់២ពាន់ដុល្លារ៕