តំបន់សេដ្ឋកិច្ចពិសេស កម្ពុជា-កូរ៉េ អាចនឹងមានរូបរាង
- ភ្នំពេញ
តំបន់សេដ្ឋកិច្ចពិសេស កម្ពុជា-កូរ៉េ ដែលបានផ្តួចផ្តើមឡើងដោយមេដឹកនាំកម្ពុជា នៅក្នុងអំឡុងពេលបំពេញទស្សនៈកិច្ចនៅកូរ៉េខាងត្បូង កាលពីពេលថ្មីៗកន្លងទៅនេះ
តំបន់សេដ្ឋកិច្ចពិសេស កម្ពុជា-កូរ៉េ ដែលបានផ្តួចផ្តើមឡើងដោយមេដឹកនាំកម្ពុជា នៅក្នុងអំឡុងពេលបំពេញទស្សនៈកិច្ចនៅកូរ៉េខាងត្បូង កាលពីពេលថ្មីៗកន្លងទៅនេះ អាចនឹងលេចរូបរាងឡើងនៅពេលខាងមុខ ។
ពាក់ព័ន្ធនឹងគម្រោងនេះ លោក ផាក ជង វូក (Park Jung-Wook) ឯកអគ្គរដ្ឋទូតនៃសាធារណរដ្ឋកូរ៉េ ប្រចាំព្រះរាជាណាចក្រកម្ពុជា បានមកពិភាក្សាជាមួយនឹង លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា រួមជាមួយនឹងរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និង រដ្ឋមន្ត្រីក្រសួងរ៉ែ និងថាមពល ព្រមទាំងថ្នាក់ដឹកនាំ និងមន្ត្រីជំនាញពីក្រសួង-ស្ថាប័នពាក់ព័ន្ធជាច្រើនរូប។
លោក ស៊ុន ថាន់ថុល បានបញ្ជាក់នៅលើបណ្តាញសង្គមរបស់លោកនៅថ្ងៃទី២១ ខែមិថុនា ថា ជាគោលបំណងក្នុងកិច្ចប្រជុំពិភាក្សានាកាលពីរសៀលម្សិលមិញ ភាគីកម្ពុជា បានផ្ដល់ជូនអំពីព័ត៌មានជាសក្ដានុពលល្អ សម្រាប់ការវិនិយោគបង្កើតតំបន់សេដ្ឋកិច្ចពិសេស ជម្រាបជូនទៅកាន់ស្ថានទូតកូរ៉េ ប្រចាំកម្ពុជា ដើម្បីរួមគ្នាផ្សព្វផ្សាយបញ្ជ្រៀបអំពីសក្ដានុពល ការលើកទឹកចិត្តពីរដ្ឋាភិបាលកម្ពុជា ចំពោះគម្រោងបង្កើតតំបន់សេដ្ឋកិច្ចពិសេសកម្ពុជា-កូរ៉េ ព្រមទាំងកិច្ចសម្របសម្រួលការងារវិនិយោគ ជូនវិនិយោគិនផងដែរ។
ក្រោយពីបានជម្រាបជូនអំពីព័ត៌មានដល់ភាគីកូរ៉េ លោកឧបនាយករដ្ឋមន្ត្រី បានជម្រាបជូនអំពីការត្រៀមខ្លួនរបស់កម្ពុជា ក្នុងការសម្របសម្រួលរាល់កិច្ចការងារវិនិយោគរបស់វិនិយោគិន ហើយក្នុងនោះ លោក ឧបនាយករដ្ឋមន្ត្រី ក៏បានស្នើសុំឱ្យលោកឯកអគ្គរដ្ឋទូត សហការស្វែងរកវិនិយោគិនមានសក្ដានុពលពីប្រទេសកូរ៉េ ដែលមានបំណងដាក់ទុនវិនិយោគលើការរៀបចំបង្កើតតំបន់សេដ្ឋកិច្ចពិសេសកម្ពុជា-កូរ៉េ ដើម្បីអនុញ្ញាតឱ្យគណៈប្រតិភូកម្ពុជា ពិសេសក្នុងនាមលោកផ្ទាល់ អញ្ជើញទៅប្រទេសកូរ៉េ ដើម្បីគោះទ្វារផ្ដល់ព័ត៌មានគ្រប់ជ្រុងជ្រោយ និងការគាំទ្រពេញទំហឹងរបស់រាជរដ្ឋាភិបាលកម្ពុជា ជូនដល់វិនិយោគិនកូរ៉េ។
សូមជម្រាបជូនថា កិច្ចប្រជុំនាឱកាសនេះ ត្រូវបានរៀបចំឡើងស្របតាមលទ្ធផលនៃដំណើរទស្សនកិច្ចផ្លូវការនាសាធារណរដ្ឋកូរ៉េ កាលពីថ្ងៃទី១៦ ខែឧសភា ឆ្នាំ២០២៤ កន្លងទៅ របស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក្នុងជំនួបជាមួយលោក យូន ស៊កយ៉ល (Yoon Suk Yeol) ប្រធានាធិបតី នៃសាធារណរដ្ឋកូរ៉េ ដែលថ្នាក់ដឹកនាំទាំងពីរបានរំលេចផ្តួចផ្តើមឱ្យមានការបង្កើតតំបន់សេដ្ឋកិច្ចពិសេសកម្ពុជា-កូរ៉េ ដើម្បីបង្កើតបរិយាកាសអំណោយផលសម្រាប់ការវិនិយោគរបស់ក្រុមហ៊ុនកូរ៉េ ដែលធ្វើអាជីវកម្មរបស់ខ្លួននៅកម្ពុជា៕
ដោយ ៖ ស ផាន់
ចែករំលែកព័តមាននេះ