រាជធានីភ្នំពេញ ៖ សប្តាហ៍ទី៤នៃខែកញ្ញានេះ ក្រុមប្រឹក្សាអភិវឌ្ឍន៍កម្ពុជាហៅកាត់CDC បានសម្រេចផ្តល់វិញ្ញាបនប័ត្រចុះបញ្ជីជាស្ថាពរដល់ក្រុមហ៊ុនវិនយោគចំនួន២ ដែលគ្រោងបោះទុនវិនិយោគជាង៧លានដុល្លារ និងផ្តល់ការងារថ្មីប្រមាណជិត៦ពាន់កន្លែងបន្ថែមទៀតនៅក្នុងវិស័យឧស្សាហកម្ម ។ យោងតាមសេចក្តីប្រកាសព័ត៌មានរបស់CDC បានឲ្យដឹងថា…
រាជធានីភ្នំពេញ ៖ សប្តាហ៍ទី៤នៃខែកញ្ញានេះ ក្រុមប្រឹក្សាអភិវឌ្ឍន៍កម្ពុជាហៅកាត់CDC បានសម្រេចផ្តល់វិញ្ញាបនប័ត្រចុះបញ្ជីជាស្ថាពរដល់ក្រុមហ៊ុនវិនយោគចំនួន២ ដែលគ្រោងបោះទុនវិនិយោគជាង៧លានដុល្លារ និងផ្តល់ការងារថ្មីប្រមាណជិត៦ពាន់កន្លែងបន្ថែមទៀតនៅក្នុងវិស័យឧស្សាហកម្ម ។
យោងតាមសេចក្តីប្រកាសព័ត៌មានរបស់CDC បានឲ្យដឹងថា គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនប័ត្រចុះបញ្ជីជាស្ថាពរជូនដល់ក្រុមហ៊ុនវិនិយោគចំនួន២ផ្សេងៗគ្នា ដោយមានប្រាក់វិនិយោគប្រមាណជាង៧លានដុល្លារអាមេរិក និងត្រូវការកម្លាំងថ្មីជិត៦ពាន់កន្លែងបន្ថែមទៀត ខណៈបច្ចុប្បន្ន កម្ពុជាមានកម្លាំងពលកម្មធ្វើការជាង១លាននាក់ កំពុងបម្រើក្នុងវិស័យឧស្សាកម្ម និងវិស័យផ្សេងៗទៀត ។
សេចក្តីប្រកាសព័ត៌មានដដែលបានឲ្យដឹងថា គម្រោងបង្កើតរោងចក្រថ្មីនោះ រួមមានក្រុមហ៊ុនGIN AN PAPER CO.,LTD. មានគម្រោងបង្កើតរោងចក្រផលិតកេសកាតុង ដែលមានទីតាំងវិនិយោគស្ថិតនៅផ្លូវហាណូយ ភូមិបន្លាស្អិត សង្កាត់ឃ្មួញ ខណ្ឌសែនសុខ មានទុនវិនិយោគប្រមាណ២,១៤លានដុល្លារអាមេរិក និងអាចបង្កើតការងារបានចំនួន២០៧កន្លែង និងក្រុមហ៊ុន EASY LIFE SHOE CO.,LTD មានគម្រោងបង្កើតរោងចក្រផលិតស្បែកជើង ដែលមានទីតាំងវិនិយោគ ស្ថិតនៅភូមិត្រពាំងជ្រៃ សង្កាត់កាកាបទី២ ខណ្ឌពោធិ៍សែនជ័យ មានទុនវិនិយោគប្រមាណ៥,៣៦លានដុល្លារអាមេរិក និងអាចបង្កើតការងារបានចំនួន១.៦០៩កន្លែងផងដែរ។
របាយការណ៍ក្រសួងឧស្សាហកម្ម និងសិប្បកម្មបានឲ្យដឹងថា គិតត្រឹមខែមិថុនា ឆ្នាំ២០១៨នេះ វិស័យឧស្សាហកម្មកាត់ដេរ និងស្បែកជើង មានកម្លាំងពលកម្មសរុបជាង៨០ម៉ឺន ហើយបើបូករួមជាមួយវិស័យផ្សេងៗទៀត កម្ពុជាមានកម្លាំងពលកម្មសរុបជាង១លាននាក់ ។ វិស័យឧស្សាហកម្មកាត់ដេរ នឹងកាន់តែមានភាពប្រសើរឡើង ដោយសារនៅអំឡុងពេលនេះ ម្ចាស់ពាណិជ្ជនាម(ម៉ាកយីហោ) សម្លៀកបំពាក់ល្បីៗលើពិភពលោក រួមជាមួយភាគីរាជរដ្ឋាភិបាល និយោជក និងសហជីព ក៏ដូចជាភាគីពាក់ព័ន្ធ កំពុងតែពិភាក្សាលើគម្រោងបង្កើតអនុសញ្ញារួមមួយ ក្នុងគោលបំណងធ្វើឱ្យកាន់តែប្រសើរឡើងនូវវិស័យកាត់ដេរ ក្នុងនោះការធានាការបញ្ជាទិញផលិតផលកាត់ដេរពីកម្ពុជា ក៏ជាគោលបំណងដ៏សំខាន់ ។
បើតាមលោករដ្ឋមន្ត្រី អុិត សំហេង កិច្ចពិភាក្សានេះ គឺធ្វើយ៉ាងណាទាក់ទាញដៃគូពាក់ព័ន្ធនានាចូលរួមឱ្យបានកាន់តែច្រើន រួមទាំងអ្នកបញ្ជាទិញទាំងឡាយផងដែរ ពីព្រោះប្រសិនបើមានការឯកភាពក្នុងការរៀបចំអនុសញ្ញារួមនេះ អ្នកបញ្ជាទិញក៏ត្រូវធានាថា នឹងបន្តកិច្ចសហប្រតិបត្តិការជាមួយអ្នកផ្គត់ផ្គង់នៅប្រទេសកម្ពុជារយៈពេលវែងតទៅមុខទៀតដែរ ដែលអាចមានរយៈពេលរហូតដល់៤ទៅ៥ឆ្នាំ ឬច្រើនជាងនេះ ៕
ចែករំលែកព័តមាននេះ