ខេត្តកំពង់ឆ្នាំង ៖ លោកជំទាវ កែវ ច័ន្ទមុនី អ្នកតំណាងរាស្រ្តមណ្ឌលកំពង់ឆ្នាំង ពីគណបក្សប្រជាជនកម្ពុជា កាលពីព្រឹកថ្ងៃទី២៣ ឧសភា ២០១៣ បានដឹកនាំមន្រ្តីនៃសមាគមន៍នារី ដើម្បីសន្តិភាព ខេត្តកំពង់ឆ្នាំង ដោយមានការចូលរួមពី លោកស្រី ប៉ាល់ យឿន ប្រធានមន្ទីរកិច្ចការនារីខេត្ត បាននាំយកនូវគ្រឿងឧបភោគបរិភោគ និងថវិកាទៅចែកជូនដល់ស្រ្តីពលការិនីខ្មែរម្នាក់ដល់លំនៅឋាន ស្ថិតក្នុងភូមិត្រពាំងក្របៅ ឃុំខ្លូងពពក ស្រុកទឹកផុស ដែលទើបត្រឡប់ពីប្រទេសម៉ាឡេស៊ី បានក្លាយជាជនពិការយ៉ាងអយុត្តិធម៌ពីសំណាក់ថៅកែជនជាតិម៉ាឡេស៊ី វាយធ្វើបាបរយៈពេលជិត ៣ឆ្នាំ ។
លោកជំទាវ កែវ ច័ន្ទមុនី បានឱ្យដឹងថា ក្រោយពីបានទស្សនាព័ត៌មានពីបណ្តាញទូរទស្សន៍អប្សរា ANN កាលពីពេលកន្លងទៅ ស្តីពីជីវិតដ៏ជូរចត់របស់ស្រ្តីឈ្មោះ តូច ណៃ អាយុ ២៦ឆ្នាំ ដែលទៅបម្រើការងារតាមផ្ទះនៅប្រទេសម៉ាឡេស៊ី លោកជំទាវក៏មានចិត្តអាណិតអាសូរជាពន់ពេក ហើយក៏ឃ្លាតឱកាសមកសួរសុខទុក្ខ និងនាំអំណោយមកជូនស្រ្តីរងគ្រោះខាងលើ ដែលកំពុងជួបការលំបាក ព្រោះបានធ្លាក់ខ្លួនពិការភ្នែកម្ខាង ត្រចៀកម្ខាង រួមទាំងមានស្លាកស្នាមពេញផ្ទៃមុខ និងមានស្មារតីមិនប្រក្រតីថែមទៀតផង ព្រោះត្រូវថៅកែជនជាតិម៉ាឡេស៊ី ធ្វើទារុណកម្មយ៉ាងឃោរឃៅ គ្មានមនុស្សធម៌ ៕
ចែករំលែកព័តមាននេះ