ប្រទេសអាហ្វហ្គានីស្ថាន ៖ មនុស្សយ៉ាងតិច១៣នាក់ស្លាប់ ហើយជាង៤០នាក់រងរបួស កាលពីថ្ងៃទី២ តុលា ក្នុងការវាយប្រហារអត្តឃាតមួយ សំដៅលើអង្គមីទ្ទីងឃោសនាបោះឆ្នោតមួយនាភាគខាងកើតអាហ្វហ្គានីស្ថាន ខណៈការបោះឆ្នោតសភាគ្រោងធ្វើនាថ្ងៃទី២០ តុលាខាងមុខ។
នេះជាការវាយប្រហារភេរវកម្មដំបូង តាំងពីចាប់ផ្ដើមយុទ្ធនាឃោសនាបោះឆ្នោតផ្លូវការពីថ្ងៃទី២៨ កញ្ញាមក។ ហើយក្រុមរដ្ឋអ៊ិស្លាមបានប្រកាសទទួលខុសត្រូវចំពោះការវាយប្រហារនោះតាមរយៈសេចក្ដីប្រកាសមួយ។
ជនអត្តឃាតបានបំផ្ទុះគ្រាប់បែកដាក់ជាប់ខ្លួនគេ ក្នុងកណ្ដាលចំណោមពួកអ្នកចូលរួមក្នុងការប្រជុំមួយរៀបចំដោយបេក្ខជនមួយរូប លោកអាប់ឌុលណាសៀរម៉ូហាម៉ាដ ក្នុងស្រុកកាម៉ា ខេត្តណាន់ហ្គាហារ ភាគខាងកើតប្រទេស។ ចំណែកអ្នកនាំពាក្យអភិបាលខេត្តនិយាយថា មនុស្ស១៣នាក់ស្លាប់ និង៤៣នាក់រងរបួស ដោយសារការវាយប្រហារនេះ។ ហើយបេក្ខជនលោកអាប់ឌុល ណាសៀរម៉ូហាម៉ាដនៅរស់រានមានជីវិត។
យុទ្ធនាការឃោសនាសម្រាប់ការបោះឆ្នោតសភាថ្ងៃទី២០ តុលា បើកធ្វើពីថ្ងៃទី២៨ កញ្ញាមក ក្នុងបរិយាកាសនៃការភ័យខ្លាច និងការសង្ស័យ។ ការបោះឆ្នោតនោះពន្យារពេលយ៉ាងយូរដោយពីដំបូងគ្រោងធ្វើតាំងពី៣ឆ្នាំមុនមកម្ល៉េះ។ បេក្ខជន៥រូបត្រូវគេធ្វើឃាតក្នុងការវាយប្រហារនានា ហើយគណៈកម្មាធិការបោះឆ្នោតឯករាជ្យនិយាយថា អំពើហិង្សាអាចមានការកើនឡើងនាថ្ងៃបោះឆ្នោត។
ជាលើកដំបូងដែលសមាជិកកងកម្លាំងសន្តិសុខអាហ្វហ្គានីស្ថាន៥៤.០០០នាក់នឹងទទួលបន្ទុករៀបចំកិច្ចការពារការិយាល័យបោះឆ្នោត៥០០០កន្លែង។ ដោយសារហេតុផលសន្តិសុខការិយាល័យបោះឆ្នោតចំនួន២០០០នឹងពុំបើកឡើយ។ ពួកតាលីបង់និងក្រុមរដ្ឋអ៊ិស្លាមឲ្យដឹងថា ពួកគេប៉ុនប៉ងធ្វើការវាយប្រហារនានាដើម្បីធ្វើឲ្យស្ទះដល់ដំណើរការបោះឆ្នោត៕
ចែករំលែកព័តមាននេះ