ប្រទេសឥណ្ឌា ៖ ប៉ូលិសឥណ្ឌាបានអះអាងថា ម្ចាស់ក្លិបរាត្រីមួយកន្លែងស្ថិតនៅរដ្ឋហ្គូអា (Goa) ភាគនិរតីប្រទេសឥណ្ឌា ដែលត្រូវបានអគ្គីភ័យឆាបឆេះដ៏សន្ធោសន្ធៅ និងឆក់ជីវិតមនុស្ស ២៥ នាក់…
ប្រទេសឥណ្ឌា ៖ ប៉ូលិសឥណ្ឌាបានអះអាងថា ម្ចាស់ក្លិបរាត្រីមួយកន្លែងស្ថិតនៅរដ្ឋហ្គូអា (Goa) ភាគនិរតីប្រទេសឥណ្ឌា ដែលត្រូវបានអគ្គីភ័យឆាបឆេះដ៏សន្ធោសន្ធៅ និងឆក់ជីវិតមនុស្ស ២៥ នាក់ កាលពីយប់ថ្ងៃសៅរ៍ ឆ្លងចូលថ្ងៃអាទិត្យ ទី៧ ខែធ្នូ ឆ្នាំ២០២៥ បានភៀសខ្លួនចេញពីប្រទេសឥណ្ឌា ប៉ុន្មានម៉ោងបន្ទាប់ពីសោកនាដកម្មដ៏រន្ធត់នេះ។ នេះបើតាមប្រភពពី BBC និង South China Morning Post ចេញផ្សាយនៅថ្ងៃទី៩ ខែធ្នូ ឆ្នាំ២០២៥។
អាជ្ញាធរឥណ្ឌាបញ្ជាក់ថា បងប្អូនប្រុសពីរនាក់ ឈ្មោះ Saurabh និង Gaurav Luthra បានឡើងយន្តហោះភៀសខ្លួនទៅកាន់ខេត្តភូកេត (Phuket) ប្រទេសថៃ ភ្លាមៗបន្ទាប់ពីសោកនាដកម្មដ៏រន្ធត់។
មន្ត្រីស៊ើបអង្កេតជឿថា អគ្គីភ័យដ៏សន្ធោសន្ធៅនៅក្នុងក្លិបរាត្រី Birch By Romeo Lane នៅភូមិអាប៉ូរ៉ា (Arpora) តំបន់ឆ្នេរភាគខាងជើងរដ្ឋហ្គូអា ទំនងជាបង្កឡើងដោយកាំជ្រួចអគ្គិសនី (Electrical Firecracker) ហើយមនុស្សភាគច្រើនបានស្លាប់ដោយសារតែថប់ដង្ហើមនៅក្នុងបន្ទប់ក្រោមដី និងផ្ទះបាយ បន្ទាប់ពីផ្នែកឈើក្នុងក្លិបបានឆាបឆេះ។ ជនរងគ្រោះភាគច្រើនជាបុគ្គលិក រួមទាំងពលរដ្ឋនេប៉ាល់ ៤ នាក់ផងដែរ។ ជាមួយគ្នានោះ ជនរងគ្រោះ ៥ នាក់ កំពុងតែសម្រាកព្យាបាលនៅក្នុងមន្ទីរពេទ្យ។
ប៉ូលិសបានបញ្ជាក់ថា មន្ត្រីជំនាញបានធ្វើដំណើរទៅកាន់ទីក្រុងញូវដេលី (New Delhi) ដើម្បីឆ្មក់ចូលផ្ទះរបស់បងប្អូនជាម្ចាស់ក្លិបទាំងពីរនាក់ ប៉ុន្តែនរកឃើញថា ពួកគេបានចាកចេញពីប្រទេសឥណ្ឌាបាត់ទៅហើយ។ នេះបង្ហាញពីចេតនារបស់ពួកគេគេចវេះការស៊ើបអង្កេតរបស់ប៉ូលិស។ ប៉ូលិសក៏បានអំពាវនាវដល់ប៉ូលិសអន្តរជាតិ ដើម្បីសុំជំនួយក្នុងការស្វែងរក និងចាប់ខ្លួនបងប្អូនប្រុសត្រកូល Luthra ទាំងពីរនាក់។
លោក Saurabh Luthra ដែលត្រូវបានកំណត់អត្តសញ្ញាណថាជាប្រធានក្រុមហ៊ុន និងបើកដំណើរការក្លិបរាត្រី Birch By Romeo Lane បានបង្ហោះសារលើបណ្តាញទំនាក់ទំនងសង្គម កាលពីថ្ងៃទី៨ ខែធ្នូ ដោយបង្ហាញពីទុក្ខសោកចំពោះសោកនាដកម្មដ៏រន្ធត់នេះ ប៉ុន្តែមិនបានបញ្ជាក់ពីទីតាំងរបស់ខ្លួនស្ថិតនៅទីណានោះទេ។ ចំណែកប្អូនប្រុសរបស់គាត់ លោក Gaurav Luthra វិញ ក៏មិនបានធ្វើអត្ថាធិប្បាយជាសាធារណៈណាមួយដែរ។
នៅក្នុងសោកនាដកម្មអគ្គិភ័យឆាបឆេះក្លិបរាត្រី Birch By Romeo Lane របាយការណ៍ពីប្រព័ន្ធផ្សព្វផ្សាយក្នុងស្រុកបានឱ្យដឹងថា យ៉ាងហោចណាស់មនុស្ស ៤ នាក់ ត្រូវបានចាប់ខ្លួនភ្លាមៗ បន្ទាប់ពីកើតមានអគ្គីភ័យ៕ ប្រភព ៖ BBC, South China Morning Post, India Today និង India.com
ចែករំលែកព័តមាននេះ