រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈបានសម្រេចឲ្យថៅកែរោងចក្រទាំងអស់ត្រូវបើកប្រាក់ខែជូនកម្មករនិយោជិតក្នុង១ខែពីដង តាំងពីដើមឆ្នាំ២០១៩តទៅ ។
យោងតាមសេចក្តីប្រកាសរបស់ក្រសួងការងារ និងបណ្តុះបណ្តាលវិជ្ជាជីវៈចេញផ្សាយនៅថ្ងៃទី២១ កញ្ញានេះ បានសម្រេចយ៉ាងដូច្នេះថា ចាប់ពីខែមករា ឆ្នាំ២០១៩ តទៅ ម្ចាស់សហ គ្រាស គ្រឹះស្ថានទាំងឡាយណាដែលស្ថិតនៅក្រោមបទបញ្ញត្តិនៃច្បាប់ស្តីពីការងារត្រូវរៀបចំ ឲ្យមានការបើកប្រាក់ឈ្នួលជូនកម្មករនិយោជិតចំនួន ២ដងក្នុងមួយខែ ដោយត្រួវបើកលើកទី១ ក្នុងសប្តាហ៍ទី២ និងលើកទី២ ក្នុងសប្តាហ៍ទី៤ នៃខែនីមួយៗ ។
ប្រភពបានបញ្ជាក់ថា «លើកទី១ គឺស្មើនឹងចំនួន៥០% (ហាសិបភាគរយ) នៃប្រាក់ឈ្នួលសុទ្ធសាធក្នុងមួយខែ ។ លើកទី២ គឺស្មើនឹងចំនួនប្រាក់ឈ្នួលសុទ្ធសាធដែលនៅសល់ ប្រាក់ឈ្នួលបន្ទាប់បន្សំ និងអត្ថប្រយោជន៍ផ្សេងៗទៀតដែលកម្មករនិយោជិតត្រូវទទួលបាននៅក្នុងខែនីមួយៗ» ។
សេចក្តីប្រកាសរបស់ក្រសួងក៏បាននាយកខុទ្ធកាល័យ អគ្គនាយកនៃអគ្គនាយកដ្ឋានរដ្ឋបាលនិងហិរញ្ញវត្ថុអគ្គនាយកនៃអគ្គនាយកដ្ឋានការងារប្រធាន នាយកដ្ឋានអធិការកិច្ចការងារ ប្រធាននាយកដ្ឋានវិវាទការងារ ប្រធានអង្គភាព ក្រោមឱវាទនៃក្រសួងការងារ ប្រធានមន្ទីរការងារ និងបណ្តុះបណ្តាលវិជ្ជាជីវៈរាជធានីខេត្ត ត្រូវអនុវត្តតាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ ។
សូមជម្រាបថា ការសម្រេចរបស់ក្រសួងការងារស្របតាមគោលនយោបាយរបស់រាជរដ្ឋាភិបាលដែលតែងតែគិតគូរកម្មករនិយោជិតលើកវិស័យកាត់ដេរ និងផលិតស្បែកជើង ។ ជាក់ស្តែងក្នុងជំនួបសំណេះសំណាលជាមួយកម្មករសម្តេចតេជោ ហ៊ុន សែន បានសម្រេចឲ្យ មានការបើកប្រាក់ឈ្នួលជូនកម្មករពីរដងក្នុងមួយខែ ៕
ចែករំលែកព័តមាននេះ