រាជធានីភ្នំពេញ ៖ ហាងលក់ទូរស័ព្ទ១កន្លែងត្រូវបានឆាបឆេះស្ទើរទាំងស្រុងនៅក្បែរផ្សារសូរិយា បង្កការភ្ញាក់ផ្អើលដល់មន្ត្រីជំនាញអគ្គិភ័យ ចុះអន្តរាគមន៍ និងទប់ស្កាត់មិនអោយមានឆេះរាលដាល កាលពីវេលាម៉ោង៧និង៣០នាទីយប់ ថ្ងៃទី២២ ខែឧសភា ឆ្នាំ២០២៤…
រាជធានីភ្នំពេញ ៖ ហាងលក់ទូរស័ព្ទ១កន្លែងត្រូវបានឆាបឆេះស្ទើរទាំងស្រុងនៅក្បែរផ្សារសូរិយា បង្កការភ្ញាក់ផ្អើលដល់មន្ត្រីជំនាញអគ្គិភ័យ ចុះអន្តរាគមន៍ និងទប់ស្កាត់មិនអោយមានឆេះរាលដាល កាលពីវេលាម៉ោង៧និង៣០នាទីយប់ ថ្ងៃទី២២ ខែឧសភា ឆ្នាំ២០២៤ ស្ថិតនៅក្បែរផ្សារសូរិយា ផ្ទះលេខ១៧ ផ្លូវលេខ១៤២ ក្រុម២២ ភូមិ៤ ក្នុងសង្កាត់ផ្សារថ្មី១ ខណ្ឌដូនពេញ រាជធានីភ្នំពេញ។
យោងតាមប្រភពព័ត៌មានពីប្រជាពលរដ្ឋដែលស្ថិតនៅកន្លែងកើតហេតុបានឲ្យដឹងថា មុនពេលកើតហេតុគេបានលឺសំឡេងផ្ទុះ២ទៅ៣ដងខ្លាំងៗចេញពីក្នុងទីតាំងកើតហេតុខាងលើបន្ទាប់មកក៏ស្រាប់តែមានអណ្តាតភ្លើងពណ៌ក្រហម និងផ្សែងហ៊ុយខ្លាំងចេញពីហាងលក់ទូរស័ព្ទដៃ បង្កទៅជាអគ្គិភ័យឆាបឆេះហាងទាំងមូលតែម្តង ។
អ្នកឃើញហេតុការណ៍បានបន្តទៀតថា ឃើញដូចនេះ អ្នកភូមិបាននាំគ្នាជួយបាញ់ពន្លត់ដោយប្រើប្រាស់បំពង់ឧស្ម័នពន្លត់អគ្គិភ័យអស់ជាច្រើនបំពង់ និងបាននាំគ្នាជួយគាស់ទ្វារ ដើម្បីងាយបាញ់ពន្លត់ហើយខ្លះទៀតបានទាក់ទងទៅសមត្ថកិច្ចជំនាញ និងសុំរថយន្តពន្លត់អគ្គិភ័យជួយអន្តរាគមន៍ ។
ក្រោយទទួលដំណឹងនេះ ការិយាល័យនគរបាលបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាលរាជធានីភ្នំពេញបានបញ្ជាឲ្យរថយន្តពន្លត់អគ្គិភ័យដែលនៅជិតគោលដៅឆេះបំផុត ចេញទៅអន្តរាគមន៍ភ្លាមៗផងដែរ ។
នៅក្នុងហេតុការណ៍ខាងលើនេះ មន្ត្រីជំនាញបានប្រើប្រាស់រថយន្តពន្លត់អគ្គិភ័យជាច្រើនគ្រឿង ក្នុងនោះមានរថយន្តរបស់ការិយាល័យ ចំនួន០៥គ្រឿង ប្រើប្រាស់ទឹកអស់០៤គ្រឿង និងរថយន្តជំនួយពីទីក្រុងកោះនរា១គ្រឿង កោះពេជ្រ២គ្រឿង និងអូឡាំព្យា១គ្រឿង បានរលត់ទាំងស្រុង នៅម៉ោង៧និង៥៥នាទីយប់ថ្ងៃដដែល និងមិនបានបង្កអោយនរណាម្នាក់មានរបួសស្នាមនោះទេ ជាក់ស្តែង គឺខូចខាតទ្រព្យសម្បត្តិក្នុងហាងស្ទើរតែទាំងស្រុងទៅហើយ និងម៉ូតូពីរគ្រឿងផងដែរ តែមិនបានរាលដាលដល់ផ្ទះដែលនៅជាប់គ្នានោះទេ ចំពោះមូលហេតុនៃការឆាបឆេះនេះ គឺបណ្តាលមកពីការឆ្លងចរន្តអគ្គិសនី ៕
ចែករំលែកព័តមាននេះ