ខេត្តព្រះវិហារ ៖ កាលពីរសៀលថ្ងៃទី២៦ កញ្ញា បុរស២នាក់ក្នុងចំណោម៣នាក់ បានរងរបួសដោយសារផ្ទុះមីនតោន ខណៈពួកគាត់បើកគោយន្តមកពីចម្ការត្រឡប់ទៅផ្ទះវិញ កិនមីនតោនដែលបន្សល់ទុកតាំងពីសម័យសង្គ្រាម នៅចំណុចវាលចៀស ស្ថិតក្នុងភូមិសែនតេជៈ…
ខេត្តព្រះវិហារ ៖ កាលពីរសៀលថ្ងៃទី២៦ កញ្ញា បុរស២នាក់ក្នុងចំណោម៣នាក់ បានរងរបួសដោយសារផ្ទុះមីនតោន ខណៈពួកគាត់បើកគោយន្តមកពីចម្ការត្រឡប់ទៅផ្ទះវិញ កិនមីនតោនដែលបន្សល់ទុកតាំងពីសម័យសង្គ្រាម នៅចំណុចវាលចៀស ស្ថិតក្នុងភូមិសែនតេជៈ ឃុំមរកត ស្រុកជាំក្សាន្ត ។ ទោះជាយ៉ាងណា ករណីផ្ទុះមីនតោននេះ មិនមាននរណាម្នាក់រងគ្រោះថ្នាក់ដល់អាយុជីវិតឡើយ គ្រាន់តែរបួសស្រាល២នាក់និងត្រូវបានបញ្ជូនទៅកាន់មន្ទីរពេទ្យបង្អែក១៦ មករា ក្រុងព្រះវិហារ ។
លោកឧត្តមសេនីយ៍ត្រី ឆយ បូរិន នាយសេនាធិការដ្ឋាននៃស្នងការដ្ឋាននគរបាលខេត្ត ឲ្យដឹងថា អ្នកបើកបរគោយន្តកន្ត្រៃឈ្មោះ ភឿនសុភាព អាយុ៣០ឆ្នាំ ជាកសិករ រស់នៅភូមិត្រពាំងប្រាសាទ ឃុំត្រពាំងប្រាសាទ ស្រុកត្រពាំងប្រាសាទ ។ ឯអ្នករួមដំណើរ២នាក់ទៀត ម្នាក់ឈ្មោះ ទិត្យ រិទ្ធី ភេទប្រុស អាយុ៤៣ឆ្នាំ និងម្នាក់ទៀតឈ្មោះ កឹម សុភ័ក្ត្រា អាយុ៣៣ឆ្នាំ ទាំង២នាក់ជាកសិកររស់នៅភូមិគូលែន ឃុំគូលែន ស្រុកគូលែន ។
ពួកគាត់ទាំង៣នាក់ជិះគោយន្តកន្ត្រៃពីចម្ការត្រឡប់មកផ្ទះ លុះដល់ចំណុចខាងលើ ដោយសាររដូវនេះជារដូវវស្សាធ្វើឲ្យដីទន់និងផុងចំកន្លែងមានកប់មីនក្នុងដី តាមផ្លូវចាស់ដែលធ្លាប់ធ្វើដំណើរដូចសព្វមួយដង ក៏ធ្វើឲ្យគោយន្តកិនមីនតោនផ្ទុះកក្រើកព្រៃតែម្តង ។ គ្រោះថ្នាក់នេះ បណ្តាលឲ្យអ្នកជិះគោយន្តទាំង២នាក់ ខ្ទាតចេញពីគោយន្តប្រមាណ៦០ម៉ែត្រ រីឯអ្នកបើកបរមិនមានរងរបួសអ្វីឡើយ ។
ក្រោយកើតហេតុ ប្រជាពលរដ្ឋនិងសមត្ថកិច្ចក៏បានចុះទៅដល់ រួចបញ្ជូនអ្នករបួសទៅកាន់មន្ទីរពេទ្យបង្អែក១៦មករា ក្រុងព្រះវិហារ ដើម្បីសង្គ្រោះ ដោយជនរងគ្រោះទាំង២នាក់ មានអាការស្ពឹកខ្លួនត្រឹមកដល់ជើងហើយមកដល់ពេលនេះក្រុមគ្រូពេទ្យកំពុងយកចិត្តទុកដាក់ក្នុងការពិនិត្យនិងព្យាបាលជនរងគ្រោះ ។
គួររំឭកថា នៅខេត្តព្រះវិហារតែងតែកើតមានករណីផ្ទុះគ្រាប់ដែលបន្សល់ទុកតាំងពីសម័យសង្គ្រាមមកម្ល៉េះ ដោយសារតែខេត្តនេះជាទឹកដីដាច់ស្រយាល និងជាខេត្តដែលបញ្ចប់សង្គ្រាមក្រោយគេ ដូច្នេះគ្រាប់យុទ្ធភ័ណ្ឌមិនទាន់ផ្ទុះបានបន្សល់ទុកស្ទើរគ្រប់កន្លែង ៕
ចែករំលែកព័តមាននេះ