រាជធានីភ្នំពេញ ៖ រាជរដ្ឋាភិបាលកម្ពុជាបានសម្រេចបង្កើតមជ្ឈមណ្ឌលបណ្តុះធុរកិច្ចថ្មីមួយដែលដាក់ឈ្មោះថា តេជោ (Techo Startup Centre) ដើម្បីផ្សារភ្ជាប់រវាងអនាគតរបស់ការងារយុវជន និងចក្ខុវិស័យក្នុងយុគសម័យបច្ចេកវិទ្យា ជាពិសេសដើម្បីជួយជំរុញឲ្យមានការរីកចម្រើននៃសហគ្រាសធុនតូច…
រាជធានីភ្នំពេញ ៖ រាជរដ្ឋាភិបាលកម្ពុជាបានសម្រេចបង្កើតមជ្ឈមណ្ឌលបណ្តុះធុរកិច្ចថ្មីមួយដែលដាក់ឈ្មោះថា តេជោ (Techo Startup Centre) ដើម្បីផ្សារភ្ជាប់រវាងអនាគតរបស់ការងារយុវជន និងចក្ខុវិស័យក្នុងយុគសម័យបច្ចេកវិទ្យា ជាពិសេសដើម្បីជួយជំរុញឲ្យមានការរីកចម្រើននៃសហគ្រាសធុនតូច និងមធ្យមនិងធុរកិច្ចថ្មី ស្របតាមនិន្នាការសេដ្ឋកិច្ចឌីជីថល។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងក្នុងកិច្ចប្រជុំនៅទីស្តីការក្រសួងកាលពីថ្ងៃទី២៥ កញ្ញា កន្លងមកថា ដើម្បីជួយជំរុញឲ្យមានការរីកចម្រើន ដល់សហគ្រាសធុនតូច និងមធ្យម និងធុរកិច្ចថ្មីស្របតាមសេដ្ឋកិច្ចឌីជីថល ក្រោមការយកចិត្តទុកដាក់ដ៏ខ្ពង់ខ្ពស់ និងចក្ខុវិស័យវែងឆ្ងាយរបស់សម្តេចអគ្គមហាសេនាបតីតេជោ ហ៊ុន សែន « មជ្ឈមណ្ឌលបណ្តុះធុរកិច្ចថ្មី តេជោ» គឺត្រូវបានបង្កើតឡើង ដើម្បីផ្សារភ្ជាប់រវាងអនាគតរបស់ការងារយុវជន និងចក្ខុវិស័យក្នុងយុគសម័យបច្ចេកវិទ្យា ។
មជ្ឈមណ្ឌលនេះមានទីតាំងនៅសកលវិទ្យាល័យភូមិន្ទភ្នំពេញ និងផ្តោតលើការពង្រឹងសហគ្រិនភាព តាមរយៈការបង្កើតនិងបណ្តុះ បណ្តាលអ្នកធុរកិច្ចថ្មីៗផ្អែកលើថ្នាលបច្ចេកវិទ្យា ការផ្សារភ្ជាប់ បណ្តាញការងារ ការសិក្សាស្រាវជ្រាវ និងពិគ្រោះយោបល់លើបំណិនសហគ្រិន ពិសេសគាំទ្រដល់យុវជនកម្ពុជាដែលមាននិន្នការចាប់យកបច្ចេកវិទ្យា ឱ្យមានកន្លែងធ្វើការ និងសិក្សាស្រាវជ្រាវជាក្រុម ស្របនឹងគោលនយោបាយរបស់រាជរដ្ឋាភិបាល ដើម្បីធានានូវកំណើនសេដ្ឋកិច្ចប្រកបដោយចីរភាព និងបរិយាប័ន្ន ។
លោកអគ្គបណ្ឌិតសភាចារ្យបន្តថា ៖« ស្របតាមគោលនយោបាយរបស់រាជរដ្ឋាភិបាល ជាពិសេសយុទ្ធសាស្ត្រចតុកោណដំណាក់កាលទី៤ ស្តីពីការរៀបចំខ្លួនរបស់កម្ពុជា សម្រាប់សេដ្ឋកិច្ចឌីជីថល និងឆ្លើយតបនឹងបដិវត្តន៍ឧស្សាហកម្មទី៤ ក្នុងបណ្តាញបច្ចេកវិទ្យាឌីជីថលបានបង្កើតឱ្យមានវិសាលភាពសេដ្ឋកិច្ច និងសង្គមថ្មីមួយខុសពីមុន ដែលធ្វើឱ្យមានការផ្លាស់ប្តូរពីការធើ្វពាណិជ្ជកម្មតាមបែបប្រពៃណី មកប្រតិបត្តិការពាណិជ្ជកម្មតាមបណ្តាញអ៊ិនធឺណិត »។
លោកបន្តថា ៖« បរិបទថ្មីនេះតម្រូវឱ្យរាជរដ្ឋាភិបាលត្រូវរៀបចំ និងកែសម្រួលគោលនយោបាយ និងបទប្បញ្ញត្តិពាក់ព័ន្ធផ្សេងៗឱ្យស្របទៅតាមនិន្នាការនេះ ដើម្បីចាប់យកឱកាសជំរុញការរីកចម្រើននៃទីផ្សារធុរកិច្ចបច្ចេកវិទ្យា គ្រប់គ្រងបរិស្ថានធុរកិច្ច ក៏ដូចជាកាត់បន្ថយនូវហានិភ័យ ដែលអាចកើតឡើងជាយថាហេតុដោយបច្ចេកវិទ្យាទាំងនេះ »។
បច្ចុប្បន្ន និន្នាការសេដ្ឋកិច្ចឌីជីថល ក្នុងប្រទេសកម្ពុជា បានលេចរូបរាងជាបណ្តើរៗ និងបានបង្កើតបានជាសកម្មភាពធុរកិច្ចថ្មីៗ តាមប្រព័ន្ធអ៊ីនធើរណេត ប៉ុន្តែកម្ពុជាមិនទាន់មានយន្តការជាក់លាក់ ក្នុងការប្រមូលចំណូលសារពើពន្ធពីប្រតិបត្តិការពាណិជ្ជកម្ម តាមប្រព័ន្ធអេឡិចត្រូនិកនៅឡើយ ហើយបញ្ហានេះកំពុងតែត្រូវបានគិតគូរ ទាំងក្នុងក្របខ័ណ្ឌសាកល និងតំបន់ ។ នេះបើតាមការបញ្ជាក់ពីលោកបណ្ឌិតសភាចារ្យ អូន ព័ន្ឋមុនីរ័ត្ន ។
លោកបន្តថា តាមរយៈលទ្ធផលនៃការសិក្សាបឋម កម្ពុជាកំពុងស្ថិតនៅក្នុងដំណាក់កាលដំបូង ឬដំណើរចាប់ផ្តើម នៃការរៀបចំខ្លួនចាប់យកឱកាសពីសេដ្ឋកិច្ចឌីជីថល ដែលនឹងតម្រូវឱ្យយើងត្រូវគិតគូរជាចម្បង នូវការជួយជំរុញសកម្មភាពពាណិជ្ជកម្មអេឡិចត្រូនិក ឱ្យកាន់តែរីកចម្រើនថែមទៀត ឈានដល់ «ដំណាក់កាលរីកចម្រើន» ស្របនឹងនិន្នាការរបស់ប្រទេសផ្សេងៗក្នុងតំបន់ ។
ប្រជាជនកម្ពុជាជាច្រើន បានកំពុងតែទទួលផលពីការរីកចម្រើននៃបច្ចេកវិទ្យាឌីជីថលនេះ ដូច្នេះកម្ពុជាត្រូវបង្កើតជាបរិស្ថានអំណោយផល ជាប្រព័ន្ធអេកូឡូហ្ស៊ី ដែលគាំទ្រដល់ការរីកចម្រើន ដែលរួមមានការ វិនិយោគទៅលើហេដ្ឋារចនាសម្ព័ន្ធតភ្ជាប់ទាំងផ្នែករឹង ផ្នែកទន់ និងផ្នែកឌីជីថល រួមទាំង ការវិនិយោគលើធនធានមនុស្ស និងជំនាញឱ្យស្របតាមតម្រូវការទីផ្សារក្នុងប្រទេស និងតំបន់ផងដែរ ។
ក្រសួងសេដ្ឋកិច្ចនិងហិរញ្ញវត្ថុកាលពីពេលថ្មីៗនេះ បានប្រកាសបង្កើតមូលនិធិសហគ្រិនភាព ដើម្បីជំរុញនិងលើកទឹកចិត្តដល់សហគ្រិន ពិសេសអ្នកចង់ប្រឡូកក្នុងវិស័យ ជំនួញឲ្យទទួលបានការបណ្តុះបណ្តាល និងមូលនិធិដើម្បីបង្កើតអាជីវកម្មរបស់ពួកគេឲ្យទទួលបានជោគជ័យ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុនEmerging Markets Consulting បានគាំទ្រដល់មជ្ឈមណ្ឌលថ្មីនេះ ដែលវានឹងរួមចំណែកលើកស្ទួយសហគ្រិនភាព និងសហគ្រិនជោគជ័យវ័យក្មេងនានា ឲ្យអាចចាប់ផ្តើមអាជីវកម្មរបស់ពួកគេ ពិសេសវានឹងក្លាយជាមជ្ឈមណ្ឌលភ្ញាស់សហគ្រិនថ្មី ដើម្បីឲ្យពួកគេអាចចាប់ផ្តើមជំនួញបានជោគជ័យ និងមានការគាំទ្រហិរញ្ញវត្ថុផងដែរ ។
លោកបន្តថា ៖« ការទាញយកផលប្រយោជន៍ពីសេដ្ឋកិច្ចឌីជីថលនៅកម្ពុជា យើងអាចទាញបាននៅមានកម្រិត ដោយសារកម្ពុជាមិនទាន់មានរចនាសម្ព័ន្ធគ្រប់គ្រងសមស្រប និងធនធានមនុស្សរបស់កម្ពុជានៅមានកម្រិតនៅឡើយ »៕
ចែករំលែកព័តមាននេះ