ក្រុមបាតុករអាវក្រហមដែលមានភក្ដីភាពចំពោះលោកថាក់ស៊ីន ស៊ីណាវ៉ាត្រា អតីតនាយករដ្ឋមន្ដ្រីថៃដ៏មានប្រជាប្រិយភាព ហើយប្រឆាំងលោកអាប់ភីស៊ីត វ៉េចាជី វ៉ា នាយករដ្ឋមន្ដ្រីបច្ចុប្បន្នបានប្រកាសកាល ពីវេលាថ្ងៃត្រង់ថ្ងៃទី២១ មេសា ថាពេលនេះពួកគេមានឆន្ទៈចរចាជាលើកទី៣ ដើម្បីបញ្ចៀសការប៉ះទង្គិចគ្នាប្រកបដោយការបង្ហូរឈាម ប៉ុន្ដែការចរចាត្រូវធ្វើជាមួយភាគីទី៣ មិនចរចាជាមួយលោកនាយករដ្ឋមន្ដ្រី អាប់ភីស៊ីតទេ ។ មេដឹកនាំក្រុមអាវក្រហមនិយាយថា ការបង្ក្រាបដោយហិង្សាទៅលើក្រុមបាតុករអាវក្រហមពីសំណាក់ប៉ូលិសដែលមានភក្ដីភាពចំពោះលោកអាប់ភីស៊ីត នឹងកើតមានចៀសមិនផុតឡើយ ដូច្នេះក្រុមអាវក្រហមស្វែងរកការចរចាសន្ដិសុខ ប៉ុន្ដែមិនចរចារជាមួយលោកនាយករដ្ឋមន្ដ្រីអាប់ភីស៊ីតទៀតឡើយ ។លោក Jaran Ditthapicha ជាមេដឹកនាំសំខាន់ម្នាក់របស់ក្រុមអាវក្រហមបានថ្លែងប្រាប់ទីភ្នាក់ងាររ៉យទ័រថា ឥឡូវនេះក្រុមអាវក្រហមមានឆន្ទៈចរចា ដើម្បីបញ្ចប់វិបត្ដិនយោបាយ ប៉ុន្ដែមិនមែនជាមួយរដ្ឋាភិបាលលោកអាប់ភីស៊ីតទេ ។
- បាញ់ M-79 ឆេះកន្លែងស្ដុកប្រេងផ្គត់ផ្គង់យន្ដហោះនៅបាងកក
កន្លែងស្ដុកប្រេងមួយសំរាប់ផ្គត់ផ្គង់យន្ដហោះនៅព្រលានយន្ដហោះសុវណ្ណភូមិ ដែលជាព្រលានយន្ដហោះធំមួយរបស់ប្រទេសថៃ រងការវាយប្រហារដោយគ្រាប់ M-79 ចំនួន២គ្រាប់ កាលពីវេលាម៉ោង១រសៀលថ្ងៃទី ២១ មេសា ។ ប៉ុន្ដែសំណាងល្អដោយក្នុងចំណោមគ្រាប់ M-79 ទាំង២គ្រាប់នោះ ផ្ទុះតែមួយគ្រាប់ប៉ុណ្ណោះបណ្ដាលឱ្យឆេះអាងស្ដុកប្រេងយ៉ាងសន្ធោសន្ធៅ ។លោក Wannarat Charnnukul រដ្ឋមន្ដ្រីក្រសួងថាមពលថៃថ្លែងថា កន្លែងស្ដុកប្រេងដែលរងការវាយប្រហារដោយគ្រាប់ M-79 នោះស្ថិតនៅក្នុងសង្កាត់ Lum Luk Ka ក្នុងទីក្រុងបាងកក ។ លោក Wannarat ថ្លែងទៀតថា ប្រេងនៅក្នុងធុងស្ដុកមានតែពាក់កណ្ដាលធុងប៉ុណ្ណោះ ខណៈពេលរងការវាយប្រហារដោយគ្រាប់ M-79 នោះ ។ ការឆេះកន្លែងស្ដុកប្រេងនេះមានរយៈពេលជាង១ម៉ោង ប៉ុន្ដែមិនបង្កឱ្យមនុស្សស្លាប់ ឬរបួសនោះទេ ។ គេមិនដឹងថា ការវាយប្រហារកន្លែងស្ដុកប្រេងមានគោលបំណងអ្វីទេ ហើយពុំមានអ្នកណាអះអាងទទួលខុសត្រូវចំពោះការវាយប្រហារនេះដែរ ។
ចែករំលែកព័តមាននេះ