កម្ពុជាស្នើធុរជនអាមេរិកវិនិយោគលើការធ្វើទំនើបកម្មវិស័យកសិកម្ម
- ភ្នំពេញ
រាជធានីភ្នំពេញ ៖ រដ្ឋមន្ត្រីក្រសួងពាណិជ្ជកម្មកម្ពុជា បានស្នើគណៈប្រតិភូធុរជនអាមេរិក ដែលដឹកនាំដោយ លោក វីល្លាម ហ៊ីដ (William Heidt)…
រាជធានីភ្នំពេញ ៖ រដ្ឋមន្ត្រីក្រសួងពាណិជ្ជកម្មកម្ពុជា បានស្នើគណៈប្រតិភូធុរជនអាមេរិក ដែលដឹកនាំដោយ លោក វីល្លាម ហ៊ីដ (William Heidt)…
រាជធានីភ្នំពេញ ៖ រដ្ឋមន្ត្រីក្រសួងពាណិជ្ជកម្មកម្ពុជា បានស្នើគណៈប្រតិភូធុរជនអាមេរិក ដែលដឹកនាំដោយ លោក វីល្លាម ហ៊ីដ (William Heidt) ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា និងលោក អេឡែន ឌី តាន់ (Allen D. Tan) ប្រធានក្រុមប្រឹក្សា ភិបាលសភាពាណិជ្ជកម្មអាមេរិកនៅកម្ពុជាធ្វើការវិនិយោគលើទំនើបកម្មវិស័យកសិកម្មកម្ពុជាឱ្យដល់កម្រិតស្តង់ដាអន្តរជាតិ ដើម្បីជំរុញការនាំចេញផលិតផលកសិកម្មឱ្យបានជាអតិបរមា ។
សំណើនេះត្រូវបានធ្វើឡើងនាឱកាសចូលរួមពិសាអាហារពេលព្រឹក ដើម្បីផ្សព្វផ្សាយអំពីឱកាសធុរកិច្ចនៅក្នុងវិស័យកសិកម្មកម្ពុជា កាលពីព្រឹកថ្ងៃទី២៦ ខែកញ្ញា ឆ្នាំ២០១៨ ដែលរៀបចំឡើងដោយស្ថានទូតសហរដ្ឋអាមេរិកសហការ ជាមួយសភាពាណិជ្ជកម្មអាមេរិកនៅកម្ពុជា នៅសណ្ឋាគារ Rosewood រាជធានីភ្នំពេញ ។
នៅក្នុងឱកាសនោះ លោករដ្ឋមន្ត្រី ប៉ាន សូរស័ក្តិ បានជម្រាបជូនគណៈប្រតិភូធុរជនអាមេរិក អំពីស្ថិរភាពកំណើនសេដ្ឋកិច្ច និងសក្តានុពលនៃវិស័យកសិកម្មកម្ពុជា ព្រមទាំងបញ្ហាប្រឈមមួយចំនួន ដែលកម្ពុជាបានកំពុងជួបប្រទះ និងទាមទារឱ្យមានការចូលរួមវិនិយោគពីផ្នែកឯកជន ដើម្បីធ្វើទំនើបកម្ម និងប្រែក្លាយវិស័យមួយនេះ ឱ្យទៅមូលដ្ឋានផលិតកម្មសំខាន់ សំដៅធ្វើពិពិធកម្ម(ពង្រីក) ការនាំចេញទៅកាន់ទីផ្សារក្នុងតំបន់ និងពិភពលោក ។ លោករដ្ឋមន្ត្រី បានលើកឡើងអំពីអត្ថប្រយោជន៍នៃការធ្វើធុរកិច្ចនៅកម្ពុជា និងបានជម្រាបជូនភាគីអាមេរិកអំពីគោលនយោបាយលើកទឹកចិត្តរបស់រាជរដ្ឋាភិបាលចំពោះវិនិយោគិនបរទេស ដូចជា ការអនុគ្រោះពន្ធនាំចូលសម្រាប់សម្ភារ និងគ្រឿងបរិក្ខាកសិកម្ម និងការសម្រួលការនាំចេញទៅកាន់ទីផ្សារអន្តរជាតិ ក្រោមប្រព័ន្ធអនុគ្រោះពន្ធផ្តល់ដោយប្រទេសជាដៃគូរបស់កម្ពុជាជាដើម ។
បន្ថែមលើនេះ លោករដ្ឋមន្ត្រី បានលើកទឹកចិត្តប្រតិភូធុរជនអាមេរិក ចាប់ដៃគូជាមួយធុរជនកម្ពុជា ដើម្បីវិនិយោគរួមគ្នាលើវិស័យកសិកម្ម និងកសិ-ឧស្សាហកម្ម តាមរយៈការនាំយកបច្ចេកវិទ្យាថ្មីៗ ដើម្បីអភិវឌ្ឍន៍ខ្សែសង្វាក់តម្លៃផលិតកម្ម សំដៅបង្កើនតម្លៃបន្ថែម និងបង្កើតកម្មវិធីបណ្តុះបណ្តាល ដើម្បីពង្រឹងសមត្ថភាពវិស័យឯកជន និងលើកស្ទួយការអភិវឌ្ឍវិស័យកសិកម្មនៅកម្ពុជាផងដែរ ។
លោក វីល្លាម ហ៊ីដ និងលោក អេឡែន ឌី តាន់ ព្រមទាំងគណៈប្រតិភូធុរជនអាមេរិក បានថ្លែងអំណរគុណលោករដ្ឋមន្ត្រី ដែលបានចែករំលែកនូវព័ត៌មានល្អៗទាក់ទិនឱកាសវិនិយោគលើផ្នែកកសិកម្ម និងកសិ-ពាណិជ្ជកម្ម នៅពេលនេះ ។ លោក វីល្លាម ហ៊ីដ និងលោក អេឡែន ឌី តាន់ បានសន្យាជួយសម្របសម្រួលការចាប់ដៃធុរុកិច្ចរបស់វិស័យឯកជននៃប្រទេសទាំងពីរនិងពិនិត្យលទ្ធភាពជួយគាំទ្រការអភិវឌ្ឍសមត្ថភាពដល់ភាគីពាក់ព័ន្ធ ដើម្បីដោះស្រាយរាល់បញ្ហាប្រឈម ជុំវិញការអភិវឌ្ឍខ្សែសង្វាក់តម្លៃកសិផលកម្ពុជា និងការធ្វើពិពិធកម្មវិស័យនាំចេញ ។ ម្យ៉ាងទៀត ភាគីអាមេរិក ក៏មានបំណងប្រែក្លាយកម្ពុជា ឱ្យដើរតួនាទីសំខាន់ក្នុងការផលិត និងចែកចាយផលិតផលកសិកម្ម ទាំងក្នុងតំបន់ និងទីផ្សារពិភពលោកផងដែរ ។
គួរបញ្ជាក់ថា វិស័យកសិកម្ម គឺជាសសរស្តមដ៏សំខាន់មួយនៃសេដ្ឋកិច្ចកម្ពុជា ដោយសារតែជាង៨០%នៃប្រជាជនរស់នៅតំបន់ជនបទ គឺជាកសិករ ។ កាលពីឆ្នាំ២០១៧ វិស័យកសិកម្មបានរួមចំណែកនៅក្នុងផលិតផលក្នុងស្រុកសរុប(GDP)២៤,៩%។ ទន្ទឹមនឹងនេះ នៅក្នុងអំឡុងពេលដូចគ្នា ឧស្សាហកម្មមាន៣២,៩% និងសេវាកម្មមាន៤២,២%។ ការចូលរួមនៃវិស័យកសិកម្មបានថយចុះ ដោយសារតែកំណើនលឿននៃវិស័យពីរផ្សេងទៀត ប៉ុន្តែទោះបីជាមានឧស្សាហូបនីយកម្ម កំណើនសេដ្ឋកិច្ច និងការរីកចម្រើនយ៉ាងឆាប់រហ័សនៃទីក្រុង ក៏វិស័យប្រពៃណីមួយនេះនូវតែដើរតួនាទីសំខាន់សម្រាប់ប្រជាជនកម្ពុជាភាគច្រើន ៕
ចែករំលែកព័តមាននេះ