រាជធានីភ្នំពេញ ៖ ដូចអ្វីដែលបានបញ្ជាក់កន្លងមក កាលបរិច្ឆេទនៃការសាងសង់់ផ្លូវល្បឿនលឿនភ្នំពេញ-ក្រុងព្រះសីហនុ នឹងចាប់ផ្តើមនៅអំឡុងខែវិច្ឆិកា ខាងមុខនេះ គឺមិនមានការប្រែប្រួលនោះទេ ។ នេះបើតាមការអះអាងជាថ្មីពីមន្ត្រីជំនាញនៃក្រសួងសាធារណការ និងដឹកជញ្ជូន ។
លោក វ៉ាស៊ឹម សូរិយា អ្នកនាំពាក្យក្រសួងសាធារណការ និងដឹកជញ្ជូន បានថ្លែងតាមទូរស័ព្ទកាលពីថ្ងៃទី១ តុលា កន្លងមកថា គម្រោងសាងសង់ផ្លូវល្បឿនលឿននេះ នឹងចាប់ផ្តើមនៅអំឡុងខែវិច្ឆិកាខាងមុខ ចេញពីតំបន់ទំនប់កប់ស្រូវ ដែលស្ថិតនៅផ្នែកខាងស្តាំផ្លូវជាតិលេខ៤ ហើយរត់ស្របតាមផ្លូវជាតិនេះប្រវែងប្រមាណ៣០គីឡូម៉ែត្រ មុនពេលបែកទៅខាងឆ្វេងផ្លូវជាតិ រហូតជិតដល់ក្រុងព្រះសីហនុ ទើបផ្លូវងាកមកខាងស្តាំដៃនៃផ្លូវជាតិលេខ៤វិញ ។លោកបន្តថា ៖« គម្រោងសាងសង់ផ្លូវល្បឿនលឿននេះ នឹងមានផ្លូវរត៤ខ្សែសម្រាប់រថយន្ត ដោយមាន២គន្លងសងខាង និងមានសួនច្បារពុះចំកណ្តាល ។ ផ្លូវនេះនឹងមានការសាងសង់របង ដើម្បីការពារសត្វពាហៈនៈឆ្លងកាត់ និងមិនមានចំណុចឆ្លងកាត់ច្រើននោះទេ ។ លោកបន្តថា៖« ផ្លូវនេះមានប្រវែងប្រមាណជាង១៩០គីឡូម៉ែត្រពីរាជធានីភ្នំពេញ និងអាចអនុញ្ញាតឲ្យរថយន្តអាចបើកបរក្នុងល្បឿនលឿនបាន ព្រោះវានឹងត្រូវកសាងមានលក្ខណៈពិសេស »។
នៅក្នុងពិធីចុះហត្ថលេខារវាងលោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន ជាមួយលោក Liu Gitao ប្រធានក្រុមហ៊ុនសំណង់គមនាគមន៍ចិន ក្នុងអំឡុងដំណើរទស្សនកិច្ចរបស់នាយករដ្ឋមន្ត្រីចិន លោកលី ខឺឈាង បានបង្ហាញថា ផ្លូវល្បឿនលឿននេះមានប្រវែង១៩០,៦៣គីឡូម៉ែត្រ និងមានទទឹងផ្លូវទំហំ២៤ម៉ែត្រ និងធ្វើឡើងក្រោមរូបភាព BOT ។
លោក វ៉ាស៊ឹម សូរិយា បានបន្ដថា ការសាងសង់ផ្លូវល្បឿនលឿននេះ នឹងមានទីតាំងចំណុចឆ្លងកាត់ប្រមាណ១០កន្លែង ជាផ្លូវដែលលោកគិតថានឹងជួយដល់សេដ្ឋកិច្ចជាតិ ព្រមទាំងកាត់បន្ថយគ្រោះថ្នាក់ចរាចរណ៍ និងធ្វើឲ្យតម្លៃនៃការដឹកជញ្ជូនរបស់កម្ពុជាធ្លាក់ចុះផងដែរ។ លោកបន្តថា ៖« តាមគម្រោងការសាងសង់ផ្លូវនេះ គ្រោងចំណាយរយៈពេល៤ឆ្នាំ ទើបបញ្ចប់ការសាងសង់ ហេតុនេះ យើងរំពឹងថា ការសាងសង់នឹងអាចធ្វើឡើងឆាប់ៗនេះ »។
លោកទេសរដ្ឋមន្ត្រី ស៊ុន ចាន់ថុល បានឲ្យដឹងកាលពីពេលថ្មីៗនេះថា ការដោះស្រាយផលប៉ះពាល់ នៃគម្រោងផ្លូវល្បឿនលឿននេះបានបញ្ចប់រួចហើយ ។ ក្រោយការសាងសង់ផ្លូវល្បឿនលឿននេះបញ្ចប់ ផ្លូវនេះនឹងជួយសម្រួលការធ្វើដំណើរទៅខេត្តព្រះសីហនុកាន់តែខ្លី ជួយសម្រួលដល់ការដឹកជញ្ជូនទំនិញ ធ្វើឲ្យសេដ្ឋកិច្ចជាតិ មានការរីកចម្រើនកាន់តែល្អប្រសើរថែមទៀត ។
រដ្ឋាភិបាលបានដាក់ខេត្តព្រះសីហនុទាំងមូល ជាតំបន់ឧស្សាហកម្ម នៅក្នុងគោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥ ២០១៥ ដែលជាគោលនយោបាយមួយត្រូវបានអនុម័ត និងដាក់ឲ្យប្រើប្រាស់ជាផ្លូវការនៅខែតុលា ឆ្នាំ២០១៦កន្លងមកនេះ ។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិលោកបណ្ឌិត ម៉ី កល្យាណ បានថ្លែងថា បញ្ហាប្រឈមក្នុងសេដ្ឋកិច្ចរបស់យើង គឺការដឹកជញ្ជូនមានតម្លៃថ្លៃ ដោយសារកង្វះហេដ្ឋារចនាសម្ព័ន្ឋ ដែលរដ្ឋាភិបាលបាននិងកំពុងគិតគូរវិនិយោគ ប៉ុន្តែការសាងសង់អ្វីមួយ វាមិនចំណាយពេលមួយថ្ងៃឬមួយឆ្នាំទេ ហេតុនេះរដ្ឋាភិបាលគួរតែពន្លឿនការវិនិយោគលើផ្លូវល្បឿនលឿន និងហេដ្ឋារចនាសម្ព័ន្ឋដទៃទៀត ។ លោកបន្តថា ៖« ការសាងសង់ផ្លូវល្បឿនលឿន ឬហេដ្ឋារចនាសម្ព័ន្ឋនានា ជាការបង្កើនកំណើនសេដ្ឋកិច្ចជាតិ ព្រោះបើចង់ជំរុញកំណើនសេដ្ឋកិច្ចជាតិ ត្រូវតែវិនិយោគលើហេដ្ឋារចនាសម្ព័ន្ឋ »៕
ចែករំលែកព័តមាននេះ